كەشە ورتالىق سايلاۋ كوميسسياسىنىڭ حاتشىسى باقىت مەلدەشوۆ بريفينگ وتكىزىپ, ءماسليحاتتاردىڭ شىعىپ قالعان دەپۋتاتتارىنىڭ ورنىنا كانديداتتار ۇسىنۋدىڭ قورىتىندىلارى جانە تىركەۋ بارىسى تۋرالى ايتىپ بەردى.
وسك حاتشىسىنىڭ اتاپ وتۋىنشە, وسى جىلعى 26 ناۋرىزدا رەسپۋبليكانىڭ 58 سايلاۋ وكرۋگىندە بولاتىن ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋدا كانديداتتاردى ۇسىنۋ اياقتالدى, 13 دەپۋتات وبلىستىق, 9-ى قالالىق, 36-سى اۋداندىق ماسليحاتتارعا سايلانادى. سايلاۋ ناۋقانىنىڭ بارىسىندا 201 كانديدات ۇسىنىلدى, ولاردىڭ 63-ءىن ساياسي پارتيالار, 138-ءى ءوزىن ءوزى ۇسىنعان.
«ۇسىنىلعان كانديداتتار ىشىندە 154 ەر ادام جانە 47 ايەل ادام بار, – دەدى ب.مەلدەشوۆ. 65 كانديدات قازاقستان رەسپۋبليكاسى ساياسي پارتيالارىنىڭ مۇشەلەرى بولىپ تابىلادى, 70-ءى پارتيا قاتارىندا جوق, 66-سى پارتياعا تيەسىلىلىگىن كورسەتپەگەن. ۇسىنىلعان كانديداتتاردىڭ ىشىندە 6 ۇلتتىڭ وكىلى بار. كانديداتتاردىڭ ورتاشا جاسى – 41 جاس, 156 كانديداتتىڭ جوعارى ءبىلىمى, 34-ءى ورتا ارناۋلى ءبىلىمدى جانە 11-ءىنىڭ ورتا ءبىلىمى بار».
بۇدان سوڭ وسك حاتشىسى كانديداتتاردىڭ جۇمىسى مەن قىزمەتىنە توقتالدى. ونىڭ ايتۋىنشا, كانديداتتاردىڭ 54,2%-ى مەملەكەتتىك مەكەمەلەردىڭ, ۇيىمدار مەن كاسىپورىنداردىڭ قىزمەتكەرلەرى, 35,3%-ى كوممەرتسيالىق قۇرىلىمداردىڭ, 4,5%-ى ساياسي پارتيالار مەن ۇەۇ قىزمەتكەرلەرى, 3,5%-ى ۋاقىتشا جۇمىسسىز, 1,5%-ى جۇمىس ورنىن كورسەتپەگەن, 1%-ى زەينەتكەرلەر. «قازىرگى ۋاقىتتا ءماسيحاتتاردىڭ شىعىپ قالعان دەپۋتاتتارىنىڭ ورنىنا كانديداتتاردى تىركەۋ جالعاسۋدا. الماتى, اتىراۋ, شىعىس قازاقستان, قاراعاندى, قىزىلوردا, پاۆلودار وبلىستارىندا تىركەۋ 1 ناۋرىزدا, ال استانا قالاسىندا 10 ناۋرىزدا اياقتالادى, – دەدى ول ءارى قاراي. – 1 ناۋرىزداعى جاعداي بويىنشا وكرۋگتىك سايلاۋ كوميسسيالارى 184 كانديداتتى تىركەدى. تىركەۋ مەرزىمى اياقتالعان سوڭ, تىركەلگەن بارلىق كانديدات 24 ناۋرىز كۇنگى ساعات 24.00-گە دەيىن جۇرەتىن سايلاۋالدى ۇگىتكە كىرىسەدى».
ال 11 ناۋرىزدان باستاپ سايلاۋ بولاتىن وكرۋگتەردىڭ سايلاۋشىلارى ۋچاسكەلىك سايلاۋ كوميسسيالارىنىڭ ءۇي-جايلارىندا سايلاۋشىلار تىزىمدەرىمەن تانىسىپ, ءوزى تۋرالى مالىمەتتەردى تەكسەرىپ جانە ولاردا جىبەرىلگەن ءدالسىزدىكتەردى انىقتاعان جاعدايدا, تۇزەتۋلەر ەنگىزە الادى. سايلاۋ ناۋقانى قاجەتتى قارجىلىق جانە ماتەريالدىق-تەحنيكالىق رەسۋرستارمەن قامتاماسىز ەتىلگەن ءارى سايلاۋ زاڭناماسىنىڭ نورمالارىنا سايكەس وتۋدە.
ءاليسۇلتان قۇلانباي,
«ەگەمەن قازاقستان»