شاعىن فۋتبول شەبەرلەرى اراسىندا وتكەن ەرەمەنكو كۋبوگى سىنىندا الماتىنىڭ «قايراتى» ءوزىنىڭ تاريحىندا ءۇشىنشى رەت چەمپيون اتاندى. ءنوۆوسىبىردىڭ «سيبيرياك» كومانداسىمەن وتكەن فينالدىق كەزدەسۋدە ءبىزدىڭ فۋتبولشىلار 4:3 ەسەبىمەن جەڭىسكە جەتتى.
ويىن بارىسىندا ەسەپتى الماتىلىقتار اشتى. كوماندانى دۋگلاس العا شىعارعان بولاتىن. ارادا ءبىر مينۋت وتكەندە وسى شابۋىلشى ءوزىنىڭ مەرگەندىگىن دالەلدەپ, تاعى ءبىر گول سوقتى.
قارسىلاستار دا قاراپ تۇرمادى. كەزدەسۋدىڭ 19-مينۋتىندا جوان گول سوعىپ, ەسەپ ايىرماشىلىعىن قىسقارتتى. ال ويىننىڭ 27-مينۋتىندا سيمي سايوتتي التى مەترلىك ايىپ دوبىن ءدال ورىنداپ, ەسەپتى تەڭەستىردى.
بۇدان كەيىن كۇش العان رەسەيلىك كوماندا تاعى ءبىر گول سوعىپ, العا شىقتى. گولدى 39-مينۋتتا ماكسيم ۆولىنيۋك سوققان بولاتىن.
دەگەنمەن, «قايرات» ەسىن تەز جيدى. ماتچتىڭ 43-مينۋتىندا ديۆانەي تارازى باسىن تەڭەستىردى. ال جەرلەستەرىمىزدى جەڭىسكە جەتكىزگەن گول ميحايل ءپارشيننىڭ ەنشىسىنە بۇيىردى.
قايرات ءابىلدينوۆ,
«ەگەمەن قازاقستان»