ورتالىق پوشتانىڭ ءىشى جارقىراپ تۇر, جاڭارتىلعان, جوندەۋدەن وتكەن ءار كابينادا كورپوراتيۆتىك قىزمەت كورسەتۋ سەكتورى دا كەلۋشى كليەنتتەرىمەن قىزۋ جۇمىس جاساۋدا. وتە ءتيىمدى ءارى ىڭعايلى. زاڭدى تۇلعالار مەن جەكە كاسىپكەرگە ارنالعان ءبولىم كۇنىنە 150-200 ادامدى قابىلداپ, پوشتالىق, قارجىلىق, ياعني اقشا اۋدارۋ, اقشا ايىرباستاۋ جانە گازەتكە جازىلۋ سەكىلدى قىزمەت تۇرلەرىن ۇسىنا الادى. سونداي-اق, جاقىندا قىزمەتكەرلەرى وبلىس ورتالىعىنداعى بالالار ۇيلەرىنە بارىپ, ولاردىڭ وزدەرى قالاعان گازەت-جۋرنالدارىنا جازدىرىپ, تۇبىرتەكتەرىن سىيعا تارتىپتى.
ايتپاقشى, ءبىزدىڭ وڭىردەگى اقسۋ قالالىق فيليالىنىڭ پوشتاشىسى ايگۇل ءجۇنىسوۆا استانادا وتكەن پوشتاشىلار بايقاۋىنا قاتىسىپ, ەلىمىزدىڭ «ەڭ ۇزدىك پوشتاشىسى» اتانىپ كەلدى. ايگۇل 7 جىل بويى قالاداعى وزىنە بولىنگەن ءبولىمشە تۇرعىندارىنا گازەت-جۋرنالدار, حات-حابار جەتكىزەدى. بايقاۋدا بەينەروليك ارقىلى ءوز بولىمشەسىنىڭ قالاي قىزمەت جاسايتىنىن كورسەتىپ بەرىپتى. بايقاۋدا پوشتاشىنىڭ قىزمەت بارىسىندا كيەتىن ۇزدىك كيىم ۇلگىسىن كورسەتىپ, قاراپايىم پوشتاشى ايگۇل بارلىق ساۋالدارعا دۇرىس جاۋاپ تا بەرگەن.
– ءبىزدى ۇيلەرىندە اسىعا كۇتىپ وتىراتىن زەينەتكەرلەر, ءمۇمكىندىگى شەكتەۋلى جاندار از ەمەس. پوشتاشىنىڭ ۆەلوسيپەدى بارلىعىنا دا تەز جەتۋگە اسىعادى. وزىمىزگە ىستىق «ەگەمەن قازاقستان», وبلىستىق «سارىارقا سامالى» گازەتتەرى دە كۇندەلىكتى مەنىڭ سومكەمدە, ءار ۇيگە ۋاقىتىندا جەتكىزەمىن, – دەيدى ايگۇل.
ال «قازپوشتا» اق ءبولىمشەلەرىن جاڭعىرتۋ جۇمىستارى ءبىزدىڭ وبلىستان باستالىپتى. بۇل يگىلىكتى ءىس اۋدان ورتالىقتارى مەن اۋىلداردا دا جالعاسىن تابادى.
فاريدا بىقاي,
«ەگەمەن قازاقستان»
پاۆلودار