باتىس قازاقستان وبلىسىندا سۋارمالى جەرلەردى كوبەيتۋ ماقساتىندا 5 جىلدىق جوسپار جاسالدى. وسى مەرزىم ارالىعىندا 145 مىڭ گەكتار شابىندىق القابى مەن كولتابانداردى سۋلاندىرۋ جۇيەسى جاڭعىرتىلماق.
كۇنى بۇگىن وبلىستا سۋ ساقتاعىش 38 قويما 91 ءىرى گيدروتەحنيكالىق قوندىرعى جانە ۇزىندىعى 1700 كم بولاتىن سۋ ارناسى بار. كوپ جىلدان كۇتىمسىز قالعاندىقتان, ولاردىڭ كوبى جوندەۋدى قاجەت ەتەدى.
سۋلاندىرۋ جۇيەسىن جاڭعىرتۋ 2016 جىلى باستالعان. سىرىم اۋدانىندا ولەڭتى سۋارمالى كولتاباندار جۇيەسىن جاڭعىرتۋعا 108,7 ملن تەڭگە جۇمسالدى. بيىل ىسكە قوسىلاتىن جوبا 2 مىڭ گا القاپتى قامتيدى.
توعاناس اۋىلىندا شولاق اڭقاتى سۋ قويماسىن كۇردەلى جوندەۋگە 103,4 ملن تەڭگە بولىنگەن. تەرەكتى اۋدانىندا دا 42 شاقىرىمدىق جايىق-شالقار سۋ ارناسى جوندەلەدى. جانىبەك اۋدانىنداعى ءابدىلمان جانە سوركول كولتاباندارىن قالپىنا كەلتىرۋدىڭ جوبالىق قۇجاتتارى (1,8 مىڭ گا القاپ, 409,1 ملن تەڭگە) دايىن.
ۇزىندىعى 180 شاقىرىمعا سوزىلاتىن كيروۆ-شەجىن ارناسىن جاڭعىرتۋ جۇمىسى قورىتىندى, ءۇشىنشى كەزەڭگە كەلدى. ءتورت اۋداننىڭ 90 مىڭ گا شابىندىق جانە جايىلىمدىق جەرلەرىن سۋاراتىن بۇل ارنا قايتا ىسكە قوسىلسا, وبلىستا مال ازىعىن مول دايىنداۋعا, ناتيجەسىندە مال باسىن كوبەيتۋگە ۇلكەن قولداۋ بولماق.
قازبەك قۇتتىمۇرات ۇلى,
«ەگەمەن قازاقستان»
ورال