جۋرنالدىڭ تۇساۋكەسەر راسىمىنە اقپارات جانە كوممۋنيكاتسيالار ءمينيسترى داۋرەن اباەۆ, بۇۇ بالالار قورىنىڭ وكىلدەرى, بەلگىلى قوعام قايراتكەرلەرى قاتىستى.
سالتاناتتى راسىمدە ءسوز العان مينيستر د.اباەۆ جۋرنال ۇجىمىنا تابىس تىلەدى. «مەن جاڭا جوباعا شىن جۇرەكتەن تابىس ءتىلەيمىن. مينيسترلىك تاراپىنان قاجەتتى كومەكتەر كورسەتىلەدى. بۇل جوبا ءبىز ءۇشىن, وقىرماندار ءۇشىن ماڭىزدى. بۇل – بالالاردىڭ باستاماسى, ءبىز بالالاردى ارقاشان قولدايمىز», دەدى مينيستر.
«GENERATIONNEXT» جۋرنالىن ءاليليا مەن ءامينا نارىكباەۆالار باستاعان مەكتەپ وقۋشىلارى شىعارادى. «قازىر تارالىپ جاتقان اقپاراتتاردىڭ كوپتىگى سونداي, ءبىز كەي جاعدايدا قاجەتتى ءارى پايدالى دۇنيەلەردى انىقتاي المايمىز. ءبىزدىڭ جۋرنال وقىرماندى العا جەتەلەيتىن, سەنىمىمىزدى ارتتىراتىن اقپاراتتاردى جاريالايدى. قازىرگى تاڭدا ەلىمىزدە جاستىعىنا قاراماستان كەرەمەت ءمۇمكىندىكتەرگە قول جەتكىزگەن ونەرلى, ءبىلىمدى, تابىستى قۇربى-قۇرداستارىمىز از ەمەس, بىراق جاستار ولاردىڭ كوپشىلىگىن بىلە بەرمەۋى مۇمكىن. ەندى ولار تۋرالى قىزىقتى اقپاراتتاردى ءبىزدىڭ جۋرنالىمىزدان وقۋعا بولادى», دەيدى اپالى-ءسىڭلىلى نارىكباەۆالار.
جۋرنالدىڭ باس رەداكتورى اسەم بەرىكتىڭ ايتۋىنشا, جۋرنال وقىرماندارعا قىزىقتى اقپارات بەرىپ قانا قويماي, ءوز بولاشاقتارىن ايقىنداۋعا, كاسىبي تۇرعىدا جەتىلۋگە مۇمكىندىك بەرەدى. «ءبىزدىڭ جۋرنالىمىز 10-19 جاس ارالىعىنداعى جاستارعا جۋرناليست بولىپ قالىپتاسۋعا, ماڭىزدى ءارى قىزىقتى اقپاراتتارمەن بولىسۋگە, ءتۇرلى كاسىپ يەلەرىمەن, قوعامعا پايداسىن تيگىزىپ ءجۇرگەن ازاماتتارمەن سۇحباتتاسۋعا ءمۇمكىندىك بەرەدى», دەيدى اسەم بەرىك.
5 مىڭ دانا تارىلىمى بار, قازاق, اعىلشىن جانە ورىس ءتىلدەرىندە شىعاتىن جۋرنالدى موبيلدىك قوسىمشالاردان دا وقۋعا بولادى. باسىلىمنىڭ العاشقى نومىرىنە جاس عالىم دامەل مەكتەپباەۆا مەن تانىمال ءانشى دينارا سۇلتان جانە نازارباەۆ ۋنيۆەرسيتەتتىڭ پرەزيدەنتى شيگەو كاتسۋمەن سۇحباتتار جاريالانعان.
ارنۇر اسقار,
«ەگەمەن قازاقستان»
استانا