«كاۋكەننىڭ جۇلدىزى» ءفيلمىنىڭ تۇساۋكەسەرى ءوتتى

الماتى قالاسىنداعى ەرمەك تۇرسىنوۆتىڭ كينوكلۋبىندا مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن «كاۋكەننىڭ جۇلدىزى» اتتى دەرەكتى ءفيلمنىڭ تۇساۋكەسەرى ءوتتى. دەرەكتى فيلم قازاق كسر-ءنىڭ حالىق ءارتيسى, شىڭعىس ايت­ماتوۆ اتىنداعى حا­لىقارالىق سىي­لىق­تىڭ جانە تاۋ­ەل­سىز «تارلان» سىي­­لىعىنىڭ لاۋرەا­تى, كسرو كينە­ما­توگرافيستەر ودا­عىنىڭ مۇشەسى, پرو­فەسسور, وپەرا ءان­شى­سى, تەاتر جانە كي­نو اكتەرى كاۋكەن كەن­جە­تاەۆتىڭ ءومىرى مەن شى­عارماشىلىعى تۋرا­لى باياندايدى. – كاۋكەن اعامەن بەس-التى فيلم­گە تۇستىك, تالاي بىرگە جۇردىك, تۋعان باۋىرلارداي سىي­لاستىق. ونىڭ بىرەۋگە رەنجىپ تۇرعانىن ەشقاشان كورگەنىم جوق. ەشقاشان بىرەۋ تۋرالى جامان ءسوز ايتپايتىن جانى تازا, جۇرەگى پاك ادام بولاتىن. وسى فيلمگە كاۋكەن اعانىڭ شىعارمالارىن وقۋعا ۇسىنىس تۇسكەن كەزدە, بىردەن قۋانا كەلىستىم, – دەدى اكتەر نۇرجۇمان ىقتىمباەۆ. – بۇل ەلىمىزدىڭ مادەنيەتىنە وراسان زور ۇلەس قوسقان اتى اڭىزعا اينالعان تۇلعالاردىڭ ءومىربايانى تۋرالى جاساعان ءبىرىنشى دەرەكتى ءفيلمىم ەمەس. بۇعان دەيىن كاۋكەن كەنجەتاەۆتىڭ باۋىرى, ۇلى رەجيسسەر شاكەن ايمانوۆتىڭ شىعارماشىلىق جولىنا ارنالعان دەرەكتى فيلم تۇسىرگەن بولاتىنمىن. سوندىقتان دا, وسىنداي ءبىرتۋار ازاماتتاردى سىيلاعان سول داۋىرگە, سول ماتەريالدارعا قايتا ءۇڭىلىپ, جۇمىس ىستەگەنىمە قۋاندىم. اسىرەسە, كەيىپكەرىمىزدىڭ تۋعان جەرى – تابيعاتى كوركەم, قازاقتىڭ ءداستۇرى مەن تاريحىنا باي باياناۋىل ولكەسى ماعان قاتتى اسەر ەتتى. كاۋكەن اعامىزدىڭ ىشكى جان دۇنيەسىنىڭ قالىپتاسۋىنا تۋعان جەرى ۇلكەن اسەر ەتتى دەپ ويلايمىن, – دەدى كارتينانىڭ رەجيسسەرى عازيز ناسىروۆ. ايتا كەتسەك, «كاۋكەننىڭ جۇلدىزى» اتتى قويى­لىمدىق ساحنالارى بار دەرەكتى فيلم 2016 جىلى كاۋكەن كەنجەتاەۆتىڭ 100 جىلدىعىنا ارنايى وندى­رىسكە جىبەرىلگەن بولاتىن. فيلم كاۋكەن كەن­جەتاەۆتىڭ تۋىپ-وسكەن جەرى پاۆلودار وبلىسى, باياناۋىل ولكەسىندە جانە الماتى قالاسىندا ءتۇسىرىلدى. كاۋكەن كەنجەتاەۆتىڭ وبرازىن جاس اكتەر ەرجاس راقىمبەكوۆ سومداپ شىقتى. ورالحان ءداۋىت, «ەگەمەن قازاقستان»