وسى مامان 2015 جىلعى 28 جەلتوقساندا «قايراتپەن» ءۇش جىلدىق كەلىسىمشارتقا وتىرىپ, كوماندا قازاقستاننىڭ سۋپەركۋبوگىن جەڭىپ العاندا باسى-قاسىندا بولعان. قۇرامى مىقتى الماتى كلۋبى بۇل كۋبوكقا ونسىز دا يەلىك ەتۋى مۇمكىن ەدى. ال جاڭا ماۋسىمداعى «قايراتتىڭ» سۇرەڭسىز ويىندارى (4 ماتچتا 2 ۇتىلىس, 2 تەڭ ويىن) رەسەي مامانىنىڭ كەتۋىنە تۇرتكى بولدى.
ءبىز قازاقستان فۋتبول فەدەراتسياسىنىڭ باسشىلارى سەكىلدى بوروديۋكتىڭ كەرەمەت جاعىن بىلمەيتىن شىعارمىز. ماماندار ونى بەكەر شاقىرىپ وتىرماعان دا بولار, بىراق ءوز ەلىندە كوپتەن بەرى ساناتتا جوق مامان وزگە ەلدىڭ نامىسىن جانىپ, ءىرى جەڭىستەرگە جەتەلەيدى دەگەنگە كۇدىگىم بار. الەم چەمپيوناتىنىڭ ىرىكتەۋ سىنىندا ول باپتايتىن قازاقستان قۇراماسىنىڭ ارمەنيادان 2:0 ەسەبىمەن جەڭىلۋى وسىنىڭ دالەلى ىسپەتتى.
قازاقتىڭ نامىسىن شايبالى حوككەيدەن قۇرلىقتىق حوككەي ليگاسىندا قورعاپ جۇرگەن «بارىس» دەگەن جالعىز كوماندا بار. وزىندىك ويىن ورنەگى قالىپتاسقان مىنەزدى كوماندا. ءدال قازىر بۇل ۇجىمنىڭ باسىنا كىم كەلسە دە اتالعان ليگانىڭ بەل ورتاسىنان تومەن تۇسە قويمايتىنداي مۇمكىندىككە يە. ەلوردا كومانداسى قازىر قحل-ءدىڭ شىعىس كونفەرەنتسياسىندا ونەر كورسەتىپ ءجۇر. كەشە عانا گاگارين كۋبوگى جولىنداعى جارىستىڭ ەكىنشى ساتىسىندا ماگنيتوگورسكىنىڭ «مەتاللۋرگىنە» قاۋقار كورسەتە الماي, ءتورت كەزدەسۋدە قاتارىنان ۇتىلىپ, پلەي-وفف جارىسىنان شىعىپ قالدى.
«بارىستى» ءار كەزدە ا-پ.سەلين, ۆ.كريكۋنوۆ, ا.نازاروۆ سىندى ماماندار باسقاردى. فينن مامانى باسقارعان تۇستا استانالىق حوككەيشىلەر گول سوعۋ, جەڭىس سانى بويىنشا ليگاداعى بارلىق رەكورد اتاۋلىعا وزگەرىس ەنگىزىپ ۇلگەرسە, ۆ.كريكۋنوۆتىڭ باسشىلىعىمەن تۋرنير كەستەسىندە 11-ورىنعا شىعىپ, «ەڭ ۇزدىك شەتەلدىك كوماندا» اتالدى.
نازاروۆتىڭ ۇلكەن ەرلىگى سول – كوماندادا جايلاۋوۆپەن قاتار باسقا قازاق جاستارىنىڭ دا اتتارى اتالا باستادى. ىبىرايبەكوۆ, رىسپاەۆ... قايىروۆ تا كومانداعا شاقىرىلدى. ورىستار «قازاق باتىرى» دەپ اتاپ, ءار ويىندا سەسكەنىپ جۇرەتىن دامير رىسپاەۆ – نازاروۆتىڭ ءتول ءونىمى. ورىس حوككەيىندە قازاقتان قورقۋ سەزىمىن ۇيالاتقان نازاروۆ مىرزاعا وسى ءۇشىن دە العىس ايتۋعا بولادى. ءسال ەركەلەتىپ العان شىعارمىز ءداميردى, بىراق ونىڭ قازاقتىق مىنەزىنە, نامىسقا تولى جىگەرىنە بۇكىل قحل ءتانتى بولدى.
