ءماجىلىس توراعاسى نۇرلان نىعماتۋلين جەتەكشىلىك ەتكەن جيىندا ەلىمىزدىڭ ەنەرگەتيكا سالاسىن رەتتەۋدى كوزدەيتىن زاڭ جوباسىن ەنەرگەتيكا ءمينيسترى قانات بوزىمباەۆ تانىستىردى. بايانداما الدىندا ايتقان العىسوزىندە ءماجىلىس توراعاسى اتالعان زاڭ جوباسى مەملەكەت باسشىسى جاريالاعان ۇلت جوسپارىنىڭ 51-قادامىن ورىنداۋ ماقساتىندا ازىرلەنگەندىگىن تىلگە تيەك ەتتى.
«بۇل سالاداعى ءتۇيىندى تارقاتۋ تەتىگى ەكى جۇيەگە نەگىزدەلگەن دەسەك, ونىڭ ءبىرى – ەنەرگيا جەتكىزۋشى ۇيىمداردى ىرىلەندىرۋ دە, ەكىنشىسى – ەلەكتر ەنەرگياسىن ءتومەن تاريفپەن تۇرعىندارعا تاراتۋ بولىپ وتىر. وسى ورايدا جوعارىدا اتالعان ەكى جۇيەنىڭ العاشقىسىن قولدانىستاعى زاڭىمىز رەتتەي الماعانىن اشىق ايتۋىمىز كەرەك. ەگەر زاڭ جوباسىن جاساۋشى مۇددەلى مەكەمەلەر مەن تاراپتار اراسىندا قىزۋ ارىپتەستىك ورناعان بولسا, ساپالى زاڭ دايىندالادى. ونىڭ قاراپايىم عانا كورىنىسى سالاداعى دەلدالداردىڭ ازدىعىنان جانە ءتاريفتىڭ تومەندىگىنەن بايقالادى. ءبىز قازىرگى كۇردەلى ماسەلەنى وسىنداي قاراپايىم عانا فورمۋلامەن شەشۋگە ءتيىسپىز», – دەدى ن.نىعماتۋلين.
سودان كەيىن ءسوز العان ەنەرگەتيكا ءمينيسترى ق.بوزىمباەۆ زاڭ جوباسىنىڭ تۇجىرىمداماسى ەنەرگيا جەتكىزۋشى كومپانيالاردى ىرىلەندىرۋگە باعىتتالعاندىعىن اتاپ ءوتتى. ونىڭ ءتۇسىندىرۋىنشە, مۇنداي قادام ەنەرگيامەن جابدىقتاۋدىڭ سەنىمدىلىگىن ارتتىرۋعا جانە ەلەكتر ەنەرگياسىن بەرۋ شىعىندارىن ازايتۋعا ءمۇمكىندىك بەرەدى. سونداي-اق, مينيستر بۇل زاڭ جوباسىنىڭ جەرگىلىكتى اتقارۋشى ورگانداردىڭ ۇسىنعان مالىمەتتەرىنە سايكەس, وڭىرلەردە 2 110 شاقىرىمعا سوزىلاتىن قاراۋسىز قالعان جەلى مەن 631 يەسىز ترانسفورماتورلىق قوسالقى ستانسالاردىڭ ماسەلەسىن شەشۋدى كوزدەيتىنىن جەتكىزدى.
«بۇل زاڭ جوباسىنىڭ ماڭىزدى قىرى بولىپ تابىلادى. اتالعان جەلى ساناتتارىن ەنەرگيا جەتكىزۋشى ۇيىمداردىڭ بالانسىنا بەرۋ مەن ولاردى ءتيىستى دەڭگەيدە كۇتىپ, ۇستالۋىن جانە ساپالى قىزمەت كورسەتىلۋىن ۇيىمداستىرۋ كوزدەلۋدە. سونىمەن قاتار, قۇجات اياسىندا ەنەرگيا جەتكىزۋشى ۇيىمداردى ءىرىلەندىرۋگە ىنتالاندىراتىن نەگىزگى تەتىك ەلەكتر ەنەرگياسىن بەرۋ قىزمەتىنە تالاپتار بەلگىلەۋ. ال ونداي جۇيەنى كەزەڭ-كەزەڭىمەن ەنگىزۋ ۇسىنىلادى. ايتالىق, ەگەر ەنەرگيا جەتكىزۋشى ۇيىم يەسىز قالعان ەلەكتر جەلىلەرىن قابىلداعان جاعدايدا كورپوراتيۆتىك تابىس سالىعى مەن م ۇلىك سالىعىنان بوساتىلادى جانە تابيعي مونوپوليالار سالاسىنداعى زاڭنامادا كوزدەلگەن تىيىم سالۋ الىپ تاستالادى», – دەدى ق.بوزىمباەۆ.
