Golden Boy Promotions كومپانياسىنىڭ پرەزيدەنتى ەريك گومەس WBO نۇسقاسى بويىنشا ءبىرىنشى ورتا سالماقتا الەم چەمپيونى مەكسيكالىق ساۋل «كانەلو» الۆارەس (48-1-1, 34 كو) پەن ورتا سالماقتا WBA (Super), IBO, WBC جانە IBF بەلبەۋلەرىنىڭ يەگەرى قازاقستاندىق گەننادي گولوۆكين (36-0, 33 كو) اراسىنداعى جەكپە-جەك جايلى پىكىر ءبىلدىردى.
بۇعان دەيىن گولوۆكين 10 ماۋسىمدا استانادا شارشى الاڭعا شىعاتىنى حابارلانعان. سونداي-اق, ونىڭ قارسىلاسى رەتىندە ورتا سالماقتا WBO چەمپيونى بريتانيالىق بيللي دجو سوندەرس (24-0, 12 كو) بولۋى مۇمكىن ەكەندىگى جايلى اقپارات تاراعان. ەريك گومەستىڭ ايتۋىنشا, بۇل بوكس كەشى ۇيىمداستىرىلسا, قىركۇيەك ايىندا الۆارەسپەن جەكپە-جەگى وتپەي قالۋى مۇمكىن.
«ەگەر گولوۆكين سوندەرسپەن بوكس كەشىن ۇيىمداستىرار بولسا, «كانەلومەن» وتەتىن كەزدەسۋىنە كەدەرگى كەلتىرۋى مۇمكىن. سوندەرس جايلى ازىرگە ەشنارسە ەستىمەدىم. بىراق بۇل ءىس ورىن السا, ءبىزدىڭ جوسپارىمىزعا كەرى اسەرىن تيگىزەدى. سەبەبى, گولوۆكين-الۆارەس جەكپە-جەگىن ۇيىمداستىرۋ ءبىراز ۋاقىتتى قاجەت ەتەدى. باق وكىلدەرىمەن, تاعى دا بىرنەشە تاراپپەن كەلىسىمگە كەلۋ كەرەك», – دەدى الۆارەسپەن تىعىز جۇمىس ىستەيتىن پروموۋتەرلىك كومپانيانىڭ پرەزيدەنتى RingTV-عا بەرگەن سۇحباتىندا.
«گەنناديدىڭ پروموۋتەرى توم لەففلەر 10 ماۋسىم كۇنى شارشى الاڭعا شىعۋ جونىندە ۇسىنىس بارىن ايتقان, بىراق باستىسى الۆارەسپەن كەزدەسۋ ۇيىمداستىرۋ دەگەن بولاتىن. ەگەر استانادا وتەتىن بوكس كەشىندە شارشى الاڭعا شىقسا, «كانەلومەن» ايقاسى كەيىنگە شەگەرىلۋى مۇمكىن», – دەدى Golden Boy Promotions كومپانياسىنىڭ پرەزيدەنتى.
ايتا كەتەيىك, 18 ناۋرىز كۇنى اقش-تىڭ نيۋ-يورك قالاسىنداعى Madison Square Garden ارەناسىندا گولوۆكين امەريكالىق دەننيەل دجەيكوبسپەن كەزدەسسە, 6 مامىر كۇنى لاس-ۆەگاستاعى «T-Mobile Arena» كەشەنىندە الۆارەس وتانداسى كىشى حۋليو سەزار چاۆەسپەن جۇدىرىقتاسادى.