كەزدەسۋلەر كەزىندە اقتوبە مەن تارازدىڭ اراسىن ەكى مىڭ شاقىرىم جەر ءبولىپ تۇرعانىمەن, بۇل قاشىقتىق ءوڭىرارالىق ىنتىماقتاستىقتى دامىتۋعا كەدەرگى كەلتىرە المايتىنى اشىق ايتىلدى. ءوزارا ءتاجىريبە الماسۋ دەگەن ۇعىمنىڭ ءوزى ءبىر بىرىنەن ۇيرەنۋ, ءبىر ءبىرىنە قولداۋ مەن كومەك كورسەتۋ, بىرىندە جوعىن ەكىنشىسىنەن تابۋ دەگەن ءسوز ەمەس پە؟ وسى ورايدا اقتوبەلىكتەر ءوزدەرىنە ىنتىماقتاسۋ نيەتىمەن كەلگەن ەجەلگى اۋليەاتا ەلىنە قانداي كومەگىن بەرە الار ەدى دەگەن زاڭدى ساۋال تۋىندايدى. تالاس جوق, ءوڭىردىڭ باي تابيعي رەسۋرسى مەن جوعارى وندىرىستىك الەۋەتى ەكونوميكالىق ىنتىماقتاستىقتى نىعايتۋدىڭ باستى كىلتى بولىپ قالا بەرمەك. مۇندا يندۋستريالىق ايماقتىڭ مۇمكىندىگى دە وڭتۇستىك وڭىردەن بەرىلەتىن سۇرانىستاردى وتەۋگە تولىعىمەن جەتىپ-ارتىلادى. ويتكەنى, ءوندىرىس پەن كولىك-لوگيستيكا قىزمەتىن وركەندەتۋگە قاجەتتى قوندىرعىلار مەن جابدىقتارعا دەگەن قاجەتتىلىك قاي ءوڭىردە دە بولماي تۇرمايدى. ءوڭىرارالىق كووپەراتسيانى دامىتۋ ءجونىندەگى باستى كەلىسىمدەردىڭ ءبىرى وسى باعىتتا جاسالدى.
ال ەندى جامبىلدىقتار اقتوبەلىك ارىپتەستەرىنەن نەنى ۇيرەنىپ, نەنى كوكەيلەرىنە ءتۇيىپ قايتتى دەگەنگە كەلەيىك. ماسەلەن, جامبىل وبلىسىنىڭ اكىمى كارىم كوكىرەكباەۆتى اقتوبە ايماعىنداعى جاۋىننان كەيىنگى كوكتەي دۇركىرەپ ءوسىپ كەلە جاتقان مەملەكەت-جەكەمەنشىك ارىپتەستىگى اياسىندا قولعا العان جۇمىستار قىزىقتىرادى ەكەن. اسىرەسە, قالادا تۇرعىزىلعان ءساندى دە ساۋلەتتى ءبىلىم بەرۋ, دەنساۋلىق ساقتاۋ, ءمادەنيەت پەن ونەر جانە سپورت نىساندارىن كورىپ, ريزا بولدى. وبلىس ورتالىعىنداعى سىمبات مەكتەبى, ونەر اكادەمياسىمەن تانىسىپ شىققاننان كەيىن جامبىلدىق دەلەگاتسيا جەتەكشىسى بۇعان تەك قىزىعا قارايتىندارىن جەتكىزدى.
ءوز كەزەگىندە جامبىل وبلىسى اقتوبەلىكتەرگە نە ۇسىنا الادى؟ ارينە اۋليەاتا توپىراعىندا وندىرىلەتىن باستى قۇرىلىس يندۋسترياسى ءونىمىنىڭ ءبىرى – تسەمەنت قۇرىلىس الاڭدارى كەڭىنەن قانات جايعان ايماقتىڭ سۇرانىسىن تۋعىزباي قالماسى انىق. سونداي-اق, وبلىس حيميا ونىمدەرى بويىنشا ەلىمىزدە كوش باستاپ كەلەدى. قازىر ونىڭ تۇتاستاي رەسپۋبليكالىق اۋقىمداعى ۇلەسى وتىز پايىز بولسا, تاياۋداعى جىلداردا مۇنى ەكى ەسەگە دەيىن ۇلعايتۋ كوزدەلگەن.
اقتوبە وبلىسىنىڭ اكىمى بەردىبەك ساپارباەۆتىڭ ءمالىمدەۋىنشە, جامبىل جەرىندە بالامالى ەنەرگيا كوزدەرىن دامىتۋ جونىندەگى جوبالار ۇلگى الۋعا تۇرارلىقتاي. مەموراندۋمعا قول قويۋ ءراسىمى كەزىندە ايتىلعانداي, الداعى ءۇش-ءتورت جىلدا جاسىل ەكونوميكانىڭ ۇلەسى جامبىل وبلىسىندا 50-60 پايىزعا دەيىن جەتكىزىلمەك. مىنە, وسىلايشا ەجەلگى اۋليەاتا توپىراعىندا كۇن مەن جەلدىڭ جانە سۋدىڭ قۋاتىن پايدالانىپ ارزان ەنەرگيا ءوندىرۋ جىلدان-جىلعا ۇلعايا بەرمەك.
جامبىل وبلىسىندا ۇكىمەتتەن سۋبسيديالىق كومەك العان اۋىلشارۋاشىلىق ءوندىرىسشىلەرىنىڭ جوعارى قايتارىممەن ەڭبەك ەتىپ جۇرگەنى دە ىنتىماقتاستىق اياسىنداعى كەزدەسۋلەر كەزىندە تاعىلىم الارلىق وڭ مىسال رەتىندە كورىنىس تاپتى. سولاردىڭ ءبىرى «ءشاۋشەنباي» شارۋا قوجالىعىنىڭ جەتەكشىسى مەيرامباي دونەنباەۆ مەملەكەتتەن العان 140 ميلليون تەڭگە كولەمىندەگى دەمەۋقارجىنى ارتىعىمەن قايتارىپ, 600 ميلليون تەڭگەنىڭ ءونىمىن ءوندىرىپتى. سونىمەن ءبىرگە, ول استانا قالاسىنىڭ ازىق-ت ۇلىك بەلدەۋىن قۇرۋ ىسىنە دە ءوز ۇلەسىن قوسۋعا بەكەم بەل بۋعانداردىڭ ءبىرى بولىپ شىقتى.
وڭىرارالىق ىنتىماقتاستىق پەن كووپەراتسيانى دامىتۋ شەڭبەرىندە اقتوبە مەن جامبىل وبلىستارى اراسىندا مەموراندۋمعا قول قويىلدى. ەكى ءوڭىردىڭ اۋىل شارۋاشىلىعى باسقارمالارى جانە ىسكەر ايەلدەرى اراسىندا بولەك كەلىسىمدەر جاسالۋى ءوزارا بايلانىستار مەن قارىم-قاتىناستار كوكجيەگىن كەڭەيتە تۇسەرى كامىل.
تەمىر قۇسايىن, «ەگەمەن قازاقستان»
اقتوبە وبلىسى