ءمينيستردىڭ بايانداۋىنشا, ماسەلەنى شەشۋدىڭ باستى جولى رەتىندە جەلىلەردى ءتۇگەندەۋدەن وتكىزۋ قاراستىرىلۋدا. بۇل ءۇشىن زاڭ اياسىندا جەرگىلىكتى اتقارۋشى ورگاندار سوت ارقىلى يەسىز قالعان وبەكتىلەردى ءوز بالانسىنا الىپ, ودان كەيىن ءوڭىرلىك جەلىلىك كومپانيالاردىڭ بالانسىنا بەرەدى. سونداي-اق, زاڭ جوباسىندا ەلەكتر ەنەرگياسىن بەرۋ قىزمەتىنە قويىلاتىن تالاپتاردى ساقتاماعانى ءۇشىن جاۋاپتىلىق بەلگىلەۋ, ەرەكشە پايدالانۋ شارتتارى بار ەلەكتر جەلىلەرىنىڭ كۇزەت ايماعىن ايقىنداۋ, تۇرعىن ءۇي كەشەندەرىن سالۋشىلاردىڭ بالانسىنداعى ەلەكتر جەلىلەرىن مامانداندىرىلعان ەنەرگيا جەتكىزۋشى ۇيىمدارعا بەرۋ ءراسىمى مەن ونىڭ ءتارتىبىن ناقتىلاۋ جانە ەنەرگەتيكالىق ۇيىمداردى ىرىلەندىرۋگە نەمەسە بىرىكتىرۋگە ىنتالاندىرۋدىڭ تەتىكتەرىن كەڭەيتۋدى كوزدەيتىن تۇزەتۋلەر ەنگىزىلگەن.
جالپى وتىرىستا حالىق قالاۋلىلارى تاراپىنان وڭ باعاسىن العان قۇجاتتىڭ ءبىرى – «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زياتكەرلىك مەنشىك cالاسىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بولدى. اتالعان تاقىرىپتا بايانداما جاساعان ادىلەت ءمينيسترى مارات بەكەتاەۆ قۇجات ەلىمىزدىڭ دۇنيەجۇزىلىك ساۋدا ۇيىمىنا جانە ەۋرازيالىق ەكونوميكالىق وداققا ءمۇشەلىككە كىرۋىنە وراي, قازاقستان مەن ەكونوميكالىق ىنتىماقتاستىق جانە دامۋ ۇيىمى ەلدەرىنىڭ پاتەنتتىك زاڭناماسىن ۇيلەستىرۋگە باعىتتالعاندىعىن اتادى. سونىمەن قاتار, زاڭ جوباسى ساراپتاما ۇيىمى مەن اۆتورلىق قۇقىقتاردى ۇجىمدىق باسقارۋ جونىندەگى ۇيىمدار قىزمەتىنىڭ اشىقتىعىن ارتتىرۋدى جانە زياتكەرلىك مەنشىك وبەكتىلەرىنە قۇقىقتاردى قورعاۋ مەن ساقتاۋ ءۇردىستەرىن جەتىلدىرۋدى كوزدەيدى.
جالپى, ەل ەكونوميكاسىن جەدەلدەتىلگەن تەحنولوگيالىق جاڭعىرتۋ ماقساتىندا يننوۆاتسيانى ءوندىرىستە قولدانۋ اسا وزەكتى ەكەندىگىن ەسكەرتكەن ءماجىلىس توراعاسى مەملەكەت باسشىسى ءوز ءمالىمدەمەلەرى ارقىلى عىلىمي ازىرلەمەلەردەن پراكتيكالىق تيىمدىلىككە جەتۋدى مىندەتتەپ وتىرعاندىعىن دا جەتكىزدى.
«ال وتاندىق بيزنەس وسى ازىرلەمەلەردىڭ نەگىزىندە باسەكەگە قابىلەتتى ءونىمدەردى نارىققا شىعارۋى كەرەك. يننوۆاتسيالىق جاڭالىقتاردى وندىرىستە قولدانۋ ەلباسى جولداۋىندا ايتىلعان ەكونوميكانى جەدەلدەتىلگەن تەحنولوگيالىق جاڭعىرتۋدى جۇزەگە اسىرۋعا مۇمكىندىك بەرەدى», – دەدى ن.نىعماتۋلين.
ءماجىلىس دەپۋتاتتارى وسى كۇنى الەۋمەتتىك قامسىزداندىرۋ ماسەلەلەرىنە ارنالعان, سونىمەن بىرگە بالانىڭ قۇقىقتارىن قورعاۋ جونىندەگى فۋنكتسيالاردى جۇزەگە اسىراتىن ۇيىمداردىڭ قىزمەتتىك ماسەلەلەرى بويىنشا ماڭىزدى زاڭ جوبالارىن جۇمىسقا قابىلدادى. وتىرىس سوڭىندا بىرقاتار حالىق قالاۋلىلارى ءتيىستى مەملەكەتتىك ورگاندار باسشىلارىنا دەپۋتاتتىق ساۋالدارىن جولدادى.
نۇرلىبەك دوسىباي,
«ەگەمەن قازاقستان»