پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ ءتوراعاسى ماۋلەن اشىمباەۆ باستاعان ماجىلىسمەندەر الدىمەن «بەيبىتشىلىك جولىنداعى سەرىكتەستىك» وقىتۋ ورتالىعىندا بولىپ, «بىتىمگەرشىلىك كونتينگەنتتى دايىنداۋ جانە «قازاقستان رەسپۋبليكاسىنىڭ بىتىمگەرشىلىك ءىس-شارالارى تۋرالى» زاڭنىڭ ىسكە اسىرىلۋ بارىسى» تاقىرىبى بويىنشا وتىرىس وتكىزدى. ءماجىلىس دەپۋتاتتارى, قورعانىس مينيسترلىگىنىڭ باسشىلىق قۇرامى وكىلدەرى قاتىسقان بۇل كوشپەلى وتىرىس قارۋلى كۇشتەردىڭ 25 جىلدىعى قارساڭىندا وتكىزىلگەنىن ايتا كەتۋ كەرەك.
القالى جيىندا ەلىمىزدىڭ 2017-2018 جىلدارداعى بۇۇ قاۋىپسىزدىك كەڭەسىنىڭ مۇشەلىگىندەگى باسىمدىقتارى مەن بىتىمگەرشىلىك ماقساتتا اتقارىلىپ جاتقان جۇمىستار توڭىرەگىندە اڭگىمە ءوربىدى. اسكەري مەديتسينا, مينادان تازارتۋ جانە رادياتسيالىق, حيميالىق جانە بيولوگيالىق قورعانىس ورتالىقتارىنىڭ كومانديرلەرى رۋسلان يسەەۆ, رافيك اجگاليەۆ, باقىت ابدۋللاەۆ ارنايى بايانداما جاساپ, قاراپايىم حالىققا گۋمانيتارلىق كومەك كورسەتۋ, سوعىس الاڭدارىن مينادان تازارتۋ سياقتى سوعىس جاعدايىنداعى تاكتيكالىق ءىس-قيمىلدار, سونداي-اق, اسكەري قىزمەتكەرلەرگە شەت تىلدەرىن قارقىندى ءارى جەدەل وقىتۋ ءادىس-تاسىلدەرىمەن تانىستىردى. دەپۋتاتتار تاراپىنان ناقتى سۇراقتار قويىلىپ, بىرقاتار ۇسىنىستار ايتىلدى.
بۇدان كەيىن دەسانتتىق-شابۋىلداۋشى اسكەرلەرىنىڭ قۇرامىنا كىرەتىن «قازبات-1», «قازبات-2», «قازبات-3» اتالاتىن ءۇش باتالوننان تۇراتىن «قازبريگ» قازاقستان ءبىتىمگەرشىلىك بريگاداسىنىڭ جەكە قۇرامى تانىستىرىلدى. دەپۋتاتتار 61993 اسكەري ءبولىمشەسىنە بارىپ, زاماناۋي قارۋ-جاراق, تەحنيكالىق بازا, اسكەرلەردىڭ تاكتيكالىق دايىندىعى جانە اسكەري ءبولىمنىڭ جالپى جاعدايىمەن تانىستى.
قورعانىس ءمينيسترىنىڭ ورىنباسارى تالعات مۇحتاروۆتىڭ ايتۋىنشا, قاقتىعىستان زارداپ شەككەن, كومەك پەن قولداۋعا مۇقتاج مەملەكەتتەرگە بەيبىت ماقساتتا قولۇشىن سوزۋ ءۇشىن ارنايى قۇرىلعان بىتىمگەرلىك باتالونى جىل سايىن حالىقارالىق جاتتىعۋلارعا قاتىسادى. ماسەلەن, وتكەن جىلى گەرمانيادا, ۇلىبريتانيادا ءوتكەن جاتتىعۋلاردا الەۋەتىن سىناپ, جوعارعى باعاعا يە بولعان. تەوريالىق جانە پراكتيكالىق دايىندىعى كۇننەن كۇنگە ءوسىپ كەلە جاتقان باتالون قاجەتتى جابدىقتار – قارۋ-جاراق, تەحنيكامەن تولىق قامتاماسىز ەتىلگەن. وسى ۋاقىتقا دەيىن سوعىس قيمىلدارى ءجۇرىپ جاتقان بىرنەشە ەلدە وفيتسەرلەرىمىز باقىلاۋشى رەتىندە قاتىسىپ, جوعارى دەڭگەيدەگى مامان ەكەندىكتەرىن دالەلدەپ قايتقان.
