ناسا كۇن جۇيەسىنە جاقىن كەڭىستىكتەن ولشەمى جەر شارىنا سايكەس كەلەتىن 7 جاڭا عالامشار تابىلعانىن جاريا ەتتى, دەپ جازادى ۆۆس. ولار TRAPPIST-1 قىزىل جۇلدىزىنىڭ وربيتاسىنان تابىلعان جانە 7 عالامشاردىڭ ۇشەۋى تىرشىلىككە قولايلى بولۋى مۇمكىن. عالىمداردىڭ ايتۋىنشا, وندا سۋدىڭ سۇيىق كۇيدە ساقتالۋىنا مۇمكىندىك بار. جاڭا تابىلعان جۇيەنىڭ جەر شارىنان قاشىقتىعى 40 ملن جارىق جىلىنا تەڭ, بۇل قاشىقتىقتى ءتۇسىندىرۋ ءۇشىن عالىمدار ولارعا رەاكتيۆتى ۇشاقپەن 49 ملن جىلدا جەتۋگە بولاتىنىن ايتادى. ەكزوپلانەتالار "سپيتتسەر" اتتى تەلەسكوپ ارقىلى تابىلعان.
"عالامشارلار ءبىر-بىرىنە جانە جۇلدىزعا جاقىن ورنالاسقان. بۇل جونىنەن ولار يۋپيتەردىڭ سەرىكتەرىنە ۇقسايدى. الايدا, جۇلدىز وتە كىشكەنتاي جانە سۋىق بولعاندىقتان, ونىڭ پلانەتالارىندا سۇيىق كۇيدەگى سۋ, ءتىپتى تىرشىلىك تە بولۋى ىقتيمال", دەيدى استرونوم ميشەل گيون.
ۆۆس-ءدىڭ عىلىم سالاسى بويىنشا شولۋشىسى دەۆيد شۋكماننىڭ ايتۋىنشا, ناسا وسى كۇنگە دەيىن 3449 عالامشار انىقتاعان. ونىڭ ايتۋىنشا, ماسەلە ولاردىڭ سانىندا ەمەس, كوپشىلىگىنىڭ جەرگە ۇقساستىعىندا. ال جوعارىدا اتالعان TRAPPIST-1 جۇلدىزى - كىشكەنتاي ءارى جارىق ەمەس. ياعني, ونى تەلەسكوپپەن كورۋ قيىنعا سوعادى. ساراپشى ەندى جاڭا جۇيەدە كيسلورود, مەتان سەكىلدى گازداردىڭ بار-جوعىن انىقتاۋى كەرەكتىگىن ايتادى. ال ناسا-نىڭ عىلىمي ميسسيالار ءبولىمى باسشىسىنىڭ ورىنباسارى توماس تسۋربيۋحەننىڭ پىكىرىنشە, "ەكىنشى جەر تابىلا ما دەگەن ەمەس, ول قاشان تابىلادى؟" دەگەن سۇراققا باسا نازار اۋدارۋ كەرەك.