جيىندى اشقان گ.يسىمباەۆا پرەزيدەنت ن.نازارباەۆتىڭ باستاماسىمەن قابىلدانعان بەس ينستيتۋتتىق رەفورمانى ىسكە اسىرۋ ءجونىندەگى «100 ناقتى قادام» ۇلت جوسپارىنىڭ 98-قادامىندا اۋداندىق ماڭىزى بار قالالار, كەنتتەر, اۋىلدار, اۋىلدىق وكرۋگتەر دەڭگەيىندە دەربەس بيۋدجەت ەنگىزۋ مىندەتتەرى بەلگىلەنگەندىگىن جانە ەلباسى بۇل شارالاردى ىسكە اسىرۋعا قاتىستى بيىلعى جولداۋىندا تاعى دا بىرقاتار تاپسىرما بەرگەنىن ايتتى.
«مەملەكەت باسشىسى جولداۋدا قارجى شىعىسىن اۋداندىق جانە اۋىلدىق دەڭگەيگە بەرۋ جونىندە ناقتى تاپسىرما جۇكتەدى. مۇنى قابىلداۋ ءناتيجەسىندە اۋىل تۇرعىندارىنىڭ ماڭىزدى قاجەتتىلىكتەرى قىسقا مەرزىم ءىشىندە قاناعاتتاندىرىلىپ, وعان زور ءمۇمكىنشىلىكتەر بەرىلمەك. ياعني, اۋىلدىق جەردىڭ ءوز قاراجاتى بولىپ, تۋىنداعان ماسەلەلەردى وزدەرى ەدەل-جەدەل شەشۋگە كىرىسەدى دەگەن ءسوز. سوندىقتان, قازىرگى كەزدە ماجىلىستە قارالىپ جاتقان جەرگىلىكتى ءوزىن ءوزى باسقارۋدى دامىتۋ ماسەلەسى جونىندەگى زاڭ جوباسىنىڭ ءمان-ماڭىزى ەرەكشە. اتاپ ايتقاندا, اۋىلدىق ەلدى مەكەندەردى سۋمەن قامتاماسىز ەتۋگە, اۆتوكولىك جولدارىن سالۋعا, كۇتىپ ۇستاۋ جانە جوندەۋگە, مەملەكەتتىك تۇرعىن ءۇي قورىن كۇتىپ ساقتاۋدى ۇيىمداستىرۋعا بيۋدجەتتىك قاراجاتتاردى پايدالانۋعا مۇمكىندىكتەر بەرىلمەك. سونىمەن قاتار, زاڭ قابىلدانعاننان كەيىن حالىقتىڭ كۇندەلىكتى قاجەتتى مۇقتاجدىقتارىن, ءاسىرەسە, وقۋشىلاردى جاقىن ماڭداعى مەكتەپتەرگە تەگىن اپارىپ, الىپ قايتۋ, اۋىر سىرقاتتى ادامداردى اۋرۋحانالارعا جەتكىزۋدى ۇيىمداستىرۋ, الەۋمەتتىك كومەككە مۇقتاج ازاماتتارعا ۇيلەرىندە كومەك كورسەتۋ سياقتى ماسەلەلەر وڭ شەشىمىن تاۋىپ, وعان ازاماتتار تىكەلەي قاتىساتىن بولادى», – دەدى گ.يسىمباەۆا.
ال اتالعان ماسەلەگە قاتىستى ارنايى بايانداما جاساعان ۇلتتىق ەكونوميكا مينيسترى ت.سۇلەيمەنوۆ بۇل تالقىلاۋ جەرگىلىكتى ءوزىن ءوزى باسقارۋدىڭ دەربەس بيۋدجەتى مەن كوممۋنالدىق مەنشىكتى ەنگىزۋ جونىندەگى ءىس-شارالار جوسپارىن ۋاقتىلى دايىنداۋعا مۇمكىندىك تۋعىزاتىنىن كوپشىلىكتىڭ قاپەرىنە سالدى. سونىڭ اياسىندا مەملەكەتتىك ورگاندار مەن ۇيىمدارعا 2017 جىلعى 1 ماۋسىمعا دەيىن اۋىلدىق وكرۋگتەردەگى جىلجىمايتىن جانە جىلجىمالى م ۇلىكتەردىڭ تىركەلمەگەن نىساندارىن انىقتاۋعا, جىل سوڭىنا دەيىن مەملەكەتتىك ورگانداردىڭ اقپاراتتىق جۇيەلەرى مەن دەرەكتەر بازاسىنىڭ تولىق دايىندىعىن تەكسەرۋ, وزەكتەندىرۋ ءارى ينتەگراتسيالاۋ جولىمەن قامتاماسىز ەتۋگە ناقتى تاپسىرمالار بەرىلگەنىن حابارلادى. ءمينيستردىڭ ءمالىمەتىنشە, وسى كۇندەرى ەلىمىزدە 16 اۋىلدىق وكرۋگ كومپيۋتەر قۇرالدارىمەن قامتاماسىز ەتىلمەگەندىكتەن, ماسەلەنى بيىلعى جىلدىڭ 1 قاراشاسىنا دەيىن شەشۋ وبلىس اكىمدىكتەرىنە جۇكتەلگەن كورىنەدى.
«سونداي-اق, ءىس-شارالار جوسپارىنا سايكەس, جەرگىلىكتى اتقارۋشى ورگاندار 1 قىركۇيەككە دەيىنگى مەرزىمدە اۋىلدىق وكرۋگتەر اكىمدەرىنىڭ اپپاراتىن قاجەتتى جىلدامدىقتاعى ينتەرنەتپەن قامتاماسىز ەتۋى ءتيىس. وعان قوسا, بيۋدجەتپەن جانە كوممۋنالدىق م ۇلىكپەن جۇمىس جۇرگىزۋ ءۇشىن جوعارى نەمەسە ارناۋلى ورتا ءبىلىمى بار ەكونوميكالىق, قارجىلىق جانە بۋحگالتەر ماماندارى قاجەتتىگى ايقىن سەزىلۋدە. وسى ماسەلەنى دە ءتيىمدى شەشۋدىڭ جولدارىن قاراستىرۋىمىز كەرەك», – دەدى ت.سۇلەيمەنوۆ.
ال ءماجىلىس دەپۋتاتى, زاڭ جوباسىن قاراۋ جونىندەگى جۇمىس توبىنىڭ جەتەكشىسى ءارى «نۇر وتان» پارتياسى فراكتسياسى جەتەكشىسىنىڭ ورىنباسارى ا.بازارباەۆ ءوز سوزىندە زاڭدى قاراۋ بارىسىندا دەپۋتاتتىق كورپۋس وكىلدەرى مەن ۇكىمەت مۇشەلەرى بىرلەسىپ قوماقتى جۇمىستار اتقارعانىن, سونىمەن قاتار, فراكتسيا مۇشەلەرىنىڭ ارقاسىندا ۇكىمەت زاڭ قابىلدانعانعا دەيىن ونى ناقتى ىسكە اسىرۋ جونىندە ءىس-شارالار جوسپارى العاش رەت ازىرلەنگەنىن العا تارتتى. سوڭىندا مەملەكەتتىك ورگاندار مەن كۆازيمەملەكەتتىك سەكتور ۇيىمدارىنىڭ وكىلدەرى ۇسىنىس-پىكىرلەرىن ءبىلدىرىپ, قورىتىندىسى بويىنشا فراكتسيانىڭ قاۋلىسى قابىلداندى.
نۇرلىبەك دوسىباي,
«ەگەمەن قازاقستان»