ايتپەسە, ءبىر كەزدەرى ءوڭىردىڭ اتاعىن شارتاراپقا تانىتقان ەرىك اسقاروۆتاي اقتانگەر ايتىسكەردىڭ ءىزباسارلارى جوق دەگەنگە سەنۋ قيىن. ءتىپتى 15 جىل بويى ءجونى دۇرىس نە ايماقتىق, نە رەسپۋبليكالىق ءسوز سايىسى ۇيىمداستىرىلماي «ءوز قازانىندا بۇلكىلدەپ قايناپ» كەلگەنىنە بىرەۋ سەنەر, بىرەۋ سەنبەس. ەندى كەشتەۋ بولسا دا وسى ولقىلىقتىڭ ورنى تولتىرىلىپ, تامىرى سولعان كارى اعاشتاي كوزدەن دە, كوڭىلدەن دە تاسادا قالعان كونەدەن كەلە جاتقان كەنەن ونەردىڭ تامىرىنا بيىل قان جۇگىردى. وبلىستىق اكىمدىك قولداۋ ءبىلدىرىپ ەدى, قارجى دا, دەمەۋشى دە تابىلىپ, مادەنيەت باسقارماسى ۇيىمداستىرۋ جۇمىستارىنا بىلەك سىبانا كىرىستى. ەلىمىزدىڭ ءار قيىرىنا «ساۋىن» ايتىلىپ, رەسپۋبليكالىق الامان ايتىس وتكىزىلەتىن بولىپ شەشىلدى. قارا ولەڭنىڭ جىلىگىن شاعىپ, مايىن ءىشىپ جۇرگەن, اتاقتارىنان ات ۇركەتىن كىل جۇيرىكتەردىڭ كەلەتىنىن ەستىگەن جۇرتشىلىق جاستار سارايىنا قاراي اعىلىپ, ءزاۋلىم زالعا سىيماي كەتتى.
الامان ايتىس باستالار الدىندا وبلىس اكىمىنىڭ ورىنباسارى انارحان دۇيسەنوۆا جينالعاندارعا قۇتتىقتاۋ ءسوز ارنادى.
− كۇن مەن ءتۇننىڭ تەڭەلىپ, جەر-انامىز بۋسانار شاقتا اسىعا, تاعاتسىزدانا توسقان اقجارىلقاپ كۇن ءوز نۇرىن, شاپاعاتىن الا كەلدى. ەلىمىزدە ناۋرىز مەيرامىن تويلاۋ داستۇرگە اينالعان. بيىلعى مەرەكە ەرەكشەلىكتەرگە تولى. ۇلى ءسوز زەرگەرى عابيت ءمۇسىرەپوۆتىڭ 115 جىلدىق مەرەيتويىمەن تۇسپا-تۇس كەلىپ وتىر. رەسپۋبليكالىق جىر دوداسىنىڭ, ءبىر جاعىنان, جەرلەسىمىزدىڭ قۇرمەتىنە ۇيىمداستىرىلۋى سوندىقتان, دەي كەلىپ, ايتىسكەرلەرگە شالقار شابىت تىلەدى.
داۋلەتكەرەي كاپ ۇلى, رينات زايىتوۆ سەكىلدى بەلگىلى ايتىس اقىندارىنىڭ قازىلىق ەتۋى ايتىس اجارىن اشا ءتۇستى.
ساحنا تورىنە ءبىرىنشى بولىپ قاراعاندىلىق ماقسات اقانوۆ پەن تارازدىق ارۋ ارۋنا كەرىمبەك كوتەرىلدى. ءدۇبىرلى دوداعا العاش شىققانىنا قاراماستان ارۋنا قارسىلاسىنان توسىلمادى. شىمشىما ازىلدەرمەن جاۋاپ قايىرىپ وتىردى. كورەرمەندەر جەزدە مەن بالدىزدىڭ جاراستى ءسوز قاقتىعىسىنا كۋا بولدى. دەسەك تە, تاجىريبەلى, ابدەن ىسىلعان ماقسات وزا شاپتى. العاشقى جۇپتى 40 مينۋت بويى قىبىر ەتپەستەن تىڭداعان كورەرمەن قاۋىم ەكىنشى جۇپ استانالىق داۋلەت ەرلان مەن قىزىلجارلىق جۇمابەك راحيموۆتىڭ بابى كەلىسپەگەنىن بىردەن بايقاپ, باس شايقاۋمەن بولدى.
