قازاقستان رەسپۋبليكاسىنىڭ سىرتقى ءىستەر ءمينيسترى قايرات ءابدىراحمانوۆ حالىقارالىق كورمەلەر بيۋروسىنىڭ (حكب) باس حاتشىسى ۆيسەنتە لوسسەرتالەسپەن كەزدەستى, دەپ حابارلادى سىرتقى ىستەر مينيسترلىگىنىڭ ءباسپاسوز قىزمەتى.
كەزدەسۋ بارىسىندا تاراپتار قازاقستان مەن حكب اراسىنداعى ىنتىماقتاستىقتى ودان ءارى دامىتۋ ءماسەلەلەرىن تالقىلادى. ق.ءابدىراحمانوۆ استانا قالاسىندا وتەتىن ەكسپو-20 17 حالىقارالىق مامانداندىرىلعان كورمەسىنە دايىندىق پەن ونى ءوتكىزۋ تۋرالى مالىمەت بەردى.
سونداي-اق, قازاقستاننىڭ باس ديپلوماتى استانا كورمەسى شەڭبەرىندە جوسپارلانعان ماڭىزدى ءىس-شارالار تۋرالى حابارلادى. ولاردىڭ ىشىندە شانحاي ىنتىماقتاستىق ۇيىمىنىڭ ءسامميتى مەن يسلام ىنتىماقتاستىعى ۇيىمىنىڭ عىلىم جانە تەحنولوگيا جونىندەگى ءبىرىنشى ءسامميتى وتكىزىلەتىنىن ەرەكشە اتادى.
ءوز كەزەگىندە ۆ.لوسسەرتالەس ەكسپو-2017 كورمەسىن ۇيىمداستىرۋداعى قول جەتكىزىلگەن جەتىستىكتەردى جوعارى باعالاپ, قازاقستان پرەزيدەنتى نۇرسۇلتان نازارباەۆتىڭ كورمە اياقتالعاننان كەيىن ونىڭ ينفراقۇرىلىمىن پايدالانۋ تۋرالى باستاماسىنىڭ ماڭىزى زور ەكەنىن اتاپ كورسەتتى.
حكب باس حاتشىنىڭ مالىمدەۋىنشە, مۇنداي حالىقارالىق IT-ستارتاپ تەحنوپاركى, «جاسىل» تەحنولوگيالار مەن ينۆەستيتسيالىق جوبالاردى دامىتۋ ءجونىندەگى ورتالىق جانە «استانا» حالىقارالىق قارجى ورتالىعى ەكسپو-2017 كورمەسى ءوتكىزىلگەننەن كەيىن دە ءوزىنىڭ ۇزاق مەرزىمدىك وڭ اسەرىن بەرەتىن بولادى.
سونىمەن قاتار, حالىقارالىق ۇيىم جەتەكشىسى ءۇستىمىزدەگى جىلى ەكونوميكالىق ىنتىماقتاستىق ءجانە دامۋ ۇيىمى, ەۋروپالىق وداق پەن بىرىككەن اراب امىرلىكتەرى, سينگاپۋر مەن مالايزيا ەلدەرىنىڭ ازاماتتارى ءۇشىن ەنگىزىلگەن ۆيزاسىز رەجىمنىڭ ماڭىزدىلىعىن اتاپ ءوتتى.
كەزدەسۋ سوڭىندا قازاقستان سىرتقى ساياسات ۆەدومستۆوسىنىڭ باسشىسى ۆ.لوسسەرتالەسكە ەكسپو-2017 حالىقارالىق كورمەسىنە قاتىسۋشىلارى ءۇشىنشى جيىنىنىڭ ءساتتى وتۋىنە تىلەكتەستىك ءبىلدىردى.