وتكەن جىلدان باستاپ ىشكى ىستەر مينيسترلىگىنىڭ ۇيىتقى بولۋىمەن mvd.gov.kz ارنايى ۆەب-پورتالى ىسكە قوسىلعانى بەلگىلى. ساياسي رەپرەسسيا قۇرباندارى تۋرالى اقپاراتتى اناعۇرلىم قولجەتىمدى ەتۋ مەن ولاردى ەستە ساقتاۋدا ماڭىزى زور «مەموريال» سەرۆيسىنىڭ قازىرگى قىزمەتى كوپتىڭ كوڭىلىنەن شىعۋدا.
بۇگىندە «مەموريالعا» زۇلماتتى جىلدارى قۋعىن-سۇرگىنگە ۇشىراعان 110 مىڭعا جۋىق جانعا قاتىستى ءتۇرلى دەرەكتەر ەنگىزىلگەن. سوندىقتان دا, مەملەكەتتىك قىزمەت كورسەتۋ شەڭبەرىندە قازاقستاننىڭ ىشكى ىستەر ورگاندارىنا الىس جانە جاقىن شەت ەلدەردەن الەۋمەتتىك-قۇقىقتىق سيپاتتاعى سانقيلى حاتتار مەن رەپرەسسياعا ۇشىراعان تۋىستارىنا قاتىستى ءمالىمەت سۇراتقان ساۋالدار تولاسسىز ءتۇسىپ جاتادى.
ماسەلەن, كۇنى بۇگىنگە دەيىنگى ۋاقىتتا قۋعىن-سۇرگىنگە ۇشىراعان ادامداردىڭ تۋىستارىنان, عالىم-زەرتتەۋشىلەردەن, قوعامدىق ۇيىمداردان, مۇراعاتتار مەن مەملەكەتتىك ورگانداردان 789 ءوتىنىش تىركەلگەن. بۇل قولدانىستاعى زاڭناماعا ءسايكەس اقتالعان ازاماتتار, نە بولماسا ولاردىڭ وكىلدەرى قايتىس بولعان جاعدايدا ولاردىڭ تۋىستارى قىلمىستىق ىستەردىڭ پروتسەستىك ەمەس سيپاتتاعى قۇجاتتارىمەن تانىسۋعا, سونداي-اق, ىستە ساقتالعان قولجازبالارىن, فوتوسۋرەتتەرىن ءجانە وزگە دە جەكە قۇجاتتارىن نەمەسە ولاردىڭ كوشىرمەلەرىن الۋعا قۇقىعى بولۋىمەن تىكەلەي بايلانىستى.
ىزگى نيەتپەن قۇرىلىپ, ىسكە كىرىسكەن «مەموريال» دەرەكقورىنان قۋعىن-سۇرگىنگە ۇشىراعان كەڭجاسار كەڭشۋاقوۆتىڭ ۇرپاعى ەڭلىك ناۋرىزباەۆا جۋىردا عانا ءوز اتاسىنىڭ تاعدىر-تالايىنا قاتىستى تىڭ مالىمەتكە قول جەتكىزدى. ول سايتقا رەسمي ساۋال جولداۋ ارقىلى 1937 جىلى ساياسي تۇتقىنعا الىنعان ك.كەڭشۋاقوۆتىڭ ىستەرى سولتۇستىك قازاقستان وبلىسى ىشكى ىستەر دەپارتامەنتىنىڭ مۇراعاتىندا ساقتاۋلى تۇرعانىن بىلگەن. بيىلعى جىلدىڭ 6 اقپانىندا ءىىم ارنايى مۇراعاتىنىڭ قىزمەتكەرلەرى ە.ناۋرىزباەۆانى اتاسىنىڭ ىسىمەن تانىستىرىپ, ونىڭ اتۋ جازاسىنا كەسىلگەنى جانە مۇلكىنىڭ تاركىلەۋگە الىنعانى تۋرالى جازىلعان قۇجاتتاردى مارقۇمنىڭ نەمەرەسىنىڭ قولىنا تابىستادى. ال ءوز زامانىنىڭ قۋعىن-سۇرگىنىنە ۇشىراپ, جازىقسىز اتىلعان كەڭجاسار كەڭشۋاقوۆتان قالعان جالعىز تۇياق – قىزى ءاميناش اپا قازىر 92 جاسقا قادام باسىپتى. كەيۋانا قازىرگى تاڭدا استانادا تۇرادى ەكەن.
قاپەرلەرىڭىزگە سالا كەتەيىك, 2014 جىلى ىشكى ىستەر ورگاندارى ۇلتتىق قاۋىپسىزدىك قىزمەتىنەن سوت ورگاندارى اقتاعان رەپرەسسياعا ۇشىراعان ازاماتتاردىڭ قىلمىستىق ىستەرىنە قاتىستى تروفەيلىك ماتەريالداردى قابىلداعان ەدى. ولاردىڭ قۇرامىندا ۇلى وتان سوعىسى كەزىندە تۇتقىنعا ءتۇسىپ, كەيىننەن گەرمانيادان ەلىنە ورالعان بۇرىنعى كسرو ازاماتتارى تۋرالى قۇجاتتار دا بولدى. ەرەكشە اتاپ وتەرلىگى سول, الماتى قالاسىنىڭ ءىىد مۇراعاتىنا قۋعىن-سۇرگىنگە ۇشىراعان قازاق ينتەلليگەنتسياسىنىڭ قايراتكەرلەرى احمەت بايتۇرسىنوۆ, وراز جاندوسوۆ, ءىلياس جانسۇگىروۆ جانە ساكەن سەيفۋللين سىندى ۇلت ارداقتىلارىنا قاتىستى ءبىرقاتار مۇراعات قۇجاتتارى دا قابىلدانعان.
نۇرلىبەك دوسىباي,
«ەگەمەن قازاقستان»