استانادا قر ءسىم قايرات ءابدىراحمانوۆ بەلارۋس ءسىم-ءنىڭ ءبىرىنشى ورىنباسارى اندرەي ەۆدوچەنكومەن كەزدەستى, دەپ حابارلايدى قر ءسىم-ءنىڭ ءباسپاسوز قىزمەتى.
تاراپتار ءبىرىنشى كەزەكتە ەكى ەل باسشىلارىنىڭ دوستىق جانە ىنتىماقتاستىق تۋرالى كەلىسىم رۋحىندا قازاقستان مەن بەلارۋس اراسىنداعى قارىم-قاتىناستاردىڭ پروگرەسسيۆتى ءجانە سەرپىندى دامۋىنداعى ءرولىن اتاپ ءوتتى. سونداي-اق, كەزدەسۋ بارىسىندا ق.ءابدىراحمانوۆ پەن ا.ەۆدوچەنكو جوعارى دەڭگەيدەگى ساياسي بايلانىستاردىڭ الداعى كۇندەرگە ارنالعان جوسپارىن تالقىلادى.
ءوز كەزەگىندە ەلىمىزدىڭ سىرتقى ىستەر ءمينيسترى بەلارۋس تاراپىنا قازاقستاننىڭ 2017-2018 جىلدارداعى بۇۇ قاۋىپسىزدىك كەڭەسىنە تۇراقتى ەمەس مۇشەلىگىنە سايلانۋىنا بەلسەندى تۇردە قولداۋ كورسەتكەنى ءۇشىن العىس ءبىلدىردى.
كەزدەسۋدە 2010 جىلى قازاقستاننىڭ ەقىۇ-عا توراعالىعى كەزىندە ەكى جاقتىڭ ىنتىماقتاسا جۇمىس ىستەگەنى ەسكە الىندى.
كەزدەسۋ بارىسىندا تاراپتار ەكىجاقتى ىنتىماقتاستىقتىڭ, سونداي-اق, ايماقتىق جانە حالىقارالىق ۇيىمدار شەڭبەرىندەگى بايلانىستاردىڭ باسىم باعىتتارىن تالقىلادى. بۇعان قوسا, ولار ساۋدا-ەكونوميكا جونىندەگى ۇكىمەتارالىق كوميسسيانىڭ شەڭبەرىندە اتقارىلىپ جاتقان جۇمىستاردىڭ ماڭىزدىلىعىنا توقتالدى. اسىرەسە, كوميسسيانىڭ قازاقستان مەن بەلارۋستىڭ گەوگرافيالىق قولايلى ورنالاسۋىن ەسكەرىپ, قىتاي, ەۋروپالىق وداق جانە ورتالىق ازيا ەلدەرىنىڭ نارىقتارىنا تاۋار جونەلتۋ ءىسىن ىلگەرىلەتۋ جونىندەگى جۇمىستارىنا ەكپىن بەردى. ولار ودان ءارى پارلامەنتتىك ديپلوماتيانىڭ اراسىنداعى بايلانىستاردى نىعايتۋ ماڭىزدىلىعىن اتاپ ءوتتى.
ءوز كەزەگىندە ا.ەۆدوچەنكو پرەزيدەنت نۇرسۇلتان نازارباەۆ ۇسىنعان «الەم. ءححى عاسىر» مانيفەسىنە بەلارۋس تاراپى باسا نازار اۋدارعانىن, يادرولىق قاۋىپسىز الەم قۇرۋداعى قازاقستاندىق باستامالاردى قىزۋ قولدايتىنىن جەتكىزدى. سونىمەن قاتار, بەلارۋس ديپلوماتى ءوز ەلىنىڭ ەكسپو-2017 كورمەسىنە قاتىسۋ باعىتىنداعى دايىندىق جۇمىستارى جونىندە ايتىپ بەردى.
كەزدەسۋ سوڭىندا تاراپتار ەكى ەلدىڭ ايماقتىق جانە جاھاندىق وزەكتى ءماسەلەلەردى شەشۋ باعىتىنداعى ۇستانىمدارى ۇقساس ەكەنىن اتاپ ءوتتى. بۇدان بولەك, ولار ەۋرازيالىق ەكونوميكالىق وداق اياسىندا, سونداي-اق, قوس مەملەكەتتىڭ ءوزارا ىنتىماقتاستىعىنىڭ بارلىق جەلىلەرى بويىنشا تىعىز بايلانىستار ودان ءارى جالعاسا بەرەتىنىن ءسوز ەتتى.