مەملەكەت باسشىسى بۇل جولى دا مەكتەپتەر مەن ۋنيۆەرسيتەتتەردىڭ, تۇتاس ءبىلىم بەرۋدىڭ رولىنە ەرەكشە كوڭىل بولگەن. شىنتۋايتىندا, جوو-لار مەن مەكتەپتەر – جاس ۇرپاقتى العاش الەۋمەتتىك ورتاعا بەيىمدەيتىن, قوعامنىڭ تولىققاندى مۇشەسىنە اينالدىراتىن مەملەكەتتىك قۇرىلىم. ال جاستاردى دۇرىس جولعا سالۋ وتە ماڭىزدى. سەبەبى, البەرت ەينشتەين ايتقانداي, «ادامنىڭ دۇنيەتانىمىن قايتا وزگەرتكەننەن اتومدى ىدىراتقان وڭايىراق». جاستارمەن جۇمىس ىستەۋدە قاتەلىككە جول بەرمەۋگە ءتيىسپىز!
مەنىڭ مەكتەپ پەن جوعارى وقۋ ورىندارىنىڭ ماڭىزىنا توقتالىپ وتىرعان سەبەبىم, بۇل ۇلتتى تاربيەلەۋشى قۇرىلىم بولىپ تابىلادى. قازاقستاندىق ءبىرتەكتىلىكتىڭ رۋحاني ۇستىنى وسىعان بايلانىستى. دەمەك, ءبىلىم بەرۋ سالاسىنا, ونىڭ بارلىق قۇرىلىمدارىنا «وقىتۋ ارقىلى مىنەز ق ۇلىقتى قالىپتاستىرۋ» دەگەن باستى ءپرينتسيپتى قايتارعانىمىز ءجون.
ءبىزدىڭ ۋنيۆەرسيتەتىمىزدە «ءماڭگىلىك ەل قۇندىلىقتارى» ءپانى قاناتقاقتى جوبا رەتىندە ەنگىزىلگەن. ءبىز دۇرىس جولدامىز دەپ سانايمىن. سەبەبى, ەلباسى تۇجىرىمداماسىنىڭ استارىندا قازاق حالقىنىڭ مادەني كودى مەن قازاقستاندىق بىرتەكتىلىكتىڭ ماڭىزدى سيپاتى انىق اڭعارىلادى.
«ماڭگىلىك ەل» يدەياسى قازاق حالقىنىڭ سان عاسىرلىق ارمانىنا عانا ەمەس, قازىرگى قازاقستانداعى بارشا ەتنوستاردىڭ دامۋ ناتيجەسىنە دە نەگىزدەلگەن. قازاقستان – مەنىڭ رۋحىمنىڭ ناعىز وتانى. مەن وسى ەلدە ءومىر سۇرگەن جىلدار ىشىندە ونىڭ سۇلۋلىعى مەن بىرلىگىن ايقىن ءتۇسىندىم دەپ ايتا الامىن.
مادەنيەتتىڭ ءرولىن ارتتىرۋعا ەرەكشە كوڭىل ءبولگەن ءجون. سەبەبى, بارلىعى مادەنيەتتەن باستاۋ الادى. ەگەر مادەنيەتتى دامۋدىڭ ستراتەگيالىق رۋحاني رەسۋرسى دەپ قاراستىراتىن بولساق, وندا ەكونوميكاداعى, تەحنولوگياداعى, ءتىپتى ەتنوسارالىق قارىم-قاتىناستارداعى كوپتەگەن پروبلەمالار شەشىمىن تابادى دەپ سانايمىن. ەلباسى ۇدايى ايتىپ جۇرگەندەي, مادەنيەت دەگەنىمىز – اشۋ-ىزاعا, بەيبەرەكەتتىككە, ءبىزدىڭ ءومىرىمىزدىڭ بارلىق سالاسىنداعى ءتارتىپسىزدىكتەرگە قارسى تۇرا الاتىن قاسيەت.
بۇگىنگى تاڭدا تەلەديداردا, بارلىق بۇقارالىق اقپارات قۇرالدارىندا مەكتەپتەردە, ۋنيۆەرسيتەتتەردە, وتباسىلاردا جاستاردى ۇيات دەپ اتالاتىن رۋحاني نەگىز ارقىلى تاربيەلەگەن ءجون. ولاي دەيتىنىم, ۇيات ادامي ار-نامىستىڭ قورعانى عانا ەمەس, ول ءبىزدىڭ ءومىرىمىزدى باسقاراتىن كۇش.
تاعى ءبىر اتاپ وتەر جايت, ن.نازارباەۆ ادامي كاپيتالدىڭ رولىنە كەزەكتى مارتە ەل نازارىن اۋداردى. ەلباسىنىڭ ماقالاسىنان وتانى مەن ەلىن سۇيەتىن ازاماتتارعا دەگەن قامقورلىق سەزىلىپ تۇر. وسى ورايدا, ازاماتتاردىڭ بويىندا تۋعان ەلگە دەگەن شىنايى ماحاببات پەن پاتريوتتىق رۋحتى قالىپتاستىرۋ مەكتەبىنە اينالعان قازاقستان حالقى اسسامبلەياسىنىڭ ءرولى ەرەكشە دەپ ويلايمىن. قازاقستان حالقى اسسامبلەياسى ازاماتتارىمىزدى ءوز حالقىن سۇيۋگە, وتانىنا ادال بولۋعا تاربيەلەيدى.
اناتولي باشماكوۆ,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى قحا كافەدراسىنىڭ مەڭگەرۋشىسى