جۇبان مولداعاليەۆ اتىنداعى باتىس قازاقستان وبلىستىق كىتاپحاناسى, اباي اتىنداعى شىعىس قازاقستان وبلىستىق كىتاپحاناسى جانە باتىس قازاقستان وبلىسى سىرىم اۋدانى اكىمدىگى ونلاين-رەجىمدە باس قوسىپ, بيىلعى الاش تويىن ۇيىمشىلدىقپەن اتاپ ءوتۋ جونىندە كەڭەستى. بۇل شارانىڭ وتۋىنە سىرىم اۋدانى اكىمدىگى مۇرىندىق بولدى.
– بۇل كونفەرەنتسيا «نۇر وتان» پارتياسىنىڭ « ۇلى دالا قازىناسى» پارتيالىق باعىتىنا سايكەس ۇيىمداستىرىلىپ وتىر. قازاق مەملەكەتتىلىك يدەياسىنىڭ جاسامپازدىعىن, قازاق زيالىلارىنىڭ قايراتكەرلىگىن ناسيحاتتاۋ – ءاربىرىمىزگە ورتاق شارۋا. بيىل الاش قوزعالىسىنا 100 جىل, ال وسى قوزعالىستىڭ بەلسەندى قايراتكەرى, زاڭگەر جاھانشا دوسمۇحامەد ۇلىنىڭ تۋعانىنا 130 جىل تولادى. بۇل ەكى داتانىڭ دا سىرىم اۋدانىنا تىكەلەي قاتىسى بار. مۇنداي شارالاردى بىرلەسە وتكىزگەنىمىز ابزال, – دەدى سىرىم اۋدانىنىڭ اكىمى ابات شىنىبەكوۆ.
جالپى, الاش قوزعالىسىنا قاتىستى دەرەكتەردى زەرتتەۋ جۇمىسى شىعىس قازاقستان وبلىسىندا جاقسى جولعا قويىلعان. بۇل وڭىردە ارنايى عىلىمي ورتالىق 2008 جىلدان بەرى جۇمىس ىستەپ كەلەدى. بۇگىنگە دەيىن ءبىرنەشە ونداعان جيناق جارىق كورگەن. باتىسقازاقستاندىق الاشتانۋشى ءدامەتكەن سۇلەيمەنوۆا «ءبىزدىڭ وبلىسقا دا وسىنداي ورتالىق كەرەك» دەگەن ۇسىنىسىن جەتكىزدى. سەمەيدەگى الاش عز ورتالىعىنىڭ ديرەكتورى شاڭباي تۇردىقۇلدىڭ پىكىرىنشە, الاشتانۋشى عالىمدار ءبىر-بىرىمەن دەرەك الماسىپ, قويان-قولتىق جۇمىس ىستەسە, ناتيجە دە كوپ بولماق.
وسىدان بىرنەشە جىل بۇرىن جالپى ءبىلىم بەرەتىن مەكتەپتەردە الاشتانۋ فاكۋلتاتيۆتىك كۋرستارىن جۇرگىزۋ تۋرالى نۇسقاۋ بەرىلگەن ەدى. كۋرستىڭ ارنايى باعدارلاماسى دا دايىندالعان. الايدا, بۇل فاكۋلتاتيۆتىك كۋرستار جۇرگىزىلگەن جوق, جۇمىس باستالماي جاتىپ توقتاتىلدى.
– الاش قوزعالىسى جايلى وقۋشىلار تەرەڭ ءبىلۋى ءتيىس. مەن وسى كۋرستاردىڭ جۇرگىزىلگەنىن قالايمىن, – دەدى سىرىم اۋدانى بۇلان ورتا مەكتەبىندەگى تاريح ءپانىنىڭ مۇعالىمى سەرىك زياتوۆ.
قازبەك قۇتتىمۇرات ۇلى,
«ەگەمەن قازاقستان»
ورال