ۇكىمەت باسشىسىنىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ اگرارلىق سالانى مەملەكەتتىك قولداۋ باعىتىندا اتقارىلعان جۇمىستارعا توقتالدى. ناقتى ايتقاندا, باعدارلاما اياسىندا 8 باعىتتاعى سۋبسيديالاۋ ەرەجەلەرى قايتا قارالعان. سونداي-اق, سۋبسيديانىڭ ون ءبىر ءتۇرى الىنىپ, 39 سۋبسيديا تۇرىنە وزگەرىس ەنگىزىلگەن.
– بيىلدان باستاپ مەملەكەتتىك قولداۋعا قول جەتكىزۋشىلەردىڭ قاتارى 7,5 ەسەگە وسەدى. بۇل باعدارلاما تەتىكتەرىن جۇزەگە اسىرۋعا ەنگىزىلگەن بىرنەشە وزگەرىستەردەن كەيىن جۇزەگە اسىپ وتىر, – دەدى ا.مىرزاحمەتوۆ.
قارجىلاندىرۋدىڭ ناقتىلانۋى ايماقتارداعى مال بورداقىلاۋ الاڭدارىنىڭ سانىن ءۇش ەسەگە دەيىن كوبەيتۋگە جول اشپاق. بۇل ءوز كەزەگىندە ەلدەگى شارۋالاردىڭ قولىنداعى اسىل تۇقىمدى مال باسىنىڭ كوبەيۋىنە ىقپال ەتەدى. ال كووپەراتسيا مۇشەلەرىنە قاراستىرىلعان جەڭىلدىكتەر اۋىلدىڭ گۇلدەنۋىنە جول اشاتىن قادام رەتىندە باعالانۋدا. «كووپەراتسياعا ساتىلاتىن 1 باس ءىرى قارا ءۇشىن مەملەكەت قايتارىمسىز 20 مىڭ تەڭگە تاعى تولەمەك. سونداي-اق, 1 ليتر سۇتكە 10 تەڭگە, ءبىر باس ۋاق مالعا 1500 تەڭگە قوسىمشا قارجى بولىنەدى. بۇدان بولەك كووپەراتسياعا الىناتىن جەمنىڭ ءار تونناسىنا 20 مىڭ تەڭگە تولەۋ كوزدەلگەن. الايدا, بۇل كووپەراتسياعا بىرىكپەگەندەر مەملەكەتتىك قولداۋدان تىس قالادى دەگەن ءسوز ەمەس. قوراداعى مالى 30 باس ءىرى قارادان اساتىن شارۋا ساۋىلعان ءار ليتر سۇتكە 15 تەڭگەدەن, ال 400 باستان جوعارى مالى بار شارۋا ءسۇتتىڭ ءار ءليترىن 25 تەڭگەدەن سۋبسيديالاۋعا قول جەتكىزەدى», دەدى مينيستر.
اسىل تۇقىمدى ەشكى اسىراۋشىلار ءبىرىنشى رەت مەملەكەتتىك قولداۋعا يە بولماقشى. ءدال وسىنداي مۇمكىندىك بالىق شارۋاشىلىعى ءۇشىن دە تۋىپ وتىر. تاۋارلى بالىق وسىرۋشىلەرگە تۇڭعىش رەت سۋبسيديا تولەنەدى. ءتىپتى, بالىقتىڭ ۇرىعى, تاماعى, ونى قاداعالايتىن تەحنيكالارىنا دەيىن ينۆەستيتسيالىق سۋبسيديا قاراستىرىلعان. ياعني, بيىلدان باستاپ كووپەراتيۆكە بىرىككەن ۇجىم قاجەتتى تەحنيكا ساتىپ الار بولسا, كەتكەن شىعىننىڭ 50 پايىزىن مەملەكەت بىردەن وتەپ بەرمەك.
سۋبسيديالاۋعا قاتىستى تاعى ءبىر جاڭالىق – قارجىلاندىرۋ تەتىكتەرىنىڭ اۆتوماتتاندىرىلۋى. بۇل سىبايلاس جەمقورلىقتىڭ الدىن الۋ ماقساتىندا جاسالعان قادام. كەلەر جىلدان باستاپ اۋىل شارۋاشىلىعى سالاسىن قولداۋعا بولىنەتىن قارجى كوزدەرى ەلەكتروندى تاپسىرىس بەرۋ جۇيەسىنە كوشەتىن بولادى.
«اۋىل شارۋاشىلىعىن دامىتۋدىڭ 2017-2021 جىلدارعا ارنالعان باعدارلاماسىن» ەنگىزۋ بارىسىندا كوپتەگەن قۇجاتتارعا ءتۇزەتۋلەر جاسالعان. نورماتيۆتىك اكتىلەر وڭتايلاندىرىلىپ, 11 كودەكس پەن 25 زاڭ تارماعى وزگەرىپ, تولىقتىرىلدى.
جالپى, بۇل وزگەرتۋلەردىڭ اۋىلداعى شارۋاعا شاراپاتى ءتيىپ, جۇمىستىڭ جەڭىلدەرى ءسوزسىز.
قالماحانبەت مۇقامەتقالي,
«ەگەمەن قازاقستان»