پارلامەنت ءماجىلىسىنىڭ دەپۋتاتتارى قازاقستان رەسپۋبليكاسى ۇكىمەتى مەن ۇلتتىق بانكىنەن 2014-2016 جىلدارى زەينەتاقى قورىنداعى قارجىنىڭ قايدا ينۆەستيتسيالانعانى تۋرالى مالىمەتتى ۇسىنۋدى تالاپ ەتتى.
بۇل تۋرالى پلەنارلىق وتىرىستا تومەنگى پالاتا دەپۋتاتى مايرا ايسينا دەپۋتاتتىق ساۋال جولدادى.
«ءبىزدىڭ دەپۋتاتتىق ساۋال ۇكىمەت باسشىسى مەن ۇلتتىق بانك توراعاسىنا باعىتتالادى. وڭىرلەرگە جاساعان ساپارىمىزدا حالىقتى تولعاندىرعان ماسەلەلەردىڭ ءبىرى زەينەتاقى قورىنداعى جيناق ەكەنىن بايقادىق. سونىمەن قاتار, جالپى بجزق تاعدىرى تۋرالى. 20 اقپان كۇنى قر ينۆەستيتسيالار جانە دامۋ ۆيتسە-ءمينيسترى البەرت راۋ ەلدىڭ تەمىر جول سالاسىنا قوردان 50 ملرد تەڭگە بولىنەتىنى تۋرالى ايتتى. وسىنى ەسكەرە وتىرىپ, 2014-2016 جىلدارى بجزق قاراجاتى قانداي قارجى ۇيىمدارىنا بەرىلگەنى تۋرالى مالىمەت بەرۋلەرىڭىزدى سۇرايمىز», — دەدى دەپۋتات.
ەستەرىڭىزگە سالا كەتەيىك, 20 اقپان كۇنى قر ينۆەستيتسيالار جانە دامۋ ۆيتسە-ءمينيسترى البەرت راۋ ەلدىڭ تەمىر جول سالاسىنا قوردان 50 ملرد تەڭگە بولىنەتىنى تۋرالى ايتقان ەدى.
ارتىنشا, بۇل ماسەلەنىڭ انىق-قانىعىن ءبىلۋ ءۇشىن بجزق جانىنداعى قوعامدىق كەڭەس قور باسشىلىعىنان بۇل ءسوزدىڭ قانشالىقتى راس ەكەنى, ەگەر راس بولسا, قارجى قانداي شارتتارمەن بەرىلەتىنىن ءتۇسىندىرۋدى تالاپ ەتكەن ەدى.