ورتالىق كوممۋنيكاتسيالار قىزمەتىندە وتكەن بريفينگ بارىسىندا ءبىلىم جانە عىلىم ۆيتسە-مينيسترى ە.سۋحانبەرديەۆا كوميسسيا جۇمىسىنىڭ وبەكتيۆتىلىگىن جانە اشىقتىعىن قامتاماسىز ەتۋ ماقساتىندا كوميسسيالار قۇرامى اناعۇرلىم كەڭەيتىلىپ, نىعايتىلعانىن اتاپ ءوتتى.
«17 پاندىك كوميسسيا قۇرىلدى جانە ولاردىڭ قۇرامىندا ءبىلىم بەرۋ سالاسىنىڭ 126 بىلىكتى مامانى بولدى. سونىمەن قاتار, كوميسسيا قۇرامىنا پارلامەنت ءماجىلىسىنىڭ دەپۋتاتتارى, ۇكىمەتتىك ەمەس ۇيىمداردىڭ وكىلدەرى دە ەندى. كوميسسيالاردىڭ قاراۋىنا مەكتەپكە دەيىنگى تاربيە جانە وقىتۋ دەڭگەيىنە ارنالعان وقۋ ءادەبيەتتەرىنىڭ 1010 اتالىمى,
2, 5 جانە 7-سىنىپتارعا ارنالعان وقۋلىقتار مەن وقۋ-ءادىستەمەلىك كەشەندەر, ارنايى (كوررەكتسيالىق) مەكتەپتەرگە ارنالعان وقۋ ادەبيەتتەرى, قوسىمشا ادەبيەتتەر جانە ەلەكتروندى تاسىمالداعىشتارداعى وقۋ باسىلىمدارى ۇسىنىلدى. سونىڭ ىشىندە 197-ءسى وقۋلىق», – دەدى ءمينيستردىڭ ورىنباسارى.
پاندىك كوميسسيا مۇشەلەرى وقۋلىقتاردى سىناقتان وتكىزۋ مەن قوعامدىق باعالاۋ قورىتىندىلارىن جانە عىلىمي-پەداگوگيكالىق ساراپتاما ءناتيجەلەرىن تالداپ, رەسپۋبليكالىق كوميسسيا قاراۋىنا ءبىلىم بەرۋ ۇيىمدارىندا پايدالانۋعا ۇسىنىلاتىن وقۋ ادەبيەتتەرى جونىندە ۇسىنىستار ەنگىزدى.
ۆيتسە-ءمينيستردىڭ ايتۋىنشا, رەسپۋبليكالىق جانە پاندىك كوميسسيالار 2-سىنىپقا ارنالعان بىرىڭعاي بازالىق وقۋلىقتاردى, 5 جانە 7-سىنىپتارعا ارنالعان بالامالى وقۋلىقتار مەن وقۋ-ءادىستەمەلىك كەشەندەردى, مەكتەپكە دەيىنگى تاربيە جانە وقىتۋ دەڭگەيىنە, ارنايى مەكتەپتەرگە ارنالعان باسىلىمداردى جانە باسقا دا قوسىمشا ادەبيەتتەردى ىرىكتەپ الدى. وتىرىسقا قاتىسۋشىلار وقۋ ادەبيەتتەرىن ازىرلەۋدى, ساراپتاۋدى جانە ىرىكتەۋدى ءارى قاراي جاقسارتۋ ءۇشىن ناقتى ۇسىنىستارىن ءبىلدىردى.
ايدار ورىسباەۆ,
«ەگەمەن قازاقستان»