– ساياجايلارداعى 579 ءۇي مەن اۋلانى سۋ باسىپ, 1 174 ادام قاۋىپسىز جەرلەرگە كوشىرىلدى, 69 ادام قۇتقارىلدى. ادامداردى ۋاقىتشا ورنالاستىرۋ بەكەتتەرىنىڭ جەتەۋىندە 572 ادام بار, ونىڭ 159-ى بالا. ولاردى ءۇش رەت تاماقتاندىرۋ جاعى ۇيىمداستىرىلعان,– دەدى دەپارتامەنت باستىعى باۋىرجان سىزدىقوۆ.
وبلىس اۋماعىندا 13 تاسقىنعا قارسى شتاب قۇرىلىپ, تۇرعىنداردان 1 834 ءوتىنىش تۇسكەن. بوگەت جاساۋ ءۇشىن 4 145 تەكشە مەتر ينەرتتىك ماتەريالدار اكەلىنىپ, 205,8 مىڭ تەكشە مەتر سۋ ايدالعان. حرومتاۋ مەن مارتوكتە ەلەك پەن قارعالى وزەندەرىنىڭ ارناسىنان شىعۋى مۇمكىن دەگەن جەرلەرىن بوگەۋ بويىنشا الدىن الۋ جۇمىستارى جۇرگىزىلدى.
8 ساۋىردەن باستاپ وڭىردە كۇن كۇرت جىلىپ, قار تەز ەري باستاعان-دى. قارعالى جانە اقتوبە سۋ قويمالارىنىڭ سۋ جيناعىشتارىندا ءالى كۇنگە دەيىن جەردىڭ 11-دەن 21 سانتيمەترگە دەيىنگى توڭ قاباتى ەرىمەگەن. ياعني, جەر بەتىندەگى قار مەن مۇز جەرگە سىڭبەي, سۋ قويمالارعا جينالۋدا.
16 ساۋىردە اقتوبەدە جەرگىلىكتى دەڭگەيدە سيپاتى بار توتەنشە جاعداي جاريالانعان بولاتىن. تاسقىننىڭ سالدارىن جويۋ ورىندارىنان كوشىرىلگەن ازاماتتاردىڭ م ۇلىكتەرىن توناۋعا جول بەرمەۋ ماقساتىندا 21 بەكەت ورناتىلدى. ماتەريالدىق قۇرالداردى شىعارۋعا جانە ۋاقىتشا ورنالاستىرۋ بەكەتتەرىنە جەتكىزۋگە كومەكتەسۋ توپتارى جىبەرىلدى.
سونداي-اق, سۋ تاسقىنىنان زارداپ شەككەندەرگە كومەك كورسەتەتىن الەۋمەتتىك كوميسسيا قۇرىلدى. ونى اقتوبە قالاسى اكىمىنىڭ ورىنباسارلارى ءلاززات ورازباەۆا, رۋزيا ايداشەۆا باسقارادى. كوميسسيا وتىرىسى كەزىندە ورتاق ەسەپشوت اشىلدى. اقتوبەدەگى ىسكەر ايەلدەر قاۋىمى كومەكتەسۋگە دايىن. ال «نۇر وتان» پارتياسىنىڭ مۇشەلەرى ءبىر كۇندىك جالاقىنى اۋدارۋعا ۇندەۋ تاستادى. كوميسسيانىڭ نەگىزگى جۇمىسى سۋ تارتىلىپ, ساياجايداعى ءۇيلەرگە كىرۋ مۇمكىندىگى بەرىلگەن كەزدە جاندانادى. ازىرگە, زاتتاي, قارجىلاي كومەك ءبىر جەرگە جينالادى.
تەمىر قۇسايىن,
«ەگەمەن قازاقستان»
اقتوبە