گولوۆكيننىڭ كەلەسى قارسىلاسى رەتىندە HBO ءۇش بوكسشىنى ۇسىندى. ولار: مەكسيكالىق ساۋل «كانەلو» الۆارەس, امەريكالىق دەنيەل دجەيكوبس (رەۆانش) جانە اعىلشىن بوكسشىسى بيللي دجو سوندەرس. سونداي-اق, ءتورتىنشى نۇسقا رەتىندە وقىرماندار ءوز تاڭداۋلارىن جاساپ, پىكىر قالدىردى.
ساۋالناماعا بارلىعى 9 مىڭنان استام جانكۇيەر قاتىستى. قورىتىندىسىندا 61%-ى الۆارەسكە داۋىس بەرسە, 24%-ى دجەيكوبسپەن رەۆانش جەكپە-جەك وتكىزگەنىن قالايدى ەكەن. ال 11%-ى ورتا سالماقتا WBO نۇسقاسى بويىنشا الەم چەمپيونى بيللي دجو سوندەرسكە تاڭداۋ جاسادى. قالعان 4%-ى ءوز نۇسقالارىن جازدى.
ايتا كەتەيىك, گەننادي-الۆارەس ايقاسى جونىندە كەلىسسوزدەر وتكەن جىلدان بەرى جۇرگىزىلىپ كەلەدى. مالىمەتتەر بويىنشا بوكس كەشى وسى جىلدىڭ قىركۇيەك ايىنا جوسپارلانىپ وتىر. ال گ.گولوۆكين دەنيەل دجەيكوبسپەن 18 ناۋرىز كۇنى نيۋ-يوركتە كۇش سىناسىپ, 12 راۋندتىڭ قورىتىندىسى بويىنشا تورەشىلەردىڭ ءبىراۋىز شەشىمىمەن جەڭىسكە جەتكەن بولاتىن. جەكپە-جەكتەن كەيىن GGG دەنيەلمەن رەۆانش وتكىزۋگە دايىن ەكەندىگىن مالىمدەدى.
ال بيللي دجو سوندەرسپەن ماۋسىم ايىندا EXPO-2017 كورمەسى اياسىندا جۇدىرىقتاساتىنى حابارلانعان. قازىرگى ۋاقىتتا وسى ءىس جونىندە كەلىسسوزدەر جۇرگىزىلىپ جاتىر.