كەشە جاپونيانىڭ ساپپورو قالاسىندا VIII قىسقى ازيا ويىندارى سالتاناتتى تۇردە جابىلدى. ءبىر اپتا بويى الاقانداي ارالدى دۇبىرگە بولەگەن اق ازيادا دوداسىندا 32 ەلدىڭ اتىنان كەلگەن اتلەتتەر سپورتتىڭ 11 ءتۇرى بويىنشا 64 مەدال جيىنتىعىن ساراپقا سالدى.
قازاقستان قۇراماسى سارى قۇرلىق سپورتشىلارىنىڭ بۇل سايىسىندا جامان ونەر كورسەتكەن جوق. راس, ۇزدىك ۇشتىكتىڭ ىشىنە كىرە المادىق. ءبىر جاعىنان مۇنىڭ دا كەشىرىممەن قارارلىقتاي وزىندىك سەبەپتەرى بولدى. ماسەلەن, ساپپوروداعى بۇل سايىس الماتى قالاسىندا وتكەن XXVIII ءدۇنيەجۇزىلىك قىسقى ۋنيۆەرسيادادان سوڭ ىلە باستالدى دا, ءبىزدىڭ مىقتى دەگەن سپورتشىمىزدىڭ كوبى اق ازيادا الدىندا تىنىعىپ ۇلگەرمەدى. ونىڭ ۇستىنە, ەل قۇراماسىنداعى كوشباسشى سانالاتىن ءبىرقاتار سپورتشىمىز ءدال وسى ۋاقىت ارالىعىندا ءوتىپ جاتقان الەم چەمپيوناتتارى مەن الەم كۋبوگى سىندارىندا ونەر كورسەتتى...
اق ازيادانىڭ جەتىنشى كۇنى فريستايل شەبەرى يۋليا گالىشەۆا قوسارلانعان موگۋل بويىنشا سايىستىڭ التىن جۇلدەسىن جەڭىپ الدى. ىرىكتەۋ سىنىندا يۋليا جاپوننىڭ ەكى بىردەي سپورتشىسى – حيناكو توميتاكي جانە كيسارا ءسيميوشيدى ارتقا قالدىردى. ال التىن مەدال ءۇشىن بولعان ايقاستا گالىشەۆا كۇنشىعىس ەلىنىڭ تاعى ءبىر وكىلى اريسۋ مۋراتۋدان مىقتى ەكەنىن دالەلدەدى. قولا جۇلدە جاپون قىزى ميكي يتوعا بۇيىردى.
ال بۇدان ءبىر كۇن بۇرىن بياتلوننان وتكەن ارالاس ەستافەتا سىنىندا (2ح6 +2+7,5) ونەر كورسەتكەن ەكى بىردەي قۇراما كوماندامىز ەل قورجىنىنا التىن جانە كۇمىس مەدال سالعان بولاتىن. قۇرامىندا ازيادانىڭ بىرنەشە دۇركىن چەمپيونى گالينا ۆيشنەۆسكايا, داريا ۋسانوۆا, ماكسيم براۋن جانە يان ساۆيتسكي سىندى ساڭلاقتار بار ءبىرىنشى قۇراما ۇزدىك شىعىپ چەمپيون اتانسا, الينا رايكوۆا, اننا كيستانوۆا, ۆاسيلي پودكورىتوۆ جانە انتون پانتوۆ سياقتى شەبەرلەردەن قۇرالعان ەكىنشى كوماندامىز كۇمىس جۇلدەگە قول جەتكىزدى. ال بۇل سىندا جاپوندىق كومانداعا بۇيىرعانى قولا جۇلدە بولدى.
جالپى, بۇل ازيادا سىنىن گ.ۆيشنەۆسكايانىڭ بەنەفيسى دەسە دە بولادى. جارىستىڭ سوڭعى كۇنى بياتلونشى قىزىمىز 12,5 شاقىرىمدىق ماسس-ستارت باسەكەسىندە 39 مينۋت 26,6 سەكۋند كورسەتكىشپەن تاعى دا قارسىلاستارىن قاپى قالدىردى. سونىمەن, گ.ۆيشنەۆسكايا مۇنىڭ الدىندا سپرينت, قۋدالاۋ جارىسى جانە ارالاس ەستافەتا سىنىندا العان ءۇش التىن جۇلدەسىنىڭ سانىن تورتكە جەتكىزدى!
ال بۇدان بۇرىن ەرلەر اراسىنداعى 15 شاقىرىمدىق ماسس-ستارت سىنىندا يان ساۆيتسكي نىساناعا ءۇش مارتە تيگىزە الماعانىنا قاراماستان, قاشىقتىقتى 44 مينۋت 12,2 سەكۋند كورسەتكىشپەن جۇگىرىپ ءوتىپ, التىننان القا تاققان بولاتىن.
اق ازيادانىڭ سوڭعى كۇنىندە شايبالى حوككەي دوداسىندا التىن جۇلدە يەگەرى انىقتالدى. فينالدىق جەكپە-جەكتە جاپونيا حوككەيشىلەرىمەن كۇش سىناسقان قازاقستان قۇراماسى 7:0 ەسەبىمەن ءىرى جەڭىسكە جەتىپ, ازيا ويىندارىنىڭ چەمپيونى اتاندى. ءبىزدىڭ قۇراما ساپىنان ياروسلاۆ ەۆدوكيموۆ (1-ءشى جانە 30-مينۋتتار), يليا كوۆزالوۆ (3-ءشى جانە 59-شى), كيريلل ساۆيتسكي (5-ءشى), نيكيتا ميحايليس (13-ءشى) جانە كونستانتين ساۆەنكوۆ (36-شى) سىندى حوككەيشىلەر مەرگەندىكتەرىمەن كوزگە ءتۇستى.
ال حوككەيشى قىزدار اراسىنداعى ءۇشىنشى ورىن ءۇشىن بولعان باسەكەدە قازاقستان قۇراماسى تايلاند كومانداسىن 8:0 ەسەبىمەن ويسىراتا جەڭىپ, قولا ءجۇلدەگە يە بولدى.
سونىمەن, سپورت تاريحىنىڭ قويناۋىنا كەتكەن بۇل اق ازيادا سىنىندا قازاقستان قۇراما كومانداسى بارلىعى 32 مەدال (9 التىن, 11 كۇمىس جانە 12 قولا) الىپ, جالپىكوماندالىق ەسەپ بويىنشا جاپونيا (74 مەدال – 27, 21, 26), وڭتۇستىك كورەيا (50 – 16, 18, 16) جانە قىتاي (35 – 12, 14, 9) ەلدەرىنەن كەيىن ءتورتىنشى ورىنعا تابان تىرەدى.
قايرات ءابىلدينوۆ,
«ەگەمەن قازاقستان»