نيدەرلاندتىق ۇلكەن پيتەر برەيگەل دەگەن سۋرەتشى 1560 جىلى «بالالار ويىندارى» اتتى كارتيناسىن دۇنيەگە اكەلىپتى. قۇداي-اۋ, انا كارتينادا بالالاردىڭ جىبىر-جىبىر قيمىلىن كورگەندە, ويىننىڭ كوپتىگىنە ەرىكسىز تاڭداي قاعاسىز. زەرتتەۋشىلەردىڭ ەسەپتەۋىنشە, سۋرەتشى كارتيناسىندا 200-گە جۋىق ويىن بالاسىن بەينەلەگەن كورىنەدى. ويىن ءتۇرىنىڭ ءوزى 100-دەن اسىپ جىعىلادى. كارتينا قۇددى تورتكۇل دۇنيەدە قانشا حالىق بار, سولاردىڭ ويىن تۇرلەرىنىڭ ەنتسيكلوپەدياسى ىسپەتتى.
ارينە, ءا دەگەننەن ءسىزدىڭ ويىڭىزعا «قازاقتىڭ قانداي ويىنى بار؟» دەگەن ساۋالدىڭ ساپ ەتە قالاتىنى ءسوزسىز. ساسپاڭىز, برەيگەلىڭىز اسىق ويىنىن دا ادەمى بەينەلەپتى.
كەزىندە «ويىنىڭ وسىلعىر» دەگەندى ۇلكەندەر جاعى ويىننىڭ قىزىعىنا بەرىلىپ, دەر كەزىندە ۇيگە كەلە قويماعان بالالارعا قاراتا ايتقان بولۋى كەرەك. «ويىنى وسىلعاننىڭ» كوكەسىن ادامزات بالاسى ەندى باستان وتكىزىپ وتىرعان ءتارىزدى. برەيگەل بەينەلەگەن بەس عاسىر بۇرىنعى ويىندارىڭىز ءادىرا قالدى قازىر, بۇگىنگى «يگرومانيانىڭ» قاسىندا ولار ءجىپ ەسە المايدى. ويناپ ءجۇر دەگەن اتى عانا, بالانىڭ كوزى دە, كوڭىلى دە عالامتورعا ءبىرجولا بايلانعان. بالالاردى جۇگىرىپ, سەكىرىپ, جاسىرىنىپ وينايتىن الۋان ءتۇرلى ويىنمەن الدارقاتا المايسىز, ولاردى ءبىر-اق ويىن ارباپ العان. ينتەرنەت-ويىن.
قىسقاسى, «يگرومانياڭىز» توعىز بالدىق سىلكىنىسكە بەرگىسىز كۇشپەن ءححى عاسىر بالالارىنىڭ ساناسىن سولقىلداتىپ, كۇندىز-ءتۇنى ۋلاپ جاتىر. ويىن ەمەس, وپات. ال «كوك كيت» دەگەن ويىنىڭىز ءتىپتى ورەندەردى ولىمگە ماجبۇرلەپ, سورلاتىپ-اق تۇر. وسىلايشا, ءبىر-اق ويىن – ينتەرنەت-ويىن ۇرپاقتىڭ بولاشاعىن بۇلدىرەتىن ءتۇرى بار...
جۋرناليست پەن سۋرەتشى