بريتانيانىڭ Global Project Capital Ltd» كومپانياسى ماڭعىستاۋدىڭ ينفراقۇرىلىم جانە كولىك نىساندارىنىڭ قۇرىلىسىنا قارجى سالۋعا دايىن, دەپ حابارلايدى وبلىس اكىمدىگىنىڭ ءباسپاسوز قىزمەتى.
ماڭعىستاۋ وبلىسى اكىمى ەرالى توعجانوۆ پەن Global Project Capital Ltd» كومپانياسىنىڭ باس ديرەكتورى كەننەت فۋلتون ءوزارا تۇسىنىستىك تۋرالى مەموراندۋمعا قول قويدى.
قۇجاتتا اقتاۋ قالاسى اۋماعىنداعى ينفراقۇرىلىمدىق جانە كولىك نىساندارىنىڭ قۇرىلىسىندا ىنتىماقتاستىق ورناتۋ جايى قاراستىرىلعان. ءوز كەزەگىندە جەرگىلىكتى بيلىك 800 گەكتار جەردى جالعا بەرىپ, ينجەنەرلىك ينفراقۇرىلىممەن قامتاماسىز ەتپەك.
„Global Project Capital Ltd“ كومپانياسى وبلىستىڭ الەۋمەتتىك دامۋىنا قارجى سالۋعا ءوزى ۇسىنىس تاستاعان. بۇگىن ءبىز تۋريستىك شاعىن اۋدان قۇرىلىسى جوباسىن باستاپ كەتتىك. وندا مەديتسينالىق مەكەمەلەر, مەكتەپ, ساۋىق جانە ساۋدا ورىندارى بولماق", - دەدى وبلىس اكىمى.
جوسپارلانعان نىساندار قاتارىندا سۋ تازارتۋدا جاڭا تەحنورلوگيالار پايدالانۋ, اقتاۋ حالىقارالىق اۋەجايى مەن اقتاۋ حالىقارالىق تەڭىز تاۋار پورتىن دامىتۋ, ەنەرگەتيكا تاسىمالى سەكىلدى جوبالار بار. سونىمەن قاتار, دەنساۋلىق ساقتاۋ جانە ءبىلىم بەرۋ نىساندارى قۇرىلىسى مەن اۋىل شارۋاشىلىعى نىساندارى جانە ءىرى تۋريستىك ورىندار سالۋ جوسپارلانعان.
جوبانىڭ ءبىرىنشى كەزەڭىنە 500 ملن دوللار بولىنەدى.