تابيعاتتىڭ توسىن مىنەزىنە ۇرەيمەن قاراپ, «قارعىن سۋ قاي جاعىمىزدان شىعادى ەكەن» دەپ وتىرادى جۇرت. سونداي جاعداي كۇنى كەشە قازالى اۋدانىندا ورىن الدى.
باسىقارا سۋ تورابىنا مۇز كەپتەلىپ, سۋ ارناسىنان شىعادى. تاڭمەن تالاسا داريادان جايىلعان سۋ جۇرتتىڭ زارە-قۇتىن قاشىرادى. سولايشا, 3 شاقىرىم جوعارىدا ورنالاسقان «بالشىقساي» ۋچاسكەسىن سۋ الادى. دەرەۋ ىسكە كىرىسكەن توتەنشە جاعداي قىزمەتىنىڭ قىزمەتكەرلەرى 15 ادامدى جايىلعان سۋدىڭ ورتاسىنان الىپ شىعادى. ونىڭ ىشىندەگى ەكەۋى بالا ەكەن. ولاردى باسىقارا اۋىلىنداعى تۋىستارىنا جەتكىزە بەرگەندە, «شوتاي» ۋچاسكەسىن دە سۋ الدى» دەگەن دەرەك جەتەدى. ول جەردى ق.اسانوۆ جەكە شارۋاشىلىعى جايلايدى ەكەن. وسى شارۋاشىلىققا قاراستى 32 باس ءمۇيىزدى ءىرى قارا مەن 16 باس جىلقى قۇرعاق ايماققا شىعارىلادى.
قىزىلوردادان داريانى بويلاي «مي-171» تىك ۇشاعى شىعادى. سىردىڭ بويىنداعى جاعدايدى باقىلاپ, مونيتورينگ جاسايدى. سويتسە, قۇمجيەك ۋچاسكەسىندە 8 ادام قيىنشىلىققا تاپ بولىپتى. ونىڭ 6-ى بالا ەكەن. ولاردى سۋدىڭ ورتاسىنان الىپ, اۋدان ورتالىعىنا جەتكىزەدى.
ءبىر كۇننىڭ ىشىندە 23 ادام قۇتقارىلدى. بۇل دا بولسا جۇمىستىڭ جۇيەلى بولعانىنىڭ بەلگىسى دەر ەدىك.
ەرجان بايتىلەس,
«ەگەمەن قازاقستان»
قىزىلوردا وبلىسى