ءۇشىنشى جۇپ جۇرتشىلىقتىڭ دەلەبەسىن قايتا قوزدىردى. «ءجۇرسىننىڭ جۇيرىكتەرىنىڭ» ىشىندە ايگىلىسى, 2015 جىلعى «التىن دومبىرا» جۇلدەسىنىڭ يەگەرى, حالىقارالىق دودالاردا ولجا سالىپ جۇرگەن پاۆلودارلىق اسپانبەك شۇعاتاەۆتىڭ ەسىمى اتالعاندا زال ءىشىن دۋ قول شاپالاق كەرنەپ كەتتى. ەسكىنىڭ كوزى بۇقار جىراۋ بابامىزدىڭ كەسەك-كەسەك سوزدەرىنەن, بەينەلى كەستەلەرىنەن ءنار الىپ, ءوزى دە سونداي ءبىر وبرازعا كىرىپ, دۇبىرلەتتى-اۋ! ونىڭ قارسىلاسى− سەمەيلىك نۇرجان ومىرباەۆ تا وڭاي شاعىلاتىن جاڭعاق بولماي شىقتى. دەسەك تە, اسپانبەك نۇرجاننىڭ وسال تۇستارىن ءدوپ باستى.
«ۋىلدىرىقتىڭ ءدامى ءتاتتى مە ەدى,
ۋىز ىشكەن جەرىڭدى ۇمىتتىرعان؟! – دەگەن تاپقىر شۋماقتار از كەزدەسكەن جوق. ادەتتە, كەز كەلگەن ايتىسكەردىڭ الىمدىلىعى مەن شالىمدىلىعى ءا دەگەننەن قاپىسىز اڭعارىلادى. كەيبىرەۋلەرىنىڭ امانداسۋلارى ءبىر-ءبىرىنە ۇقساپ, جاتتاندىلىقتان, قارادۇرسىندىلىكتەن اسپاي جاتسا, اسپانبەك ارقيلى مانەردە, ماقامدا كەلىستى كەلتىرە ءبىلدى.
اسسالاۋماعالەيكۋم, اقساقالدار,
باكىسىن ماسىسىنە قايرايتۇعىن.
ارمىسىڭ, ايقاراكوز اپالارىم,
جاۋلىعى جاينامازداي جاينايتۇعىن.
امان با, مەنىڭ دارحان قىزىلجارىم,
توقسان كۇن توي كورسە دە تويمايتۇعىن, – دەپ ءسوز مايەگىن سۋشا ساپىردى. سولتۇستىكقازاقستاندىق مۇحاممەد قوڭقاەۆ بۇل جولى ەركىن كوسىلدى. وڭتۇستىك قازاقستان وبلىسىنىڭ نامىسىن ارقالاپ كەلگەن داۋرەن ىسقاق قىزىلجار جۇرتشىلىعىنىڭ قوناقجايلىلىعىن, مەيماندوستىعىن شابىتتانا جىرلادى. مۇحاممەدتىڭ كۇنگەيدەن ماعجان ەلىنە العاش رەت ات باسىن تىرەگەن داۋرەننىڭ يىعىنا شاپان جاۋىپ, ءوز جولىن, كادەسىيىن جاساۋى وتە جاراسىمدى بولدى. ءجۇرىس-تۇرىسىنان دا, كيىم كيىسىنەن دە سىرباز سەرىلىك جەلدەي ەسەتىن كوكشەتاۋلىق قۋانىش وسپانوۆ پەن رەسپۋبليكالىق ايتىستاردىڭ بىرنەشە مارتە باس جۇلدەگەرى اتانعان قىزىلوردالىق ءمولدىر ايتبايدىڭ تارتىسى دودانىڭ كورىگىن ودان ءارى قىزدىردى.
مولدىردە:
بىراق تا مۇنىڭ ءبارى وڭىڭدە ەمەس,
تۇسىڭدە بولا ما دەپ قاۋىپتەنەم, – دەگەن ۇتىمدى قايىرىمدار كوپ ۇشىراستى. قوستانايلىق توبا وتەپباەۆ پەن قاراعاندىلىق ديدار قاميەۆتىڭ ايتىسىندا سوڭعىسىنىڭ ايقىن باسىمدىعى ايقىن سەزىلدى.
الامان ايتىستىڭ باس جۇلدەسى مەن 600 مىڭ تەڭگە اسپانبەك شۇعاتاەۆقا بۇيىردى. ماقسات اقانوۆ ءبىرىنشى ورىنعا (400 مىڭ تەڭگە), ءمولدىر ايتباي مەن مۇحاممەد قوڭقاەۆ ەكىنشى ورىنعا (300 مىڭ تەڭگە) يە بولدى.م.جۇماباەۆ اۋدانىنىڭ اكىمدىگى تىككەن ەرىك اسقاروۆ اتىنداعى جۇلدە نۇرجان ومىرباەۆقا تاپسىرىلدى.
وزگە اقىندارعا دا سىي-سياپات كورسەتىلدى.
ءومىر ەسقالي
«ەگەمەن قازاقستان»,
نۇرگۇل وقاشەۆا,
جۋرناليست
سولتۇستىك قازاقستان وبلىسى
سۋرەتتەردى تۇسىرگەن
امانگەلدى بەكمۇراتوۆ