وبلىس بويىنشا اۋىل شارۋاشىلىعى ماقساتىنداعى القاپتاردىڭ كولەمى 4,6 ميلليون گەكتاردى قۇرايدى. وبلىس اكىمدىگى اۋىل شارۋاشىلىعى باسقارماسىنىڭ ءمالىمەتىنشە, اعىمداعى جىلدىڭ ءونىمى ءۇشىن ەگىس القاپتارىنىڭ قۇرىلىمىن ارتاراپتاندىرۋعا سايكەس اۋىلشارۋاشىلىق داقىلدارىنىڭ ەگىس كولەمى 608,8 مىڭ گەكتار بولادى دەپ جوسپارلانۋدا. بۇل وتكەن جىلمەن سالىستىرعاندا 15,6 مىڭ گەكتارعا نەمەسە 2,6 پايىزعا ارتادى.
سونىمەن قاتار, ەگىس القاپتارىن ءارتاراپتاندىرۋ دا سالا ءۇشىن ماڭىزدى ماسەلە. بۇل ماقساتتا ءداندى جانە ءداندى-بۇرشاقتى داقىلدار – 257,6 مىڭ گەكتار, مايلى داقىلدار – 87,7 مىڭ گەكتار, قانت قىزىلشاسى – 9,0 مىڭ گەكتار, كارتوپ – 8,7 مىڭ گەكتار, كوكونىس – 26,1 مىڭ گەكتار, باقشا 10,7 مىڭ گەكتار جانە مال ازىعى 208,0 مىڭ گەكتارعا ورنالاساتىن بولادى. بۇل ءوز كەزەگىندە وڭىردەگى اۋىل شارۋاشىلىعى سالاسىن دامىتىپ قانا قويماي, ءوڭىر ەكونوميكاسىن كوتەرۋگە دە نەگىز بولاتىنى انىق. سونداي-اق, شارۋالاردىڭ يگىلىكتى ىسىنە باستاۋ بولا الادى.
ال اعىمداعى جىلدىڭ ءونىمى ءۇشىن ەگىلەتىن اۋىلشارۋاشىلىق داقىلدارىنا 325,6 مىڭ گەكتار سۇدىگەر كوتەرۋ جوسپارلانسا, بۇگىندە ناقتى كوتەرىلگەنى 214,7 مىڭ گەكتاردى قۇرادى. بۇل مىندەت جالپى وبلىس بويىنشا 65,3 پايىزعا ورىندالعان. سونداي-اق, اۋدانداردىڭ بەرگەن مالىمەتى بويىنشا, بيىلعى جىلدىڭ ونىمىنە ەگىلەتىن جازدىق ءداندى جانە مايلى داقىلداردىڭ تۇقىمى تولىق جەتكىلىكتى. ەندى وبلىستا جەردەن كول-كوسىر ءونىم الۋ ماسەلەسى كۇن تارتىبىندە تۇر. ال جەرگە ەگىلەتىن تۇقىمنىڭ ساپاسى مەن قولجەتىمدىلىگى قانداي؟
– جازدىق ارپا بويىنشا قاجەتتى 22,0 مىڭ توننا تۇقىم, ال ماقسارى داقىلىنا قاجەتتى 2,34 مىڭ توننا تۇقىم قولدا بار. ياعني, ارپادان 100 پايىز جانە ماقسارىدان 98,1 پايىز قامتاماسىز ەتىلگەن. جۇگەرىنىڭ ءبىرىنشى ۇرپاق بۋدان تۇقىمدارىنىڭ 1 كيلوسى الماتى وبلىسىنان 800-900 تەڭگەدەن ساتىپ الىنۋدا. بۇگىنگى كۇنگە داندىك جۇگەرىنىڭ قاجەتتىلىگىنىڭ 66,0 پايىزعا جۋىعى قامتاماسىز ەتىلسە, قالعان قاجەتتىلىك بويىنشا «بۋدان» جاۋاپكەرشىلىگى شەكتەۋلى سەرىكتەستىگى, قازاق ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتىمەن كەلىسىم جۇرگىزىلۋدە, – دەيدى وبلىستىق اۋىل شارۋاشىلىعى باسقارما باسشىسىنىڭ ورىنباسارى ەركەبۇلان انابەكوۆ.
