ەلىمىزدىڭ ساياسي مادەنيەتى تاعى ءبىر سىننان ابىرويمەن ءوتتى. حالىق پرەزيدەنت جاريالاعان ۇندەۋدى ءمۇددەلىلىكپەن, بىلىكتىلىكپەن تالقىلادى.
ءبىز وسى ۇدەرىستىڭ بەل ورتاسىندا بولدىق. ەلدىڭ وسكەندىگىنە, ازاماتتاردىڭ ساياسي قىراعىلىعى مەن زاڭنامالىق ساۋاتتىلىعىنا كوز جەتكىزدىك. سۇيسىندىك. پىكىرلەر, ويلار كەرنەۋىنەن اسىپ-تاسىپ جاتتى. حالىق – بيلىكتىڭ قاينار كوزى دەگەن وسى! ازاماتتىق قوعام, ەل پاتريوتتارى كونستيتۋتسيانىڭ 26-بابى توڭىرەگىندە بوسقا تەر توكپەگەن ەكەن. ەلباسى ونى ءبىلىپ, قاپەرگە الىپ, بۇل ماسەلە بويىنشا كونستيتۋتسياعا وزگەرىس ەنگىزبەۋدى ۇسىندى.
ال جۇمىس توبى جەتەكشىسىنىڭ سوزىنە قاراعاندا, اتا زاڭنىڭ 63-بابىن قامتيتىن 6 مىڭداي ۇسىنىس ءتۇسىپتى. بۇل, ءسوز جوق, ازاماتتاردىڭ ساياسي بەلسەندىلىگىنىڭ ءوسكەندىگىنىڭ, قۇقىقتىق ساۋاتتىلىعىنىڭ كەمەلدەنگەندىگىنىڭ, ەلدەگى دەموكراتيانىڭ تاعدىرىنا بەي-جاي قارامايتىندىعىنىڭ ايقىن ايعاعى.
قوعام ءوز پىكىرىن ايتتى. ءوز ميسسياسىن ابىرويمەن ورىندادى. ەندىگى جاۋاپكەرشىلىك پارلامەنت دەپۋتتارىندا. ولار حالىق, ازاماتتىق قوعام, ساياسي پارتيالار ۇسىنعان ناقتى ۇسىنىستاردى زاڭ باپتارىنا اينالدىرىپ, ناقتىلاپ, ەلىمىزدىڭ ساياسي جۇيەسىنە, ەڭ الدىمەن, پارلامەنتتىڭ ءوزىنىڭ قىزمەتىنە قان جۇگىرتەتىن نورمالار قابىلداپ, ۋاقىت بيىگىنەن كورىنە الا ما – ەندىگى ماسەلە وسىندا.
قازاقستاننىڭ ساياسي جۇيەسىن جانداندىرۋدىڭ, ونىڭ بۇكىل بويىنا قان جۇگىرتۋدىڭ باستى تەتىكتەرىنىڭ ءبىرى – پارلامەنتتىڭ بيلىكتىڭ دەربەس تارماعى رەتىندەگى وكىلەتتىكتەرىنە, زاڭ شىعارۋ قىزمەتىنىڭ ساپاسى مەن اۋقىمىنا بايلانىستى ەكەندىگى بۇگىندە داۋسىز اقيقات. پارلامەنت دەپۋتاتتارى باتىلدىق كورسەتىپ, جوبا-ۇسىنىستى تولىقتىرىپ, ءوز بيلىگىن نىعايتۋ, اسىرەسە, ەلدى باسقارۋداعى اتقارۋشى بيلىكتىڭ بيلىك جۇيەسىندەگى بىرجاقتى باسىمدىعىن ەڭسەرۋ ءۇشىن ءوزىنىڭ حالىق الدىنداعى جاۋاپكەرشىلىگىن جاڭا ۋاقىت دەڭگەيىنەن پايىمداپ, جاسامپازدىق تانىتىپ, ەلدەگى بيلىك تارماقتارى اراسىنداعى تەپە-تەڭدىكتى قالىپتاستىرۋعا ۇمتىلۋى كەرەك.
ءبىزدىڭ تاعى ءبىر ايتارىمىز, دەپۋتاتتار كورپۋسى زاڭ شىعارۋشى بيلىكتىڭ بەدەلىن كوتەرىپ, ءورىسىن, فۋنكتسيالارىن كەڭەيتەتىن نورمالار قابىلداۋى كەرەك-اق. مۇنداي مۇمكىندىك كۇندە بولا بەرمەيدى. ەلباسى دەپۋتاتتارعا تاماشا زاڭنامالىق تەتىكتى ءوزى بەرىپ, ءوزى ۇسىنىپ وتىر. قوعام ەندى پارلامەنتشىلەردەن زاڭنامالىق شىعارماشىلىق, باتىلدىق, ساياسي كەمەلدىلىك, دەموكراتيا تاعدىرى ءۇشىن جاناشىرلىق كۇتەدى.
ءناۋبات قاليەۆ,
ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ
پروفەسسورى, ساياسي عىلىمدار دوكتورى
استانا