«رەسمي ستاتيستيكاعا سۇيەنەتىن بولساق, مەكتەپ تۇلەكتەرىنىڭ 80 پايىزعا جۋىعىنىڭ دەنساۋلىقتارىندا ءتۇرلى اۋىتقۋلار بولسا, ءبىراز ءبولىگىنىڭ ءىشىمدىككە اۋەس ەكەنى, ال كەلەسى ءبىرەۋلەرىنىڭ ەسىرتكى مەن تەمەكىگە تاۋەلدى ەكەنى انىقتالعان. بۇل – الەۋمەتتىك-ەكونوميكالىق قيىندىقتاردىڭ عانا ەمەس, سونىمەن قاتار, جاستاردىڭ بوس ۋاقىتىن ۇيىمداستىرا الماي, التىن ۋاقىتتارىن ەرىگۋمەن ءوتكىزىپ, سالاماتتى ءومىر سالتىن ۇستانباۋىنىڭ سالدارى. بۇگىندە دەرەككوزدەردىڭ ماعلۇماتى بويىنشا جاستارىمىزدىڭ 30 پايىزعا جەتەر-جەتپەس بولىگى عانا دەنە شىنىقتىرۋ ءجانە سپورتپەن تۇراقتى اينالىسسا, دامىعان مەملەكەتتەردە بۇل كورسەتكىشى 70 پايىزدى قۇرايدى ەكەن.
وسى ورايدا, 2012 جىلدىڭ ءوزىندە ەلباسى «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» باعدارلاماسىندا: «ەگەر ءبىز قازاقستانداعى ءومىر جاسى ەۋروپاداعىداي بولعانىن قالاساق, وندا ءوزىمىزدىڭ دەنساۋلىعىمىز تۋرالى ويلانۋعا ءتيىسپىز. ءاربىر ەلدى مەكەندە, سونىڭ ىشىندە اۋىلدىق جەرلەردە, سونداي-اق, ءاربىر مەكەمەدە بەلسەندى دەمالىستى, دەنە تاربيەسى مەن بۇقارالىق سپورتتى دامىتۋ ءۇشىن بىرتە-بىرتە جاعداي جاساۋ ءجون. ەلدىڭ وقۋ ورىندارىندا دەنە تاربيەسىنىڭ وقۋدان تىس ساباقتارى مەن سەكتسيالارىن كەڭەيتۋ كەرەك», – دەپ اتاپ وتكەن بولاتىن.
ۇكىمەتتىڭ 2007 جىلعى 29 جەلتوقسانداعى قاۋلىسىنا سايكەس, دەنەشىنىقتىرۋ مۇعالىمدەرى ساباقتان تىس سەكتسيالار جۇرگىزگەنى ءۇشىن ايىنا 7 مىڭ تەڭگەدەن ءسال عانا استام ءۇستەمە اقى الاتىن ەدى. ونىڭ ءوزى دە ءبىلىم بەرۋ مەكەمەلەرىنىڭ تەك جارتىسىن عانا قامتيتىن. بۇل كولگە تامعان كوزدىڭ جاسىنداي از عانا تيىن-تەبەن قانداي ماماننىڭ قاي جىرتىعىنا جاماۋ بولادى. ەگەر وقۋشىلاردىڭ قالىپتى جاتتىعۋى جۇماسىنا ءۇش رەت بولادى دەپ ەسەپتەسەك, ءبىر ساباعى ءۇشىن جاتتىقتىرۋشى 583 تەڭگە الادى ەكەن. وسى بولماشى قاراجات كۇندە, ءۇش ساعاتقا جۋىق ساباقتان تىس جۇمىس ىستەۋگە, كۇش قۋاتى بويىندا, وتباسىن اسىراپ وتىرعان ازاماتتى قىزىقتىرا ما دەگەن سۇراق تۋا-
دى. ەستەرىڭىزگە سالا كەتەيىن, بۇگىندە ءبىر بالانىڭ ءبىر ساعاتتىق رەپەتيتسياسى 2000 تەڭگە كولەمىندە بولسا, كاسىبي ءبىر جاتتىعۋ قۇنى 5000 تەڭگەدەن باستالادى.
انىعىندا, بىزگە ءوز سەنىمسىزدىگىن جەڭە الاتىن, اششى تەردى توگە بىلەتىن, سىناقتاردان سىنباي وتەتىن جاستار كەرەك. ال وعان جول اشاتىن جەر, ەلباسى اتاپ وتكەندەي, مەكتەپ سپورتى. وسىعان بايلانىستى, جوعارىدا ايتىلعانداي, ارادا باقانداي 5 جىل ۋاقىت وتسە دە, وسكەلەڭ ۇرپاق دەنساۋلىعىنىڭ قوعامدى الاڭداتار تۇستارىن ەسكەرە وتىرىپ, ۇكىمەتتىڭ «2012 جىلدىڭ سوڭىنا دەيىن وقۋشىلار ءۇشىن وقۋدان تىس سپورت سەكتسيالارىن بيۋدجەتتىك ەمەس قارجى كوزدەرىنەن قارجىلاندىرۋدىڭ تەتىكتەرىن ەنگىزۋدى قامتاماسىز ەتسىن» دەگەن ەلباسىنىڭ تاپسىرماسىنا قايتىپ ورالۋىن سۇرايمىز».