سوڭعى 10 جىلدا قازاقستاندا تۋبەركۋلەزبەن سىرقاتتانۋ كورسەتكىشى 2,3 ەسەگە ازايىپ, وسى دەرتتەن بولاتىن ءولىم-ءجىتىم 5 ەسەگە قىسقارعان.
بۇل تۋرالى قر ۇلتتىق فتيزيوپۋلمونولوگيا عىلىمي ورتالىعىنىڭ ديرەكتورى جۇماعالي يسمايلوۆ ءمالىم ەتتى.
الماتىدا وتكەن دۇنيەجۇزىلىك تۋبەركۋلەزگە قارسى كۇرەس كۇنىنە ارنالعان كونفەرەنتسيادا بىرقاتار وزەكتى ماسەلەلەر ءسوز بولدى.
ماماندار ستۋدەنتتەر مەن ميگرانتتار اراسىنداعى جۇقپالى اۋرۋدى انىقتاۋ مەن ەمدەۋدىڭ قولجەتىمدىلىگىن تالقىلادى. جاڭا دارىلەردى قولدانۋعا دا توقتالدى. تۋبەركۋلەزگە قارسى كۇرەسكە بيىل مەملەكەتتەن 35 ميلليارد تەڭگە ءبولۋ قاراستىرىلعان.
«جالپى قازاقستانعا كەلسەك, وتكەن جىلدىڭ ناتيجەسى بويىنشا تۋبەركۋلەزدىڭ اۋرۋشاڭدىعى 9,9 پايىزعا تومەندەپ, ال ونىڭ تارالۋى ياعني ءبىرىنشى رەت اۋىرعان مەن رەتسيديۆتىك تۇرلەرى 13 پايىزعا تومەندەپ وتىر. بالالاردىڭ اراسىندا تۋبەركۋلەزدىڭ تارالۋى 21,6 پايىزعا تومەندەدى. ال تۋبەركۋلەزدىڭ سالدارىنان بولاتىن ءولىم-ءجىتىم 17 پايىزعا تومەندەپ وتىر», دەيدى جۇماعالي يسمايلوۆ.