«بالا روكفەللەر ەسەپسىز بايلىق, ءسان-سالتاناتتا ءومىر ءسۇردى. ول باۋىرلارىمەن نيۋ-يوركتەگى بەسىنشى اۆەنيۋدە روليك تەبۋگە شىققاندا ارتتارىنان ليمۋزين ەرىپ جۇرەتىن. شارشاعان جاعدايدا بالالار سوعان مىنە سالاتىن» دەپ جازادى ۆۆس.
الايدا, اكە-شەشەسى بالالارعا اقشانىڭ قادىرىن ءبىلۋدى ۇيرەتتى, ولاردىڭ بويىنا جاۋاپكەرشىلىك سەزىمىن ءسىڭىردى. كۇن سايىن اناۋ-مىناۋعا جۇمساۋ ءۇشىن ولارعا 25 تسەنتتەن بەرىلەتىن. الايدا, بالالار ونىڭ ءبىرازىن بولاشاققا جانە قايىرىمدىلىققا دەپ ساقتاپ قويۋى ءتيىس بولاتىن.
دەۆيد روكفەللەر 1915 جىلى نيۋ-يوركتە تۋدى. ول اقش-تىڭ 41-ءشى ۆيتسە-پرەزيدەنتى نەلسون روكفەللەردىڭ جانە اركانزاس شتاتىنىڭ 37-ءشى گۋبەرناتورىنىڭ ءىنىسى ەدى.
دەۆيد روكفەللەر بيزنەستە بولسىن, قايىرىمدىلىقتا بولسىن, اۋلەتتىڭ بۇكىل ءىسىن باسقاردى. «امەريكان كاپيتاليزمى كوپتەگەن ادامدارعا كومەكتەستى. الەم تاريحىندا ەشبىر جۇيە ادامدارعا مۇنداي كومەك كورسەتكەن جوق» دەيتىن ول.
روكفەللەر كەدەي ەلدەرگە كومەكتەسۋدى قولدادى. ويتكەنى, جاعدايلارى تۇزەلگەن سوڭ ولار امەريكان تاۋارلارىن تۇتىنۋشىلار سانىن كوبەيتۋى ءتيىس ەدى.
كوپتەگەن باسقا ميللياردەرلەر سياقتى ەمەس, ول تابىس سالىعىنا قارسى كۇرەسپەدى. «ميلليونداعان دوللار تابىسقا كەنەلىپ, سوسىن قالعان ۋاقىتتى سالىق تولەمەۋدىڭ جولدارىن تابۋعا جۇمساۋ ۇيات نارسە» دەيتىن ول.
روكفەللەر الەم بويىنشا ادامداردىڭ تۋىن شەكتەپ, باقىلاۋ كەرەك دەگەن كوزقاراستا بولدى. ول ەنەرگيا مەن سۋدى پايدالانۋدىڭ ۇنەمى ءوسىپ جاتقانى, تۇرعىندار سانىنىڭ كوبەيۋى سالدارىنان اتموسفەرادا اۋانىڭ لاستانۋى سياقتى ماسەلەلەردەن قاۋىپتەندى.
روكفەللەر كورپوراتسيالاردى مۋزەيلەرگە قارجىلاي كومەك بەرۋگە شاقىردى. ونىڭ جەكە كوللەكتسياسىندا قۇنى 500 ملن دوللار شاماسىندا ونەر تۋىندىلارى بولاتىن.
روكفەللەر جۇزدەگەن ەلدىڭ باسشىلارىمەن كەزدەستى. كوپ جەردە ونى مەملەكەت باسشىسى سياقتى قۇرمەتتەپ كۇتەتىن.
1998 جىلى وعان اقش-تىڭ ازاماتتىق تۇلعالارعا ارنالعان ەڭ جوعارعى ەكى ماراپاتىنىڭ ءبىرى پرەزيدەنتتىڭ بوستاندىق مەدالى بەرىلدى.
دەۆيد روكفەللەردىڭ اتى تاريحتا مىقتى كاسىپكەردەن گورى ءىرى فيلانتروپ, ياعني قايىرىمدىلىققا قارجى جۇمساۋشى قايراتكەر رەتىندە قالدى.
2006 جىلى The New York Times گازەتى روكفەللەر قايىرىمدىلىققا بارلىعى 900 ملن دوللاردىڭ اقشاسىن جۇمسادى دەگەن مالىمەت جاريالادى.
ال 2008 جىلى روكفەللەر ءوزى وقىعان گارۆارد ۋنيۆەرسيتەتىنە 100 ملن دوللار اقشا سىيلادى.
دەۆيد روكفەللەر ءوزىنىڭ نيۋ-يورك جانىنداعى يەلىگىندە ۇيقىدا جاتىپ قايتىس بولدى.