ءداستۇرلى «دالا قىرانى» اتتى حالىقارالىق جاتتىعۋعا دايىندىق ءجۇرىپ جاتقان «ىلە» وقۋ-جاتتىعۋ ورتالىعىندا ناقتى قيمىلدارعا قۇرىلعان اسكەري دايىندىقتار كورسەتىلدى. ءبىتىمگەرلىك باتالون كەز كەلگەن جەرگە بارىپ, اسكەري بازانى ورنالاستىرا الادى. بازاعا تۇتقيىلدان شابۋىل جاسالعان جاعدايدا اتقارىلاتىن العاشقى قارسى تۇرۋ جانە قورعانۋ قيمىلدارى, زاماناۋي جابدىقتارمەن قامتاماسىز ەتىلگەن اسكەري مەديتسينالىق پۋنكتتەردىڭ جۇمىس بارىسى, نارازىلىق شەرۋلەرىن بەيبىت جولمەن باسۋ, مينادان تازارتۋ سەكىلدى كۇردەلى جاتتىعۋلاردىڭ قانداي تارتىپپەن ورىندالاتىنى دەپۋتاتتار نازارىنا ۇسىنىلدى. سونىمەن قاتار, اسكەري بازانىڭ اكىمشىلىك قۇرامى دا تانىستىرىلىپ, ءار ءبولىمنىڭ اتقاراتىن مىندەتىنە جەكە-جەكە توقتالدى.
مۇنداعى ساربازداردىڭ دەنى بىرنەشە شەت تىلدەرىن مەڭگەرگەن. ساپتاعى ساربازداردىڭ اراسىندا قىزدار دا بار ەكەن. سويتسەك, زاڭدىق تالاپقا سايكەس باتالوننىڭ 10 پايىزى قىزداردان تۇراتىن كورىنەدى. ساربازداردىڭ اراسىندا سوعىس ءورتى تۇتانعان مەملەكەتتەردە بولىپ, بىتىمگەرشىلىك ميسسياسىن اتقارىپ قايتقاندار دا بار.
وقۋ-جاتتىعۋ جۇمىستارىنا وڭ باعا بەرگەن ماۋلەن اشىمباەۆ:
– سوڭعى جىلدارى قازاقستان الەمگە بىتىمگەرشىلىك ميسسيالارىمەن تانىمال بولىپ جۇرگەنىن بىلەسىزدەر. اتاپ ايتساق, يران, ۋكراينا, سيريا مەملەكەتتەرىندەگى جاعدايدىڭ تۇراقتالۋىنا بارىنشا ىقپال ەتىپ كەلە جاتىر. وسىدان ءبىراز ۋاقىت بۇرىن تۇركيا مەن رەسەي اراسىنداعى شيەلەنىسكەن قارىم-قاتىناستى رەتتەۋگە دە ەلباسىنىڭ تىكەلەي ارالاسقانى بەلگىلى. قازاقستان ءبىتىمگەرشىلىك ميسسياسىن اتقارۋدا تەك ديپلوماتيالىق جولمەن عانا ەمەس, كەرەك كەزىندە اسكەري قۇرىلىمداردى دا جىبەرۋگە دايىن. «قازبات» بىتىمگەرلىك باتالونى وسى ماقساتتا قۇرىلعانى بەلگىلى. بۇگىنگى ماقساتىمىز دا وسى «قازباتتىڭ» دايىندىعىن پىسىقتاۋ. كوزىمىز كورگەندەي, ءبىزدىڭ بىتىمگەرلىك كونتينگەنتىمىز بۇۇ اياسىندا گۋمانيتارلىق اكتسيالاردى جۇزەگە اسىرۋعا, بەيبىت حالىقتىڭ قاۋىپسىزدىگىن قامتاماسىز ەتۋگە دايىن, – دەدى تىلشىلەرگە بەرگەن سۇحباتىندا.
قۇرامىندا قوس گەنەرال باقىتجان ەرتاەۆ پەن اباي تاسبولاتوۆ بار دەپۋتاتتار اسكەريلەردىڭ دايىندىق دەڭگەيىن جوعارى باعالادى. ال ءبىر كۇنگە سوزىلعان ساپار بارىسىندا ايتىلعان ۇسىنىستار مەن تالاپ-تىلەكتەر الداعى ۋاقىتتا تالقىلانباق.
الماس ءنۇسىپ,
«ەگەمەن قازاقستان»
الماتى