بۇل ماقالادا زامانىمىزدىڭ زاڭعار جازۋشىسى مۇحتار اۋەزوۆتىڭ جاس كەزىندە «يارىش» كومانداسىندا ويناعانى تۋرالى ايتىلعان. وسى ماقالا شىعىسىمەن سەمەي ءوڭىرىنىڭ ارداگەر سپورتشىلارى, سپورتسۇيەر قاۋىم وكىلدەرى تەلەفون شالىپ, جىلى لەبىزدەرىن ءبىلدىرىستى. مۇنىڭ دا وزىندىك سەبەبى بار: بيىل ۇلى جازۋشى, «اباي جولى» رومان-ەپوپەياسىنىڭ اۆتورى مۇحتار اۋەزوۆتىڭ تۋعانىنا 120 جىل تولىپ وتىر. ماقالادا جازۋشىنى تاعى ءبىر قىرىنان كورسەتۋ – تۇلعاعا دەگەن ۇلى قۇرمەت, دەستى اقساقالدار قاۋىمى.
– سوڭعى كەزدەرى «ەگەمەن قازاقستان» گازەتىنىڭ سپورت بەتى ەرەكشە جاندانىپ, حالىقتىڭ سالاماتتى ءومىر سالتىنا دەگەن قىزىعۋشىلىعىن ارتتىرىپ وتىر, – دەدى وسى ماقالا تۋرالى العاش حابارلاسىپ, ءوزىنىڭ وي-پىكىرىمەن بولىسكەن سەمەي قالالىق ىشكى ساياسات ءبولىمىنىڭ باستىعى ايدار سادىرباەۆ. – اسىرەسە, الماتى قالاسىنداعى تىلشىلەر قوسىنىنىڭ مەڭگەرۋشىسى تالعات ءسۇيىنبايدىڭ جانە تاعى باسقا دا جۋرناليستەردىڭ XXVIII دۇنيەجۇزىلىك قىسقى ۋنيۆەرسيادا كەزىندەگى بەرىلگەن تىكەلەي رەپورتاجدارى كوڭىلىمىزدەن شىقتى. ال «يارىش – قازاق فۋتبولىنىڭ قارلىعاشى» اتتى ماقالاعا ءبىزدىڭ قوسارىمىز: سەمەي قالاسىنىڭ اكىمدىگى 2013 جىلى «قازاقستان فۋتبولىنا – 100 جىل» مەرەيتويلىق مەدال شىعارىپ, ونى سپورت ارداگەرلەرىنە, قازاقتان شىققان, ەل نامىسىن قورعاعان, بايراقتى باسەكەلەردە كوك تۋىمىزدى جەلبىرەتكەن سپورتشىلارىمىزعا تابىس ەتكەن بولاتىن. بارشا حالىقتى وسىنداي يگى ىستەرىمىزدىڭ بار ەكەندىگىن ەل گازەتى «ەگەمەن قازاقستان» ارقىلى حاباردار ەتكىمىز كەلەدى.
ايتا كەتەتىن جايت, «يارىش» فۋتبول كومانداسىنىڭ 100 جىل بۇرىنعى توسبەلگىسى تاريحي جادىگەر رەتىندە سەمەي قالاسىنداعى تاتار مادەني ورتالىعىنىڭ مۇراجاي بۇرىشىندا ساقتاۋلى تۇر.
راۋشان نۇعمانبەكوۆا,
جۋرناليست
سەمەي