كوكتەمدى قارسى الۋ سالتاناتىنا قىس بويى دايىندالعان حالىق تا كوكتەم كەلىپ, كۇن كوزى كورىنە باستاعاننان-اق بۇل مەزگىلدەن ەرەكشە ءبىر جىلىلىق, شۋاق كۇتەدى. ال ۇلىستىڭ ۇلى كۇنىنىڭ ەلىمىز ءۇشىن بەرەكەلى دە مەرەكەلى شاق ەكەنى انىق.
سامارقاننىڭ كوك تاسى ەرىپ, جەر-دۇنيە اسەم كۇيگە بولەنگەن شاقتا وبلىستىق ورتالىق «ھيباتۋللا تارازي» مەشىتى ءاز ناۋرىز مەرەكەسىن ۇيىمداستىردى. كۇندەردىڭ سۇلتانى جۇما كۇنى نامازدان شىققان كوپشىلىك مەشىت تاراپىنان دايىندالعان ارنايى اق داستارقاننان ءدام تاتىپ, ناۋرىز كوجە ءىشتى. سونداي-اق, بۇل كۇنى مەشىت اۋلاسىنا سەگىز قانات كيىز ءۇي تىگىلىپ, التىباقان قۇرىلدى. ناۋرىز مەيرامىنا تاراز قالاسىنىڭ اكىمى رۇستەم داۋلەت جانە بىرقاتار مەملەكەتتىك قىزمەتشىلەر, ەڭبەك ارداگەرلەرى ارنايى قاتىسىپ, كوپشىلىكپەن بىرگە بولدى. ال قاريالار ەلدىڭ تىنىشتىعىن, اۋىزبىرلىگىن تىلەپ, قازاقى سالتپەن باتا بەردى.
بۇل شارادا ناۋرىز ناقىشتارى كەڭىنەن كورىنىس تاپتى. اتاپ ايتساق, تاراز قالالىق مەشىتتەرىنىڭ جانىنان قۇرىلعان ارنايى توپ ارقان تارتۋ, لاڭگى تەبۋ, گىر تاسىن كوتەرۋ, قوشقار پالۋان سىندى ۇلتتىق سپورتتىق سايىستاردا ءوز ونەرلەرىن كورسەتتى. جۇزدەن جۇيرىك شىققان جەڭىمپازدار اقشالاي سىيلىقتارمەن ماراپاتتالدى. ال وڭىرىمىزگە بەلگىلى اقىن-سازگەرلەر ءان اۋەلەتىپ, كۇي شالقىتتى.
ۇلتتىڭ ۇعىم-تۇسىنىگىندە ۇلىستىڭ ۇلى كۇنى قايىرىمدىلىق, مەيىرىمدىلىك مەرەكەسى بولىپ سانالادى. بۇل كۇنى قايىرىمدىلىق جارمەڭكەسى وتكىزىلىپ, مەشىت اتىنان الەۋمەتتىك جاعدايى تومەن وتباسىلارعا كىلەم تابىستالدى. ال مەشىتتىڭ قىزدار, ايەلدەر سەكتورى ايەلدەر جاماعاتى ءۇشىن بەسىك سالار, تۇساۋ كەسەر سىندى سالت-ءداستۇر ءراسىمدەرىن وتكىزىپ, اجەلەر مەكتەبى جاستارعا ونەگەلى وسيەتىن ايتتى. مەشىت ۇستازدارىنىڭ ۇيىمداستىرۋىمەن كوپشىلىككە رۋحانيات تاقىرىبىنان ۆيكتورينالىق سۇراقتار قويىلىپ, جاۋاپ بەرىلدى.
«ھيباتۋللا تارازي» مەشىتىنىڭ باس يمامى, قازاقستان مۇسىلماندارى ءدىني باسقارماسىنىڭ وبلىستاعى وكىلى دانيار قاجى جۇماباەۆ بۇل ءىس-شارا جاستارىمىزدىڭ ۇلتتىق سالت-داستۇرگە دەگەن قۇرمەتىن ارتتىرۋ ءۇشىن ۇيىمداستىرىلىپ وتىرعانىن ايتتى. «ناۋرىز ەشقانداي دا ءدىني مەيرام ەمەس. ءدىن مەن ءداستۇردىڭ ساباقتاس ەكەنىن ەسكەرسەك, بۇل رۋحاني مەرەكە ەلىمىز ءۇشىن دە يگىلىكتى. جاستارىمىز دا بابادان بالاعا مۇرا بولىپ كەلە جاتقان ءاز ناۋرىزدى جان-جۇرەگىمەن تۇيسىنسە, بۇدان ۇتىلماسىمىز انىق», دەيدى دانيار ءاليمۇحاممەد ۇلى. شىنىندا دا بۇل مەرەكە ۇلىستىڭ ۇلى كۇنى ۇلتقا مۇرا ەكەنىن تاعى ءبىر دالەلدەدى.
حاميت ەسامان,
«ەگەمەن قازاقستان»
جامبىل وبلىسى