بۇل كۇندەرى ماياميدە وقۋ-جاتتىعۋ جيىنىن وتكىزىپ جاتقان كاسىپقوي بوكسشى ايدار شارىباەۆ كەشە لوندون وليمپياداسىنىڭ چەمپيونى ليۋك كەمپبەللمەن سپاررينگتىك جەكپە-جەك وتكىزدى, دەپ حابارلايدى baq.kz.
بەس راۋندتىق جەكپە-جەكتەن كەيىن ەكى تاراپ تا ءبىر-بىرىنە العىس ءبىلدىرىپ, قول الىستى. دەگەنمەن, اعىلشىن بوكسشىنىڭ كومانداسى تۇسىنىكتى جاعدايلارعا بايلانىستى سپاررينگتىڭ ۆيدەوسىن جاريالاماۋدى وتىنگەن.
ايتا كەتەيىك, 29 جاستاعى ليۋك كەمپبەلل 2012 جىلعى لوندون وليمپياداسىنىڭ جەڭىمپازى, 2008 جىلعى ەۋروپا چەمپيونى جانە 2011 جىلى باكۋدە وتكەن الەم چەمپيوناتىنىڭ كۇمىس جۇلدەگەرى. 2013 جىلى كاسىپقوي بوكسقا اۋىسقان. بۇگىنگە دەيىن ەنشىسىندە 16 جەكپە-جەك بار. سونىڭ 15-ىندە جەڭىسكە جەتىپ, 12 قارسىلاسىن نوكاۋتپەن جەڭگەن. كەلەسى جەكپە-جەگى 25 اقپانعا جوسپارلانعان كەمپبەلل يوركشيردىڭ «ايس ارەنا» ستاديونىندا مەكسيكالىق حايرو لوپەسپەن ايقاسىپ, WBC silver چەمپيوندىق بەلبەۋىنە تالاسادى.
ال ايدار شارىباەۆ شارشى الاڭدا ءتورت جەكپە-جەك وتكىزىپ, بارلىعىندا جەڭىسكە جەتكەن. ءۇش قارسىلاسىن نوكاۋتقا تۇسىرگەن. ماياميدەگى Moro’s Gym زالىندا بەلگىلى كۋبالىق وسميري فەرناندەستىڭ قاراماعىندا جاتتىعىپ جۇرگەن جەرلەسىمىز كەلەسى ايقاسىن 17 ناۋرىزدا وتكىزەدى.
«قازىر باپكەرىم مورو فيزيكالىق جاتتىعۋعا كوپ كوڭىل ءبولىپ جاتىر. كەلەسى جەكپە-جەگىم ناۋرىز ايىنىڭ 17-سىنە جوسپارلانعان. ازىرگە قارسىلاسىم بەلگىسىز. مۇنىمەن پروموۋتەرلەرىم اينالىسۋدا. وسى جاقتا ءالى ءبىراز بولىپ, ەكى جەكپە-جەك وتكىزەمىن. ەلگە سودان كەيىن عانا ورالامىن», – دەدى ايدار.