مىندەتتى ساقتاندىرۋ دا ماڭىزدى ماسەلەلەردىڭ ءبىرى. وتكەن جىلى ەگىلگەن 259,4 مىڭ گەكتار جازدىق ەگىننىڭ نەبارى 22,8 پايىزى عانا ساقتاندىرىلعان. تالاس اۋدانى 60,2 پايىز ەگىستىكتى ساقتاندىرىپ جوعارى ناتيجەگە قول جەتكىزسە, وزگە اۋدانداردىڭ ساقتاندىرۋ كورسەتكىشتەرى 40 پايىزعا دا جەتپەگەن. ەندى اعىمداعى جىلعى ونىمگە ەگىلگەن 106,6 مىڭ گەكتار ۇزدىك بيدايدىڭ 56,7 مىڭ گەكتارى ساقتاندىرىلعان. بۇل كورسەتكىش وبلىس بويىنشا 53,1 پايىزدى قۇرايدى. سۋ ۇنەمدەۋ تەحنولوگيالارىن قولدانۋ بارىسىندا دا كەتكەن كەمشىلىكتەر بار. ماسەلەن, وتكەن جىلى سۋ ۇنەمدەۋ تەحنولوگياسىنىڭ ەگىس القابىنا ەنگىزۋ كولەمى وبلىس بويىنشا 11974 گەكتارعا جەتكەن. وسى باعىتتا شۋ, قورداي, جۋالى, بايزاق, جامبىل, مەركى اۋداندارى جاقسى جۇمىس ىستەپ وتىرعاندار قاتارىنان كورىنسە, سارىسۋ جانە تالاس اۋداندارىندا جۇمىس تومەن دەڭگەيدە اتقارىلعان. ءتىپتى مويىنقۇم اۋدانىندا بۇل جۇمىستار مۇلدە قولعا الىنباي وتىر ەكەن.
جۇمىستىڭ ونىمدىلىگى مەن ناتيجەسى تەحنيكانىڭ دايىندىعىنا تىكەلەي بايلانىستى. وسى تۇرعىدا وبلىستاعى 5751 تراكتوردىڭ 5175 داناسى كوكتەمگى دالا جۇمىستارىن جۇرگىزۋ ءۇشىن دايىندىق ساپىنا قويىلعان. ونىڭ ىشىندە دوڭعالاقتى تراكتورلاردىڭ دايىندىعى 91 پايىزدى قۇراپ وتىر.
بۇگىندە ۇكىمەت تاراپىنان وبلىسقا كوكتەمگى دالا جۇمىستارىن جۇرگىزۋ ءۇشىن 15 500 توننا ارزانداتىلعان ديزەل وتىنى بولىنگەن. ونىڭ 12 500 تونناسى ناۋرىز ايىنا, ال قالعان 3000 تونناسى مامىر ايىنا قارالعان. ال باسقارما باسشىلىعى قازىرگى ۋاقىتتا بەلگىلەنگەن وپەراتورلار بويىنشا اۋدانداردىڭ ەگىس كولەمىنە سايكەس جاعارماي بولىنگەنىن ايتىپ وتىر. سونداي-اق, اعىمداعى جىلى ۇكىمەت تاراپىنان وسىمدىك شارۋاشىلىعى سالاسىن سۋبسيديالاۋ باعدارلامالارى بويىنشا بارلىعى 3 ميلليارد 598 ميلليون 128 مىڭ تەڭگە قارجى قارالعان.
قورىتا ايتقاندا, وبلىستا كوكتەمگى دالا جۇمىستارىنا ازىرلىك جاقسى. «كوكتەمگى دالا جۇمىستارىن جۇرگىزۋگە قاجەتتى بارلىق جاعداي جاسالعان. ەندى بارلىق ءتيىستى جۇمىستاردى وڭتايلى مەرزىمدە وتكىزۋگە تولىق مۇمكىندىك بار», دەيدى ەركەبۇلان دانياربەك ۇلى.
حاميت ەسامان,
«ەگەمەن قازاقستان»
جامبىل وبلىسى