وتكەن جۇمادا تاڭ اتپاي ەلىمىزدىڭ ەڭ شالعايىنداعى جاركەنت قالاسىنا قاراي اتتاندىق. الماتىدان شىققاندا قار قىلاۋلاپ تۇرسا دا, كۇنى جارقىراعان جاركەنتتە اۋا رايى كادىمگىدەي بولەك ەكەندىگى بايقالادى. اپتانىڭ جاقسى كۇنىندە ءبىزدى بۇل قالاعا باستاپ كەلگەن وقيعانىڭ ۇلكەنى «قازترانسگاز» اق ءوزىنىڭ ينۆەستيتسيالىق سەرىكتەسى «APL Construction» جشس بىرلەسىپ, الماتى وبلىسىنداعى جاركەنت قالاسىنا كوگىلدىر وتىندى كىرگىزۋى بولاتىن.
جاركەنتتىكتەر تاريحي كۇن دەپ ەسەپتەگەن وسى جۇمادا ۇلتتىق وپەراتور گاز قۇبىرى مەن اۆتوماتتاندىرىلعان گاز تاراتۋ ستانساسىن (اگتس) سالىپ, ىسكە قوستى. قازىر اۋدان ورتالىعىنداعى العاشقى ابونەنتتەر گازعا قوسىلىپ جاتىر. وسىنى كوزبەن كورىپ, حالىققا جەتكىزۋ ءۇشىن بارعان ءبىر توپ باق وكىلدەرىن دە وت جاعىپ, كۇل شىعارماي-اق الاۋلاعان گازعا پىسكەن بىلقىلداعان باۋىرساقتاردىڭ ءدامى تارتقان سياقتى.
گاز الاۋىن جاعاتىن سالتاناتتى ساتكە قالا تۇرعىندارى, گاز تاراتۋ ستانساسىنىڭ جۇمىسشىلارى دا قۋانا قوسىلىپ, تۇرمىستىڭ ءبىر تاۋقىمەتى بولسا دا ازايعانىنا شىنايى العىستارىن ءبىلدىرىپ جاتتى.
اۋقىمدى جوبانىڭ اتقارىلۋىنا ارنالعان سالتاناتتى راسىمدە «قازترانسگاز ايماق» اق الماتى ءوندىرىستىك فيليالىنىڭ ديرەكتورى شالقار وماربەكوۆ, الماتى وبلىسى پانفيلوۆ اۋدانى اكىمىنىڭ ورىنباسارى دۋمان تورەحانوۆ, وسى جوباعا ينۆەستورلىق قاراجات قۇيعان «APL Construction» كومپانياسىنىڭ ديرەكتورى الەكساندر گيلمانعا ءسوز بەرىلدى. بۇل كىسىلەردىڭ بارلىعىنىڭ ءسوزى ءبىر جەردەن شىققانى ايان. ءبارىنىڭ دە كوزدەگەنى – تىنىش ەلدە تاتۋ تۇرمىس كەشىپ, تۇرمىسىمىزدى جاقسارتا بەرۋگە قىزمەت ەتۋ.
وسىدان كەيىن ارنايى قۇرىلعى ارقىلى كوگىلدىر الاۋ تۇتانىپ, نىسانداردىڭ ىسكە قوسىلار كەزىندە وسى اۋداننىڭ قۇرمەتتى ازاماتى ءشارىپحان قاجى تۇرعانوۆ اقساقالدىق باتاسىن بەردى. ەل ىقىلاسىمەن باتاعا قول جايدى.
قالا تۇرعىندارى كوپتەن كۇتكەن بۇل جوبا «قازترانسگاز» اق پەن الماتى وبلىسى اكىمدىگى جانە «APL Construction» جشس اراسىندا قول قويىلعان الماتى وبلىسىنىڭ پانفيلوۆ جانە ەڭبەكشىقازاق اۋداندارىن گازداندىرۋدى كوزدەيتىن ءوزارا ىنتىماقتاستىق تۋرالى مەموراندۋم اياسىندا جۇزەگە اسىرىلدى. مەموراندۋمعا سايكەس قازترانسگاز كومپانياسى قازاقستان-قىتاي ماگيسترالدى گاز قۇبىرىنان جەتكىزۋشى قۇبىر تارتىپ, جاركەنت پەن ونىڭ اينالاسىنداعى ەلدى مەكەندەرگە جانە «قورعاس-شىعىس قاقپا» ارنايى ەكونوميكالىق ايماعىن جابدىقتاۋعا قۋاتى جەتەتىن اۆتوماتتى گاز تاراتۋ ستانساسىن سالدى. ال جەكە ينۆەستور «APL Construction» سەرىكتەستىگى قالا مەن اۋىلىشىلىك قۇبىرلاردى سالىپ, تۇتىنۋشىلاردى گازعا قوسۋ جۇمىستارىن باستاپ كەتتى.
قولدانىسقا بەرىلىپ وتىرعان «جاركەنت» اگتس-پەن گاز قۇبىرلارى اۋدان ورتالىعىنىڭ 43 مىڭنان استام تۇرعىنى مەن 161 وندىرىستىك جانە كوممۋنالدىق-تۇرمىستىق كاسىپورىندى تابيعي گازبەن جابدىقتاۋعا ارنالعان.
جۇزەگە اسىرىلىپ وتىرعان جوبالار بولاشاقتا الماتى وبلىسى پانفيلوۆ اۋدانىنىڭ ءۇشارال, شولاقاي وكرۋگتەرى مەن وزگە دە ەلدى مەكەندەرىن گازداندىرۋعا مۇمكىندىك جاسايدى, بۇل ءوز كەزەگىندە اۋدانداعى كىشى جانە ورتا بيزنەس, ءوندىرىستىڭ ءتۇرلى سالالارىنىڭ دامۋىنا سەرپىن بەرىپ, جاڭا جۇمىس ورىندارىنىڭ اشىلۋىنا جاعداي تۋعىزادى دەپ كۇتىلۋدە.
ۇلتتىق وپەراتور الداعى ۋاقىتتا تابيعي گاز رەسۋرستارىنىڭ قاجەتتى كولەمىن قامتاماسىز ەتۋدى جالعاستىرا بەرمەك. ماسەلەن, گازداندىرۋدىڭ باس كەستەسىنە سايكەس, جالپى 900 مىڭداي تۇرعىنى بار الماتى وبلىسىنىڭ 228 ەلدى مەكەنىن گازداندىرۋ جوسپارلانىپ وتىر. وسىدان كەيىن ءوڭىردىڭ گازداندىرىلۋ دەڭگەيى 41%-عا جەتەتىن بولادى.
ءىرى ترانزيتتىك جانە ماگيسترالدى گاز قۇبىرلارى الماتى وبلىسى ارقىلى وتكەنىمەن, بۇگىنگى تاڭدا گازداندىرۋ دەڭگەيى بويىنشا الماتى وبلىسى ناشار دامىعان ايماقتاردىڭ ءبىرى سانالادى. سوندىقتان, «قازترانسگاز» اق جانە جەكە ينۆەستوردىڭ اتسالىسۋىمەن اتقارىلعان وسى يگىلىكتى ءىستى ينفراقۇرىلىمدىق جوبالاردى جۇزەگە اسىرۋداعى مەملەكەت-جەكەمەنشىك ارىپتەستىگىنىڭ ءساتتى كورىنىسى دەۋگە تولىق نەگىز بار.
ايناش ەسالي,
«ەگەمەن قازاقستان»
الماتى – جاركەنت – الماتى