ۇلىستىڭ ۇلى كۇنىن اتىراۋلىقتار دا ايرىقشا سالتاناتپەن قارسىلادى. كوكتەمنىڭ, جاڭارۋ مەن جاسامپازدىقتىڭ مەرەكەسىن تويلاۋ 14 ناۋرىزدان بەرى جالعاسىپ جاتىر.
اتىراۋ وبلىسىنىڭ اكىمى نۇرلان نوعاەۆ اتىراۋلىق سابيلەردىڭ تۇساۋىن كەستى. تۇساۋ كەسۋ ءراسىمى وبلىس ورتالىعىندا وتكەن ناۋرىز مەرەكەسىن تويلاۋ كەزىندە ءوتتى.
سابيلەردىڭ ءبىرىنىڭ تۇساۋىن الا جىپپەن, ەندى بىرىنىكىن توق ىشەكپەن كەسكەن ايماق باسشىسى بۇل ىرىمدارداردىڭ ماعىناسىن ءتۇسىندىرىپ بەردى:
“الا جىپپەن كەسكەنىمىز – ەشكىمنىڭ الا ءجىبىن اتتاماسىن, ەلىنە ادال قىزمەت قىلسىن دەگەن نيەتىمىز, ال توق ىشەكپەن كەسكەنىمىز – ەلى, حالقى توق بولسىن, وتانىنان ىرىس كەتپەسىن دەگەنىمىز”, – دەدى نۇرلان نوعاەۆ.
ايماق باسشىسى تۇرعىنداردى جاڭا جىل مەرەكەسىمەن قۇتتىقتاپ, ەلگە باق-بەرەكە, ىرىس پەن ىنتىماق تىلەدى, ەكونوميكالىق-الەۋمەتتىك ورلەۋدىڭ جالعاسا ءتۇسۋى ءۇشىن اتىراۋلىقتاردى ءبىر بولىپ ەڭبەك ەتۋگە شاقىردى.
ورتالىق الاڭدا وتكەن تەاترلاندىرىلعان كونتسەرتتە ساحنا تورىنەن الاش ارىستارى ءاليحان بوكەيحانوۆ, احمەت بايتۇرسىنوۆ, مىرجاقىپ دۋلاتوۆ, حالەل دوسمۇحامەدوۆتەر, قازتۋعان جىراۋ, يساتاي مەن ماحامبەت باتىرلار, قازاق حاندىعىنىڭ نەگىزىن قالاعان كەرەي مەن جانىبەك حاندار, ەل ءۇشىن قىزمەت ەتكەن باسقا تاريحي تۇلعالار تۇرعىنداردى جاڭا جىلمەن قۇتتىقتادى.
مۇنايلى ايماقتاعى مەكەمەلەر مەن كاسىپورىندار اراسىندا ۇلتتىق سالت-داستۇرلەردەن كورىنىس قويۋ سايىسى دا جوعارى دەڭگەيدە ءوتتى. ال بۇگىن يساتاي-ماحامبەت الاڭىندا «كوش كەلدىڭ, ءاز-ناۋرىز!» اتتى تەاترلاندىرىلعان كورىنىس كوپشىلىك نازارىنا ۇسىنىلدى. ۇلتتىق ويىندار, جەرگىلىكتى تاۋار وندىرۋشىلەردىڭ جارمەڭكەسى, كونتسەرتتىك باعدارلاما مەرەكەلىك كوڭىل-كۇي سىيلادى.
- بيىل ناۋرىز تويى ايرىقشا ءوتىپ جاتىر, - دەيدى اتىراۋ قالاسى اكىمدىگىنىڭ ءباسپاسوز حاتشىسى ارداق جۋاسوۆ. - «ۇزدىك كيىز ءۇي», «ءدامدى ناۋرىز كوجە» بايقاۋلارىنا ايماقتاعى وتاندىق جانە شەتەلدىك مەكەمەلەر, قوعامدىق بىرلەستىكتەر ۇيىمشىلدىقپەن قاتىستى. وعان قازاقستان مەن قىرعىزستان رەسپۋبليكالارىنا ەڭبەك سىڭىرگەن قايراتكەر, كومپوزيتور يليا جاقانوۆ باستاعان قازىلار القاسى تورەلىك جاسادى.
ورتالىق الاڭنىڭ وزىندە 25 كيىز ءۇي قۇرىلدى. ىقشام اۋداندار مەن قالا ماڭىنداعى ەلدىمەكەندەردى قوسقاندا ەلۋگە جۋىق كيىز ءۇي سالتاناتتىڭ ءسانىن كەلتىردى.
باقىتگۇل باباش,
«ەگەمەن قازاقستان».