جەنەۆادا سيرياارالىق كەلىسسوزدەر قايتا جانداندى, ءتورتىنشى كەزەڭ قاتىسۋشىلاردىڭ بۇۇ سيريا جونىندەگى ارنايى ەلشىسى ستاففان دە ميستۋرامەن قوستاراپتى كەزدەسۋلەرىنەن باستالدى, دەپ حابارلايدى قازاقپارات ريا نوۆوستي اگەنتتىگىنە سىلتەمە جاساپ.
ءبىر جىلدىق ءۇزىلىس جانە استاناداعى جاڭا كەلىسسوز الاڭى پايدا بولعاننان كەيىن ءوتىپ جاتقان كەزدەسۋدىڭ باستى تاقىرىبى سيريادا جاڭا ۇكىمەت قۇرۋ, ەل كونستيتۋتسياسىنىڭ جاڭا جوبالارى مەن سايلاۋ وتكىزۋ بولماق. جەنەۆاداعى تالقىلاۋدىڭ فورماتى رەسمي تۇردە جاريالانبادى. وپپوزيتسيا تالاپ ەتكەندەي, تىكەلەي كەزدەسۋلەر بولا ما, الدە ارنايى ەلشى ارقايسىسىمەن جەكە كەزدەسىپ, ارالىق ديپلوماتيا تاجىريبەسىن جالعاستىرا ما, بەلگىسىز.
دە ميستۋرانىڭ ءوزى جاقىندا بولعان ءباسپاسوز ءماسليحاتىندا ءوز كەستەسىن, ءتىپتى بەيسەنبى كۇنگى جوسپارلارىن جاريالامادى. ونىڭ ايتۋىنشا, بۇگىنگى كۇننىڭ ءبىرىنشى جارتىسىندا دەلەگاتسيالارمەن كەزدەسكەننەن سوڭ, فورمات ماسەلەسىن شەشەدى.