جەمىس اعاشتارى تولەبي اۋدانى, اباي اۋىلىنداعى 150 وتباسىعا تەگىن تاراتىلدى. بۇل ىسكە اۋدان اكىمدىگى مەن جەرگىلىكتى كاسىپكەر, وبلىستىق ءماسليحاتتىڭ دەپۋتاتى اسەت قايىپبەكوۆ مۇرىندىق بولدى. سونداي-اق اتالعان اۋىلدا وبلىس اكىمىنىڭ «شاتقال» باعدارلاماسى اياسىندا اۋماعى 1 شاقىرىمدى قۇرايتىن سايعا ارىق تارتىلىپ, اعاش كوشەتتەرى وتىرعىزىلدى.
جالپى, كەمەقالعان اۋىل وكرۋگىندە 5 مىڭعا تارتا تۇرعىن بار. نەگىزگى كاسىبى – مال شارۋاشىلىعى. تابيعاتى اسەم وكرۋگتىڭ كليماتى جەمىس اعاشتارىن وتىرعىزۋعا وتە قولايلى. سوندىقتان وكرۋگ تۇرعىندارىنا 10 مىڭ ءتۇپ جەمىس اعاشتارىنىڭ كوشەتتەرىن دەمەۋشى ءوز قارجىسىنا ساتىپ الىپ, سىيعا تارتتى.
«بۇگىنگى جاسالىنىپ وتىرعان شارا – تولەبي اۋدانىنىڭ دامۋ كونتسەپتسياسىندا كورسەتىلگەن تارماقتىڭ ءبىرى. ءبىز الداعى ۋاقىتتا دەمەۋشىلەر تارتۋ ارقىلى اۋدانىمىزداعى 14 اۋىل وكرۋگىنە قاراستى 150-گە جۋىق ەلدىمەكەندى كوگالداندىرۋ ىسىمەن اينالىسپاقشىمىز. ءار وتباسى اۋلاسىنداعى ەسكىرگەن تال-داراقتاردى الىپ تاستاپ, ورنىنا جاڭا جەمىس كوشەتتەرىن وتىرعىزۋى ءتيىس. بۇگىنگى جەمىس كوشەتتەرى الداعى ءبىر-ەكى جىلدا ءوز جەمىسىن بەرەتىن بولادى», - دەدى تولەبي اۋدانىنىڭ اكىمى بۇقارباي پارمانوۆ.
بۇدان بولەك, اۋدان اكىمدىگى مال شارۋاشىلىعىمەن اينالىسقىسى كەلەتىن ازاماتتاردىڭ نەسيە الۋىنا كومەك بەرۋ ءىسىن قولعا الىپتى. ناتيجەسىندە اباي اۋىلىنىڭ تۇرعىنى ءدارىباي تاسبولاتوۆ 6 پايىزبەن 3 ملن. تەڭگە كرەديتكە قول جەتكىزىپ, 15 جىلقى ساتىپ العان. ايىنا نەبارى 17 مىڭ تەڭگە نەسيە تولەيدى. 3 بالانىڭ اكەسى بۇعان دەيىن جۇمىسسىز ءجۇرىپتى. الداعى جوسپارى – مال باسىن كوبەيتىپ, اۋىلدان كووپەراتيۆ قۇرۋ.
اۋدان اكىمدىگى تەگىن ۇلەستىرىلگەن كوشەتتىڭ 300 داناسىن ءدارىبايدىڭ اۋلاسىنا دا اسارلاتىپ وتىرعىزىپ بەردى.
«اۋدان اكىمدىگى مەن جەرگىلىكتى كاسىپكەر اسەت قايىپبەكوۆ ىنىمىزگە العىسىمىز شەكسىز. اۋدان باسشىلىعى جەكە جوبامىزعا قولداۋ ءبىلدىرىپ, نەسيە الۋىمىزعا قول ۇشىن بەرسە, بۇگىن مىنە, اۋلامىزعا 300 دانا جەمىس اعاشتارىن وتىرعىزىپ جاتىر. ەندى وسى جەمىس اعاشتارىنىڭ دۇرىس ءوسىپ جەتىلۋىنە جاۋاپتى بولىپ, جەمىسىن الۋعا تىرىسامىز» , - دەدى ءدارىباي تاسبولاتوۆ.