ورتالىق كوممۋنيكاتسيالار قىزمەتىندە «اتامەكەن» ۇلتتىق كاسىپكەرلەر پالاتاسىنىڭ ىسكەر ايەلدەر كەڭەسى وتكەن جىلعى جۇمىس قورىتىندىسى بويىنشا ەسەپ بەرىپ, الداعى ۋاقىتقا جوسپارىمەن ءبولىستى.
بريفينگكە «اتامەكەن» ۇكپ تورالقا توراعاسى حاتشىلىعىنىڭ جەتەكشىسى, ىسكەر ايەلدەر كەڭەسىنىڭ ءتورايىمى ءلاززات رامازانوۆا, «Asyl Arman» جشس ديرەكتورى, وڭتۇستىك قازاقستان وبلىسى وڭىرلىك ىسكەر ايەلدەر كەڭەسىنىڭ ءتورايىمى الما ارحاباەۆا, «تەرريتوريا ديزاينا deSali» ستۋدياسىنىڭ, «Coffee & People» جشس ديرەكتورى, ماڭعىستاۋ وبلىسى وڭىرلىك ىسكەر ايەلدەر كەڭەسىنىڭ ءتورايىمى ساۋلە ساليحوۆا مەن «DELUXE» جۋرنالىنىڭ باس رەداكتورى قاراعاندى وبلىسى وڭىرلىك ىسكەر ايەلدەر كەڭەسىنىڭ ءتورايىمى ءاليا سادىرباەۆا قاتىستى.
«بۇگىندە ايەلدەر بيزنەستە كۇن وتكەن سايىن بەلسەندى بولىپ كەلەدى. كاسىپكەرلىكپەن اينالىسىپ جاتقان ايەلدەردىڭ ۇلەسى ايتارلىقتاي ءوستى. قولدا بار مالىمەتتەرگە قاراعاندا كاسىپكەر ايەلدەردىڭ ۇلەسى شامامەن 50 پايىزعا كوبەيدى. وسىنىڭ ءبارى ارينە, مەملەكەتتىڭ قولداۋىنىڭ ناتيجەسىندە مۇمكىن بولىپ وتىر», – دەدى ىسكەر ايەلدەر كەڭەسىنىڭ ءتورايىمى ءلاززات رامازانوۆا.
ونىڭ ايتۋىنشا, بىلتىر كاسىپكەرلەر پالاتاسى العاش رەت قازاقستاننىڭ 6 وڭىرىندە بيزنەستى ميكرونەسيەلەۋ باعدارلاماسىن ىسكە قوستى. اقتوبە, الماتى, جامبىل, قىزىلوردا مەن ماڭعىستاۋ وبلىستارىنداعى وڭىرلىك كەڭەستەر وسى جوبانىڭ جۇزەگە اسىرىلۋىندا بەلسەندى جۇمىس اتقارىپ كەلەدى.
قازىرگى كەزدە قازاقستان ازاماتتارىنىڭ 52 پايىزى, ياعني جارتىسىنان كوبى ايەلدەر. ەلىمىزدە 9 128 098 ايەلدەر تۇرادى. ولاردىڭ ىشىندە 16 جاستان 62 جاس ارالىعىندا ەڭبەككە جارامدىلارى – 5 323 439 (50%). ال شاعىن جانە ورتا كاسىپكەرلىكتى 697 355 (42%) ايەل باسقارادى. «اتامەكەن» ۇكپ 17 666 كاسىپكەر ايەلگە سەرۆيستىك قولداۋ كورسەتسە, 45 501 ايەلگە اقپاراتتىق قولداۋ جاسادى.
«ىسكەر ايەلدەر كەڭەسىنىڭ جۇمىسىنان كوپتەگەن مىسالدار كەلتىرۋگە بولادى. ونىڭ ىشىندە شىعىس قازاقستان وبلىسىندا جالعىز ۇستا ايەل سۆەتلانا كوشەلەۆانىڭ ءىسى ايرىقشا مىسال بولا الادى. ىسكەر ايەلدەر كەڭەسىنىڭ كوكپەكتى اۋدانىنداعى بولىمشەسىنىڭ بەلسەندى جۇمىسى مەن قولداۋىنىڭ ارقاسىندا «جۇمىسپەن قامتۋدىڭ جول كارتاسى – 2020» باعدارلاماسى اياسىندا 2 ميلليون تەڭگە نەسيە الىپ, ءوزىنىڭ شاعىن تسەحىن اشىپ, تەمىردەن سوعىلعان 10 ءتۇرلى بۇيىم دايىندايدى. مۇنداي شەبەرلىك ەسكەرۋسىز قالمادى. شەبەرلەر «جاڭا ءونىم» اتالىمىمەن ماراپاتتالىپ, سىي-سىياپاتتارعا يە بولدى», – دەدى ءلاززات رامازانوۆا.
بريفينگتە ىسكەر حانىمدار الداعى جىلعا جۇمىس جوسپارىمەن تانىستىرىپ, بارلىق ايەلدەردى ورتاق ىسكە بىرىگۋگە شاقىردى.
داستان كەنجالين,
«ەگەمەن قازاقستان»