سىبايلاستىقپەن قوعام بولىپ كۇرەسكەن ۇتىمدى

سوڭعى جىلدارى سىبايلاس جەمقورلىقپەن كۇرەس قىزۋ قارقىن الىپ, قوعامدى قولى تازا ەمەس جانداردان ارىلتۋ جۇمىستارى جولعا قويىلىپ كەلەدى. سونىڭ ءبىر دالەلى كوكشەتاۋدا «جەمقورلىققا قارسى تۇڭعىش مەديا-ورتالىق رەسپۋبليكالىق قوعامدىق بىرلەستىگى وتكىزگەن «جەمقورلىققا قارسى قوعامدىق پىكىر مەن حالىقتىڭ ويىن قالىپتاستىرۋداعى قوعامدىق ۇيىمدار مەن باق-تىڭ ءرولى» اتتى فورۋم بولىپ تابىلادى. سىبايلاس جەمقورلىققا قار­سى ءبىرىنشى فورۋم استانا قالا­سىندا وتكەنى بەلگىلى. بۇل – ەكىنشى شارا. ەندى ۇيىمداستىرۋشىلار مۇنداي يگى شارالاردى ەلىمىزدىڭ ءار وڭىرىندە وتكىزىپ تۇرۋدى كوزدەپ وتىر. اتالعان شارانىڭ ماقساتى – سىبايلاس جەمقورلىقپەن كۇرەس ۇدە­رىسىندەگى قوعامنىڭ جانە قو­عامدىق ۇيىمداردىڭ, بۇقارالىق اقپارات قۇرالدارىنىڭ ءرولىن كۇشەيتۋ. ەڭ باستىسى, ەل تۇرعىندارىنىڭ ساناسىنا جەمقورلىقتىڭ قوعام مەن مەملەكەت ءۇشىن قاۋىپتىلىگىن جەتكىزۋ. مەملەكەتتىك قىزمەت ىستەرى جانە سىبايلاس جەمقورلىققا قار­سى ءىس-قيمىل اگەنتتىگىنىڭ سى­باي­لاس جەمقورلىققا قارسى كۇرەس دەپارتامەنتىنىڭ ديرەكتورى سالاۋات مۇقسيموۆ جيىندا جەمقورلىق تاۋەكەلدەرى مەن سەبەپتەرىن جويۋعا تولىق مۇمكىندىك بار ەكەندىگىن العا تارتتى. وتكەن جىلى قولدا­نىستاعى زاڭناما اۋقىمدى ينۆەن­تاريزاتسياعا ۇشى­راپ, سونىڭ ناتيجەسىندە ەكى مىڭنان استام جەمقورلىق تاۋەكەلدەرى انىق­تالىپ, سونىڭ مىڭ جارىمى جويىلعانى ەرەكشە اتالدى. ەندىگى ماسەلە – سىبايلاس جەمقورلىقتىڭ الدىن الۋعا قوعام بولىپ جۇمىلۋ. سىبايلاس جەمقورلىق – تەك قۇقىق­تىق كورىنىس قانا ەمەس, تەرەڭ جا­عىم­سىز ءىس-ارەكەت ەكەنىن قوعامعا جەتكىزۋ جانە ءاربىر مەملەكەتتىك قىزمەتكەرگە كورسەتىلگەن سەنىمگە سەلكەۋ ءتۇسىرۋدىڭ الدىن الۋ. اقمولا وبلىسى اكىمىنىڭ ورىنباسارى نۇرلان نۇركەنوۆ ەلىمىز تاۋەلسىزدىك العان كەزدەن باستاپ سىبايلاس جەمقورلىقپەن كۇرەس جۇرگىزىپ كەلە جاتقاندىعىنا نازار اۋدارتتى. ەلباسى «100 ناق­تى قادام» ۇلت جوسپارىنا سايكەس ناقتى تاپسىرمالار جۇك­تەسە, بيىلعى جولداۋىندا سىبايلاس جەمقورلىق دەڭگەيىنىڭ تومەندەگەنىن مالىمدەدى. دەي تۇر­عانمەن, نەگىزگى باسىمدىق ءالى سىبايلاستىق سالدارىمەن كۇرەسكە باعىتتالىپ كەلەدى. سوندىقتان دا بۇل ىسكە قوعامنىڭ بارلىق وكىلدەرى قاتىسقانى ماڭىزدى. بۇل رەتتە بارلىق ازاماتتىق ينستيتۋتتاردىڭ جانە ازاماتتاردىڭ سىبايلاس جەمقورلىققا قارسى كۇرەسىنسىز ەش ناتيجە بولمايتىنى تۇسىنىكتى. باسقوسۋدا ماسەلەنىڭ وسى جاعىنا باسا نازار اۋدارىلدى. اسقار تۇراپباي ۇلى, «ەگەمەن قازاقستان» اقمولا وبلىسى