وتكەن جىلى كومانداعا بەلارۋس مامانى ەدۋارد زانكوۆەتس كەلدى. نەگە كەلدى, قانداي جەتىستىككە جەتكىزەم دەپ كەلدى, ول جاعى قازاقستان حوككەي فەدەراتسياسىنىڭ باسشىلىعىنا عانا ءمالىم. «بارىستىڭ» قۇرامىندا لەگيونەر كوپ. ۇلتتىق قۇرامانىڭ بازالىق كومانداسى سانالاتىن «بارىستا» ويناتىپ الىپ, حالىقارالىق سىندارعا سالاتىن قازاقتىڭ سويلارى قايدا؟ ۇتسا دا, ۇتىلسا دا جەرگىلىكتى حوككەيشىلەردى نەگە ويناتپايمىز؟ پلەي-وفف كەزىندە جەرسىندىرىلگەن امەريكالىق ساڭلاقتاردى ويناتتىق ۇزدىكسىز. ءبىز سۇيەنىپ وتىرعان وسى ازاماتتار ەرتەڭگى الەم چەمپيوناتىندا ۇزدىگىپ قالماي ما؟ ءوز قاقپاشىلارىمىزدى (ۆ.كولەسنيك, پ.پولۋەكتوۆ) دەمالدىرىپ قويىپ, بۇگىندە تەڭدەسسىز شەتەلدىك مىقتى كارلسسوندى قويدىق قاقپاعا. قازاق حوككەيىنىڭ بولاشاعى دەپ جۇرگەن ءاليحان اسەتوۆ, نۇرسۇلتان بەلگىباەۆ, ءماديار ىبرايبەكوۆ سەكىلدى ارىستاندارىمىزدى «بارىستىڭ» قۇرامىندا شيراتىپ الماعاندا, شەبەرلىگىن قايدا تولىستىرامىز؟ مۇنى ويلاۋ ءۇشىن باپكەر تاكتيك بولۋى كەرەك, الداعى 5-6 جىلدى كورىپ تۇرۋى ءتيىس.
زانكوۆەتستىڭ سوڭعى باپكەرلىك قىزمەتى – رەسەي بىرىنشىلىگىندە ونەر كورسەتەتىن «اۆانگارد» حك باس باپكەرىنىڭ كومەكشىسى. وتكەن جىلدىڭ ناۋرىزىندا بۇل لاۋازىمنان بوساپ قالعان «ماماندى» «اتتاي قالاپ» شاقىرىپ الدىق.
جالپى, ءبىز مامان تاڭداۋدا قانداي ولشەمدەرگە سۇيەنەمىز؟ ويىنشى رەتىندە كورسەتكەن شەبەرلىگىنە مە, الدە باپكەر رەتىندە قول جەتكىزگەن ناتيجەلەرىنە مە؟ بۇل ەكى كورسەتكىشتە دە زانكوۆەتس اتاپ ايتاتىنداي دەڭگەيدە ەمەس.
بالكىم, بوروديۋك پەن زانكوۆەتستىڭ باعىن قازاقستان اشاتىن شىعار, بىراق ولاردىڭ باعىن ءبىزدىڭ اشۋىمىز ەمەس, ءبىزدىڭ باعىمىزدى تاڭداپ العان تالانتتى باپكەرلەردىڭ اشقانى الدەقايدا دۇرىس.
ەرتەڭ عايىپتان تايىپ, ەكەۋى دە كەتىپ جاتسا سىرتتان تاعى كىمدى شاقىرار ەكەنبىز؟..
دۇرالى دۇيسەباي,
جۋرناليست