قۇرىلتايدا قازاق پەن-كلۋبىنىڭ پرەزيدەنتى بيگەلدى عابدۋللين ۇيىمنىڭ وتكەن جىلعى جۇمىسى تۋرالى ەسەپ بەردى. ءاسىرەسە, شەتەلدە ادەبي اۋدارمانى ۇيىمداستىرۋ ورايىندا ءبىرشاما ىلكىمدى ىستەر اتقارىلعان ەكەن. بۇل جۇمىسقا العاش رەت امەريكالىق جانە اعىلشىندىق كاسىبي ءتارجىماشىلار تارتىلىپتى.
ءسويتىپ, قازاق پەن-كلۋبىنىڭ تاپسىرىسى بويىنشا نيۋ-يوركتەگى مەتروپوليتەن كلاسسيك باسپاسىنان وتكەن جىلى ولجاس سۇلەيمەنوۆتىڭ «ءسوز كىلتى», سماعۇل ەلۋباەۆتىڭ «اق بوز ءۇيى», ءابىش كەكىلباەۆتىڭ «اڭىزدىڭ اقىرى» كىتاپتارى اعىلشىن تىلىنە اۋدارىلىپ, جارىق كورگەن. بۇل يگىلىكتى ىسكە كاترين فيتتسپاتريك, مارينا ۆلادي, يحار كوزاك سىندى بىلىكتى ءتارجىماشىلار بىلەك سىبانا كىرىسىپ, ءوز ۇلەستەرىن قوسقاندىعى دا نازاردان تىس قالمادى.
ءبىر ايتارلىعى, وسىناۋ ءاربىر كىتاپ تانىستىرىلىم ءۇشىن كادەسىيلىق سيپاتتا 300 دانادان باسىلىپ, سونداي-اق ينتەرنەت-الاڭدا ورنالاستىرىلعان. ءسويتىپ, بۇل ارادا كىتاپتى Amazon, Barnes&Noble, Ingram ارقىلى الەمنىڭ كەز كەلگەن تۇكپىرىنەن ساتىپ الۋعا بولادى. كىتاپتار تاپسىرىس بەرۋشىنىڭ قالاۋى بويىنشا, جۇمساق مۇقابالى نۇسقادا دا, سونداي-اق ەلەكتروندى پىشىمدە دە جىبەرىلە بەرەدى. تانىستىرىلىمدىق دانالار اقش-تىڭ ءىرى كىتاپحانالارىنا, ەلىمىزدىڭ مادەنيەتى مەن ءتىلى وقىتىلاتىن ۋنيۆەرسيتەتتەر مەن كوللەدجدەرگە, ورتالىق باسپالارعا, اقش-تاعى قازاقستان ەلشىلىگىنە جانە قازاقستان رەسپۋبليكاسىنىڭ بۇۇ-داعى وكىلدىگىنە تاراتىلىپ بەرىلگەنى دە قۇبا-قۇپ.
اتالمىش كىتاپتار 2016 جىلدىڭ قىركۇيەك-قازان ايلارىندا گاليتسيادا (يسپانيا) حالىقارالىق پەن وتىرىستارىندا جانە فرانكفۋرتتەگى كىتاپ جارمەڭكەسىندە تانىستىرىلىپ, تالعامپاز قاۋىمعا كوزايىم ەتىلگەن بولاتىن. العاشقى ءپىكىرلەردەن-اق بۇل كىتاپتاردىڭ الەم وقىرمانىنا ۇناي باستاعانىن بايقاعاندايمىز. باسپا رەتسەنزەنتىنىڭ و.سۇلەيمەنوۆتىڭ كىتابىنا بەرگەن باعاسى بارشامىزعا مەرەي. ال «اڭىزدىڭ اقىرى» رومانى تۋرالى امەريكالىق سىنشىنىڭ عاجاپ پىكىرىن ءابىش اعانىڭ ەستي الماي كەتكەنى قانداي وكىنىشتى دەسەڭىزشى!
ينتەرنەت-پورتال ارقىلى كىتاپ ساتۋ باستالىپ تا كەتىپتى. وسى رەتتە وتكەن جىلدىڭ قاراشاسىندا سماعۇل ەلۋباەۆتىڭ كىتابى امازوندا «اپتا كىتابى» دەپ تانىلۋى قازاق جازۋشىلارىنىڭ مۇحيتتىڭ ار جاعىنداعى الەۋەتىن ايقىن اڭداتقانداي.
سونداي-اق, 2016 جىلى ورىس جانە قازاق تىلدەرىندە جاس قازاقستاندىق پروزاشىلاردىڭ قوس تومدىعى شىعارىلعان. قازاق پەن-كلۋبىنىڭ دەلەگاتسياسى بىرقاتار حالىقارالىق ءىس-شارالارعا قاتىسقان.
قۇرىلتايدا فارحات تامەنداروۆ پەن نۇرتورە ءجۇسىپ قازاق پەن-كلۋبىنىڭ ۆيتسە-پرەزيدەنتتەرى بولىپ سايلاندى. سونىمەن قاتار, كانادالىق Mosaic Press باسپاسىمەن كەلىسىمگە قول قويىلعاندىعى جاريا ەتىلدى. ءسويتىپ, «ءبىز – قازاقتار...» سەرياسىمەن كىتاپ شىعارۋ جونىندەگى جۇمىس جالعاسىن تاپپاق. بۇل جوبا اياسىندا وتاندىق اۆتورلاردىڭ تاڭداۋلى شىعارمالارى اعىلشىن تىلىنە اۋدارىلىپ, اقش پەن ۇلىبريتانيادا جارىق كورمەك. وسى ورايدا سوڭعى تۇساۋى كەسىلگەن كىتاپتاردىڭ ءبىرى گەرولد بەلگەردىڭ تاڭدامالىسى ەكەندىگىن ايتقان ءلازىم.
قورعانبەك امانجول,
«ەگەمەن قازاقستان»