باقوردا ءھام باقىتتى جاستار

تۋىندىنىڭ وزەگىنە ارقاۋ بولعان دۇنيە – قازىرگى ەلوردا­لىق جاستار ءومىرى. ياعني, جاڭا ءداۋىر, جاسامپاز بولاشاققا قادام باسقان ەركىن ەلدىڭ ەرىكتى ۇل-قىز­دارى... جۇزىنەن كۇلكى شۋا­­عى توگىلگەن باياندى ۇرپاق... بول­­جامسىز عۇمىردىڭ جىبەك جەلىن­دەي ماحاببات... ءداۋىر­دىڭ دۋماندى داۋىلىمەن جارىسا بوي كوتەرىپ, تاڭ نۇرىنا بويالعان اسەم قالا – استانا...  ميۋزيكلدىڭ مازمۇنى وسىلاي ورىلەدى.

جالپى, ميۋزيكلدىڭ ەرەكشەلىگى – دراما, سپەكتاكل, وپەرا, ەسترادا جانرى, ۆودەۆيل تاعى نە بار, بارلىق تيپتىك ونەر اتاۋلىنىڭ باسى ءبىر قازانعا توعىسىپ, ءبىرىن-ءبىرى تولىقتىرا وتىرىپ, ءبىر ۇيلەسىممەن كورەرمەنگە جول تارتاتىن تۋىندى. وسى سالا مامان­دارىنىڭ ايتۋىنا قا­راعاندا, ميۋزيكل جانرى ەلىمىزدە كەڭ ەتەك جايا قويماعان. ەندى-ەندى دامىپ جاتىر.

ميۋزيكلدىڭ اتاسى – ەۋ­روپا. ارعى جاعى كونە گرەك ءداۋىرى­نەن باس­تاۋ الادى. بۇگىندە «وح­لاحوما» (ر.رودجەرس پەن و.حام­مەرستاين), «مويا پرەكراس­نايا لەدي» (ب.شوۋ), «ۆول­شەبنايا فلەي­تا» (موتسارت), «تي­ل» (گ.گلادكوۆ) ت.ب. تۋىن­دىلار الەمدىك كلاسسيكا ەسە­بىندە تانىلعان.

ءبىر ەسەپتەن ميۋزيكلدى ورتاق, ياعني ۇجىمدىق تۋىندى دەسە دە بولادى. ويتكەنى, اتالمىش تۋىندىنىڭ ءتورت اياعى تەڭ جورعالاۋ ءۇشىن – سازگەر, اقىن, دراماتۋرگ, رەجيسسەر, بالەتمەيستەر, پروديۋسەر, جارىق بەرۋشى, دىبىس وڭدەۋشى ت.ب. شىعارماشىلىق يەلەرىنىڭ تەرى ءبىر قازاندا قايناۋى ءتيىس.

وسىنداي كۇردەلى سينتەزدى-سينكرەتتىك تۋىندىنىڭ العاش رەت ەلوردا تورىندە, قازاق ءۇوۋ زالىندا ساحنالانۋى ۇلكەن جەتىستىك. كۇردەلى قويىلىمدى  اۆتورلار ءتورت اي بويى ۇيقى-كۇلكى كورمەي دايىنداعان ەكەن. تەك وسى ميۋزيكل ءۇشىن جاڭادان 20 ءان جازىلعان. دايىن بولعان شىعارمانى ساحنالاۋعا كەلگەندە, تەاترلار قارجىلىق قيىن­شىلىققا  بايلانىستى باس تارتقان. بىراق, قازاق ءۇوۋ-ءنىڭ «ەسترادا ونەرى» كافەدراسىنىڭ مەڭگەرۋشى مايرا داۋلەتباق حانىم ءوز ستۋدەنتتەرىنىڭ كۇشىمەن تۋىندىنى جارىققا شىعارۋعا تاۋەكەل ەتكەن.

ءسويتىپ, «باقوردا» ميۋزيكلى (ليبرەتتوسىن جازعان – جۇپار قوجاق) دۇنيە ەسىگىن اشتى. شىعارمانى سومداۋعا قاتىسقان ستۋدەنتتەر شىعارمانىڭ ىشكى مازمۇن-سيپاتىن اشا الدى. وقيعانىڭ ءاۋ باسىندا اۋىلدان استاناعا قوناققا كەلگەن توميريس قىزدى ۆوكزالدان كۇتىپ العان ەكى ازامات (رولدەردە – اڭسار مەن دارحان) وعان اسەم استانانى تاماشالاتادى. وسى جەردە ءبىر ادەمى ديالوگ بار. دوستارى ايتقان, «ءبىز سەنى قورعاپ-قولداپ قىدىرتامىز» دەگەن لەپىسىنە توميريس: – قىزعا قورعان بولعان جىگىت – ەلگە دە, ايبىن بولماي ما؟ – دەپ ۇتىمدى ءۋاجىسىن كولدەنەڭ تاستايدى. شىعارمانىڭ ءتۇيىنى دە وسى لەپىسكە بايلانىپ تۇر.

بەكەن قايرات ۇلى,

«ەگەمەن قازاقستان»

ەرلان وماروۆ,

«ەگەمەن قازاقستان»