1 ناۋرىز كۇنى قىزىلوردا وبلىسىنا جاپونيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى يتيرو كاۆاباتا جۇمىس ساپارىمەن كەلدى. ول وبلىس اكىمى قىرىمبەك كوشەرباەۆپەن كەزدەسىپ, ايماقتاعى بىرقاتار الەۋمەتتىك نىسانداردى ارالادى.
كەزدەسۋ بارىسىندا قىرىمبەك كوشەرباەۆ كاۆاباتا مىرزاعا جاپونيا ۇكىمەتىنىڭ «ءشوپ تامىرى» باعدارلاماسى بويىنشا سىر ءوڭىرىنىڭ مەديتسينا سالاسىن دامىتۋداعى ۇزاق مەرزىمدى ارىپتەستىگى ءۇشىن العىسىن ءبىلدىردى.
- تاۋەلسىزدىك العاننان بەرى جاپونيا ۇكىمەتى قازاقستاندا 5 487 468 اقش دوللارىنا 75 قازاقستاندىق جوبانى قارجىلاندىردى. ونىڭ ىشىندە قىزىلوردا وبلىسىنىڭ دەنساۋلىق ساقتاۋ سالاسىن دامىتۋعا باعىتتالعان بىرنەشە جوبا بار. العاش رەت 2000 جىلى قازاقستان مەن جاپونيا ۇكىمەتىنىڭ كەلىسىمدەرى ناتيجەسىندە قۇنى 3 ملن. 800 مىڭ دوللار تۇراتىن مەديتسينالىق قۇرال-جابدىق الۋعا گرانت ءبولىنىپ, ۇلكەن جوبا جۇزەگە استى. 2003 جىلى وبلىستىق بالالار اۋرۋحاناسى قۇرال-جابدىقتارمەن قامتاماسىز ەتىلدى,- دەگەن وبلىس اكىمى كاۆاباتا مىرزاعا العىس حات تاپسىردى.
قىزىلوردادا يتيرو كاۆاباتا وبلىستىق جۇقپالى اۋرۋلار اۋرۋحاناسىندا بولىپ, جان ساقتاۋ بولىمىنە 75 مىڭ اقش دوللارى تۇراتىن جاڭا قۇرال-جابدىقتار تاپسىردى. بۇدان بولەك, جاپونيا ەلشىلىگى بالالار مەن جاسوسپىرىمدەرگە ارنالعان تۋبەركۋلەزگە قارسى وبلىستىق ءساناتوريدى قولداۋ بويىنشا تاعى ءبىر جوبا ازىرلەۋدە.