نۇرسۇلتان نازارباەۆ گۋميلەۆ اتىنداعى ۋنيۆەرسيتەتتىڭ رەكتورىن قابىلدادى, - دەپ حابارلايدى اقوردانىڭ ءباسپاسوز قىزمەتى. كەزدەسۋ بارىسىندا ە.سىدىقوۆ مەملەكەت باسشىسىن ۋنيۆەرسيتەتتىڭ وتكەن جىلدارداعى قىزمەتى مەن قازىرگى اتقارىپ جاتقان جۇمىستارى جونىندە حاباردار ەتتى.
نۇرسۇلتان نازارباەۆ قازاقستاننىڭ يندۋستريالىق دامۋ باعدارلاماسى ءۇشىن بىلىكتىلىگى جوعارى ماماندار دايارلاۋدىڭ ماڭىزدىلىعىن اتاپ ءوتتى. "ەلوردانى استاناعا اۋىستىرعاننان سوڭ قابىلدانعان العاشقى شەشىمدەردىڭ ءبىرى وسى وقۋ ورنىن قۇرۋ تۋرالى بولدى. رەسپۋبليكامىزدىڭ باس قالاسىمەن بىرگە ونىڭ اتاعى مەن ابىروي-بەدەلى ارتىپ كەلەدى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن ءال-فارابي اتىنداعى قازاق ۇلتتىق ۋنيۆەرسيتەتى ەلىمىزدىڭ جوعارى وقۋ ورىندارىنىڭ الدىڭعى شەبىندە كەلەدى", - دەدى قازاقستان پرەزيدەنتى.
رەكتور بۇگىندە ۋنيۆەرسيتەتتە 17 مىڭنان استام ستۋدەنت ءبىلىم الىپ جاتقانىن, ونىڭ كوبى ءۇش ءتىلدى ەركىن مەڭگەرگەنىن مالىمدەدى. بۇل فاكتورلار ءبىلىم الۋشىلاردىڭ اكادەميالىق موبيلدىلىگىنە سەپتىگىن تيگىزۋدە. "وقۋ ورنى ءوز دەڭگەيىن ۇدايى ارتتىرىپ كەلەدى جانە قازىرگى ۋاقىتتا ول الەمدىك رەيتينگتە 345-ورىندى يەلەنىپ وتىر. ۋنيۆەرسيتەتتە جۇمىس ىستەيتىن شەتەلدىك وقىتۋشىلار, سونداي-اق جۇمىس بەرۋشىلەر ستۋدەنتتەرىمىزدىڭ دايىندىعىنا جوعارى باعا بەرۋدە. ەۋرازيا ۋنيۆەرسيتەتى تۇلەكتەرىنىڭ جۇمىسقا ورنالاسۋ كريتەريى جونىنەن رەسپۋبليكادا الدىڭعى ورىنداردىڭ ءبىرىن يەلەندى. بەدەلدى QS World University Rankings حالىقارالىق رەيتينگ اگەنتتىگىنىڭ ( ۇلىبريتانيا) قورىتىندىسى بويىنشا, ەۋرازيا ۇلتتىق ۋنيۆەرسيتەتى فيزيكا پانىنەن الەمنىڭ ۇزدىك ۋنيۆەرسيتەتتەرىنىڭ قاتارىنا قوسىلدى", - دەدى ە.سىدىقوۆ.
كەزدەسۋ قورىتىندىسى بويىنشا ەلباسى بىرقاتار ناقتى تاپسىرما بەردى.