– جىل سايىن وتكىزىلىپ تۇراتىن كورمەگە رەسەيلىكتەر بەلسەندى اتسالىسادى, ال ءوزىمىزدىڭ قازاقستاننىڭ دا ءار وبلىسىندا يت اسىرايتىندار جەتكىلىكتى, بىراق وسىنداي باسقوسۋلارعا ولار كەلە بەرمەيدى. بۇل جولى جەرگىلىكتى قوستاناي مەن رۋدنىي قالالارىنداعى اۋەسقويلاردىڭ قاتىسۋىن ايتپاعاندا, استانادان 4 يت, كوكشەتاۋدان 3 يت كورمەگە قاتىسىپ وتىر, – دەيدى كورمەنى ۇيىمداستىرعان «كانيس-پروفي» يتتەردىڭ اسىل تۇقىمىن ءوسىرۋ جانە ۇيرەتۋ ورتالىعىنىڭ كينولوگى يۋليا گولسكايا.
كۇنى بويى وتكەن كورمەگە كەلۋشىلەر رەسەيدەن كەلگەن ءيتتىڭ «ساموەدى», كوكشەتاۋدان كەلگەن «مالامۋت» تۇقىمدارىن ەرەكشە قىزىقتادى. «ساموەدى» ءيتىنىڭ ءجۇنى اپپاق ءتۇبىت سەكىلدى ۇلپىلدەپ تۇرادى, كادىمگى بالالاردىڭ جۇمساق ويىنشىعىنا وتە ۇقسايدى, سونداي سۇيكىمدىلىگىمەن بىردەن كوزگە ءتۇستى. ال كوكشەتاۋلىق «مالامۋت» كادىمگى ءتۇز تاعىسى ءبورىنى ەسكە سالادى ەكەن. كورمەنى قىزىقتاي كەلگەن ەر بالالار سونى اينالشىقتاۋمەن بولدى.
كورمەگە قاتىسقان يتتەردى الماتىدان ارنايى شاقىرتىلعان حالىقارالىق دارەجەدەگى ساراپشى مارك زاتۋرينسكي ساراپتادى. يت ءوسىرۋ اۋەسقويلارىنىڭ, كورەرمەندەردىڭ ءتۇرلى پىكىرى دە ەسەپكە الىندى. قورىتا كەلە, كورمەنىڭ تورىنە «نەمىس وۆچاركاسى» شىقتى. ەكىنشى ورىندى «ورتا ازيا وۆچاركاسى», ءۇشىنشى ورىندى «اكيتا» دەگەن جاپوندىق تۇقىم الدى.
ايتپاقشى, وسى جولى «كانيس-پروفي» يتتەردىڭ اسىل تۇقىمىن ءوسىرۋ جانە ۇيرەتۋ ورتالىعى «ورتا ازيا وۆچاركاسى» يتتەرىنىڭ كورمەسىن جەكە وتكىزدى. وعان رەسەي مەن قازاقستاننان 20 يت قاتىستى. جۇلدەلى ورىن رەسەيلىكتەردىڭ جەتەگىندە كەتتى.
ءنازيرا جارىمبەتوۆا, «ەگەمەن قازاقستان» قوستاناي