وڭتۇستىك قازاقستان وبلىسىنداعى اۋدان, قالالار اراسىندا كىتاپ قورى جاعىنان كوش باستاپ تۇرعان كىتاپحانا بار. ول سوزاق اۋدانىنىڭ ورتالىعى شولاققورعاندا ورنالاسقان اۋداندىق ورتالىق كىتاپحانا. مۇنداعى كىتاپ قورى 400 مىڭ داناعا جۋىقتايدى. جانە اتالعان مەكەمەدە ءجيى كەزدە بەرمەيتىن قۇندى كىتاپتاردى تابۋعا بولادى ەكەن. بۇل تۋرالى تاياۋدا وقو-نىڭ باق وكىلدەرى ءۇشىن سوزاق اۋدانىنا جاسالعان ارنايى پرەسس-تۋر كەزىندە كورسەتىلىپ, ايتىلدى, دەپ حابارلايدى وقو اكىمدىگىنىڭ ءباسپاسوز قىزمەتى.
شولاققورعان اۋداندىق كىتاپحاناسىندا 385 مىڭنان استام كىتاپ بولسا, ولاردىڭ 8500-ءى قۇندى كىتاپتار, ياعني, كوپ كەزدەسە بەرمەيتىن تۋىندىلار. سوناۋ 1950 جىلى جارىققا شىققان دۇنيەلەر دە قاز-قالپىندا ساقتالعان. كىتاپحانا قىزمەتكەرلەرىنىڭ ايتۋىنشا, مۇندا جىلىنا 6 مىڭعا جۋىق كىتاپ تۇراقتى تۇردە وقىرمان قولىنا تيەدى. تاعى ءبىر ايتا كەتەرلىگى, اۋداندىق كىتاپحانادا سوڭعى 32 جىلدان بەرى «ەگەمەن قازاقستان» («سوتسياليستىك قازاقستان»), «وڭتۇستىك قازاقستان», «كازاحستانسكايا پراۆدا», «جاس الاش», «مولشىلىق ءۇشىن», «تەرىسكەي», «سوزاق ءۇنى» گازەتتەرى سىندى مەرزىمدى باسىلىمداردىڭ مۇراعاتى ساقتالعان. رۋحاني ازىق مەكەنى ەلىمىزگە تانىمال تۇلعالار تاراپىنان جوعارى باعاسىن دا الىپ ۇلگەرىپتى.
«ءبىزدىڭ كىتاپ قورىمىز كوركەم ادەبيەتكە وتە باي. بىزدە بالالار الەم ادەبيەتىنىڭ بارلىق تومى ساقتالعان. ارينە, بۇل – ءبىز ءۇشىن ماقتانىش. سونىمەن قاتار, ەنتسيكلوپەديالىق, انىقتامالىق, عىلىمي كىتاپتاردىڭ دا ءتۇر-ءتۇرىن تابا الاسىز. وسىدان ءبىراز جىل بۇرىن ساۋىتبەك ءابدىراحمانوۆتىڭ ءوزى ءبىر كەلگەنىندە «پۋشكين ەڭبەكتەرى جانە قازاقشا زەرتتەۋ» كىتابىن وسى جەردەن كورىپ تاڭ قالعان. ال جازۋشى, قوعام قايراتكەرى شەرحان مۇرتازا اعامىز ءبىزدىڭ كىتاپ قورىمىز استانا كىتاپحانالارىمەن بىردەي دەپ باعاسىن بەرگەن», - دەدى كىتاپحانانىڭ اقپاراتتىق جانە بيوگرافيالىق قامتاماسىز ەتۋ ءبولىمىنىڭ باسشىسى ساۋلە بورانشيەۆا.
تەحنولوگيانىڭ قارىشتاپ دامىعان زامانى وقىرمان سانىنا وزىندىك سالقىنىن دا تيگىزبەي قويماعان. بۇل تۇرعىدا قىزمەتكەرلەر وقىرمان قىزىعۋشىلىعىن ارتتىرۋ بويىنشا تۇراقتى جۇمىستار جۇرگىزىپ كەلەدى ەكەن.