ۇسىنىپ وتىرعان ءال-فارابي اتىنداعى قازمۋ-دە ۇلىق ناۋرىز اتالىپ ءوتتى
ءو.جولداسبەكوۆ اتىنداعى ستۋدەنتتەر سارايىنىڭ الدىنداعى اۋماقتى الاڭ كوكتەم شۋاعىنا تولىپ, قىزىلدى-جاسىلدى گۇلدەرگە بولەنگەندەي. ادامداردىڭ ءجۇزىنەن مەرەكە شاتتىعى ەسەدى. قالىقتاعان ءان مەن كۇي. كوكتەم بەينەسىندەگى سۇلۋ قىز اققۋداي تەربەلە, مەرەكە دۋمان باستالعانىن پاش ەتتى. وسى ارادا جالعاسقان ارنايى باعدارلامادا حالقىمىزدىڭ ۇلتتىق رۋحى, سالت-ءداستۇرى, ونەرى كورىنىس تاپقانداي بولدى.
ءبىر ايتارلىعى, بۇل كۇنگى ناۋرىزدا تەك قازاق اندەرى ايتىلدى, باعدارلاما باستان-اياق قازاقشا جۇرگىزىلدى. قالىڭدىق ىزدەپ جۇرگەن اتتىلى جىگىتتەردىڭ قىز جىبەكتىڭ كۇيمەسىنە مىنگەن قازمۋ-دىڭ سۇلۋ قىزدارىنا جولىعىپ, تانىسۋ راسىمىندە اينالانى ءان-كۇيگە بولەۋى, جاستاردىڭ جاراستى ءازىل-كۇلكىسى ۇلتتىق ادەت-عۇرپىمىزدىڭ ءبىر قىرىن مەڭزەپ كورسەتتى. ودان ءارى كۇمبىرلەگەن كۇي دە, قازاقتىڭ حالىق اندەرى دە, نۇرعيسا مەن ءشامشى سياقتى ءبىرتۋار سازگەرلەرىمىزدىڭ اندەرى دە, اقىندار ايتىسى دا بولدى. حالىقارالىق قاتىناستار فاكۋلتەتى جانىنداعى «تالەيران» ديپلوماتيالىق كلۋبىنىڭ ستۋدەنتتەرى تاماشا مۋزىكالىق-بي كومپوزيتسياسىن ۇسىندى. اتالمىش فاكۋلتەتتە ءارتۇرلى ەلدەردىڭ, سونىڭ ىشىندە يراننىڭ, اۋعانستان مەن تاجىكستاننىڭ جاستارى وقيدى. ولار عاجاپ بەينەلەر, اۋەندەر مەن بيلەر ارقىلى ناۋرىز مەرەكەسىنىڭ تەرەڭ تامىرلى باستاۋلارى جايىندا اڭگىمەلەدى. «قارا جورعا» بيىنە ارداگەر ۇستازدار مەن جەتكىنشەكتەر دە ارالاستى. ونەر كورسەتكەندەر تۇگەلدەي ۋنيۆەرسيتەتتىڭ ءوز ستۋدەنتتەرى ەكەنىنە ءسۇيسىندىك. تەك باعدارلاما تۇيىنىندە مەرەكەنىڭ قۇرمەتتى قوناعى ەسكەندىر جانە ءبىرجان حاسانعاليەۆتەر «اتامەكەندى» شىرقاعاندا بارشا قاۋىم ولاردىڭ انىنە قوسىلدى. ستۋدەنتتەر سارايىنىڭ توبەسىندەگى بيىكتەن قىدىر اتا ناۋرىزدىڭ اق باتاسىن بەردى.
مەرەكە ۇستىندە رەكتور عالىمقايىر مۇتانوۆ ىرگەلى عىلىمي-زەرتتەۋ ورتالىعىنا اينالۋعا باعىت ۇستاعان, ەل تاۋەلسىزدىگىنىڭ 20 جىلدىعىنا 20 يننوۆاتسيالىق جوبا ۇسىنىپ وتىرعان ۋنيۆەرسيتەتتىڭ ءبىلىم بەرۋ سالاسىنداعى جارقىن جەتىستىكتەرىن ايتا كەلە, ۇزدىك كافەدرا, ۇزدىك فاكۋلتەت, ۇزدىك قۇرىلىمدىق بولىمشە جانە ۇزدىك جاتاقحانا ۇسىنىمدارى بويىنشا جارىس جەڭىمپازدارىن باعالى سىيلىقتارمەن جانە ديپلومدارمەن ماراپاتتادى.
قورعانبەك امانجول.
________________________________
سۋرەتتەردى تۇسىرگەن ۆاديم ماحين.