وتكەن جۇما كۇنى مۇناي باعاسى بولماشى كوتەرىلگەنىمەن, اپتا باسىنان بەرى 2 پايىز تومەندەدى. وعان سەبەپ بولعان اقش-تاعى مۇناي ءوندىرىسىنىڭ نارىقتاعى ۇسىنىستى ەسەلەپ ارتتىرۋى مۇمكىن دەگەن سىبىستىڭ تاراۋى.
جۇما كۇنگى ساۋدانىڭ قورىتىندىسى بويىنشا, برەنت ماركاسىنىڭ ءبىر باررەلى 0,24 دوللارعا قىمباتتاپ, 50,80 دوللارعا تەڭەستى.
Baker Hughes كومپانياسى وتكەن جۇما كۇنى اقش-تاعى جۇمىس ىستەپ تۇرعان بۇرعىلاردىڭ سانىن جاريالادى. كومپانيانىڭ مالىمەتىنشە, قازىرگى تاڭدا ەلدەگى جۇمىس ىستەپ تۇرعان بۇرعى سانى 652-گە جەتكەن. بۇل 2015 جىلدىڭ قىركۇيەگىنەن بەرگى ەڭ جوعارعى كورسەتكىش.
سونىمەن قاتار, اقش-تاعى مۇناي قورى دا ءبىر اپتادا 5 ملن باررەلگە ارتىپ, بۇل ءوز كەزەگىندە باعانىڭ تومەندەۋىنە الىپ كەلدى.
وپەك ۇيىمىنىڭ حابارلاۋىنشا, قاڭتاردا الەمدىك مۇناي قورى 278 ملن باررەلگە دەيىن ارتىپ, سوڭعى بەس جىلداعى ماكسيمۋمعا جەتكەن.
وسىنىڭ ءبارى قازىرگى تاڭدا باعانىڭ كوتەرىلۋىنە كەدەرگىسىن كەلتىرۋدە, دەيدى ينۆەستورلار.
وسى اپتادا اقش-تان كەلەتىن جاڭالىقتى كۇتەتىن بولادى. سارسەنبى مەن بەيسەنبى كۇندەرى اقش مۇناي مەن مۇناي ونىمدەرىنىڭ قورى تۋرالى جاڭا مالىمەت شىقسا, كۋۆەيتتە باس قوسقان وپەك مۇشەلەرىنىڭ سالا مينيسترلەرى وتكەن جىلدىڭ سوڭىندا مۇناي ءوندىرىسىن ازايتۋ تۋرالى كەلىسىمنىڭ ورىندالۋ باراسىنا باعا بەرمەك.
سونىڭ ىشىندە ساۋداگەرلەر ەكىنشى جارتىجىلدىقتا وسى كەلىسىمنىڭ ۇزارتىلار-ۇزىرتىلماسىنا كوڭىل اۋدارماق.
يراكتىڭ مۇناي ءمينيسترى دجاببار ءال -لايبي سەنبى كۇنى كەلىسىمنىڭ ۇزارتىلۋىن نارىقتاعى احۋال شەشەتىنىن ايتقان ەدى.
ال رەسەي ەنەرگەتيكا ءمينيسترى الەكساندر نوۆاك بۇل تۋرالى كوز قوزعاۋدىڭ ءالى ەرتە ەكەندىگىن ايتقان.
الجير ەنەرگەتيكا ءمينيسترى نۋرەددين بۋتەرفا بولسا, كەلىسىمنىڭ ۇزارتىلۋى نارىق ءۇشىن پايدالى دەگەن پىكىر ءبىلدىردى.